ទារិកាទើបកើតម្នាក់នៅ ប្រទេសឥណ្ឌា ត្រូវបានអ្នកភូមិប្រទះឃើញនៅកណ្ដាលវាលស្រែ ហើយនៅជុំវិញមានសត្វសុនក ១ ក្រុម កំពុងផ្ដល់ភាពកក់ក្ដៅ។
សារព័ត៌មានរបស់ ឥណ្ឌា សប្ដាហ៍នេះបានរាយការណ៍ថា ទារិកាទើបកើតម្នាក់ត្រូវបានអ្នកភូមិ Saristal ក្នុងខេត្ត Chhattisgarh រកឃើញ ដោយសារតែសំឡេងយំ។ ទារិកានេះត្រូវគេទុកចោលលើវាលស្រែ ក្នុងសភាពគ្មានអ្វីដណ្ដប់កាយ ប៉ុន្តែ មិនមានរបួសស្នាម និងមានសុនកតូចប៉ុន្មានក្បាលនៅជុំវិញ។
មេសុនកត្រូវគេជឿថា ជាអ្នកដែលបានឃើញទារិកានេះមុនគេ ហើយក៏ដេកនៅក្បែរនោះ នាំឱ្យកូនសុនកធ្វើតាម។ អ្នកភូមិនិយាយថា ទារិកានេះនៅមានជីវិតក៏ប្រហែលជាដោយសារទទួលបានភាពកក់ក្ដៅពីសុនក នៅក្នុងគ្រាដែលសីតុណ្ហភាពក្នុងតំបន់នេះ ថយចុះទាបខ្លាំងនៅពេលយប់។
ទារិកាទើបកើតនេះ ត្រូវបានគេដាក់ឈ្មោះឱ្យថា Akanksha។ អ្នកភូមិ និងមន្ត្រីមូលដ្ឋានបានរាយការណ៍ដល់ប៉ូលិស និងទាក់ទងមន្ត្រីសុខាភិបាល ដើម្បីនាំ Akanksha ទៅកាន់មន្ទីរពេទ្យ។
អ្នកភូមិម្នាក់ឈ្មោះ Premnath ឱ្យដឹងថា ក្មេងទើបកើតដែលអាចនៅមានជីវិតឆ្លងរាត្រីបាន គឺជា «អព្ភូតហេតុ» ព្រោះថា ឆ្កែព្រៃជាច្រើនក្បាលអាចមានភាពសាហាវ និងស្រេកឃ្លាន។
«ពួកគេមិនមែនជាឪពុកម្ដាយទេ ពួកគេគឺជាជនល្មើស» Premnath ថ្កោលទោសអ្នកដែលបានបោះបង់ចោលទារិកាទើបកើតនេះ។
ក្រុមមន្ត្រីមានសមត្ថកិច្ចក្នុងតំបន់ បានប្រកាសថា កំពុងស៊ើបអង្កេត និងស្រាវជ្រាវរកឪពុកម្ដាយរបស់ទារិការូបនេះ ដើម្បីយកមកផ្ដន្ទាទោសតាមច្បាប់៕