(ឥណ្ឌូណេស៊ី)-ថ្មីៗនេះ អ្នកលេងបណ្ដាញសង្គម បានចែករំលែកតៗគ្នានូវវីដេអូមួយដែលថតបានសកម្មភាពបុគ្គលិកសន្តិសុខម្នាក់ នៅ ហ្សាការតា ត្រូវរន្ទះបាញ់ចាំពេញមួយទំហឹង។
សារព័ត៌មាន RT (រុស្ស៊ី) ដកស្រង់ប្រភពព័ត៌មានពី ឥណ្ឌូណេស៊ី ឱ្យដឹងថា បុរសរងគ្រោះក្នុងហេតុការណ៍រន្ទះបាញ់នេះគឺជាបុគ្គលិកសន្តិសុខរបស់ក្រុមហ៊ុនលក់ម៉ាស៊ីនធុនធ្ងន់មួយនៅភាគខាងជើង រដ្ឋធានីហ្សាការតា។
គាត់ត្រូវរន្ទះបាញ់ចាំ នៅពេលកំពុងបំពេញភារកិច្ចក្រោមទឹកភ្លៀង។ ភ្លាមៗក្រោយពីត្រូវរន្ទះបាញ់ គាត់ក៏ដួលដេកទៅលើដី ហើយបន្ទាប់មក មនុស្សជាច្រើននាក់ក៏បានរត់ទៅជួយ។ ជនរងគ្រោះត្រូវបានបញ្ជូនទៅព្យាបាលនៅមន្ទីរពេទ្យ តែក្រោយមកក៏បានត្រលប់ទៅព្យាបាលនៅឯផ្ទះ។
មូលហេតុដែលនាំឱ្យមានរន្ទះបាញ់នេះគឺដោយសារឆត្រដែលជនរងគ្រោះប្រើប្រាស់។ ឆត្រមានធាតុដែកដែលអាចស្រូបទាញអគ្គិសនីពីផ្លេកបន្ទោរ។
សារព័ត៌មានក្នុងស្រុកឱ្យដឹងថា ហេតុការណ៍ខាងលើបានកើតឡើងកាលពីដើមសប្ដាហ៍កន្លង។ ប៉ូលិសក៏បានបញ្ជាក់អំពីហេតុការណ៍នេះ៕
