(ប្រទេសថៃ)-ទារិកាទើបចាប់កំណើតម្នាក់ ត្រូវបានប្រជាជនក្នុងខេត្ត Krabi ប្រទះឃើញនៅមានជីវិតក្នុងស្ថានភាពត្រូវសត្វល្អិតរោមជិត បន្ទាប់ពីត្រូវគេបោះចោលក្នុងព្រៃអស់រយៈពេល ២ ថ្ងៃ។
ទារិកានេះត្រូវបានគេប្រទះឃើញក្នុងសភាពគ្មានខោអាវ ស្ថិតនៅលើស្លឹក និងមែកឈើក្នុងព្រៃជ្រៅ កាលពីចុងសប្ដាហ៍មុន។ ពេលត្រូវគេចាប់បី ទារិកានេះក៏បើកភ្នែក និងស្រែកយំ។ បន្ទាប់មក អ្នកដែលបានប្រទះឃើញ ក៏បានដាក់ទារិកានេះទៅលើកន្លែងស្អាត និងរង់ចាំប៉ូលិស និងរថយន្តសង្គ្រោះបន្ទាន់។
លើរាងកាយទារិកានេះ គេឃើញមានស្នាមជាំនៅលើមុខ និងជន្លេន រួមនឹងសត្វល្អិតផ្សេងៗជាច្រើន វាពាសពេញដងខ្លួន។ បន្ទាប់ពីត្រូវបានតាមដាននៅមន្ទីរពេទ្យ ទារិកានេះត្រូវបានបញ្ជាក់ថា មានសុខភាពល្អ និងពុំមានបញ្ហាអ្វីធ្ងន់ធ្ងរ។
មនុស្សម្នាមានការភ្ញាក់ផ្អើលខ្លាំងណាស់ នៅពេលឃើញទារិកាទើបកើតនេះនៅមានជីវិត ក្រោយពីស្ថិតនៅតែម្នាក់ឯងក្នុងព្រៃជ្រៅដែលសម្បូរសត្វសាហាវដូចជា ពស់ថ្លាន់ ពស់វែក និងកម្ដៅថ្ងៃខ្លាំង។
អ្នកនាំពាក្យរបស់ប៉ូលិសក្នុងតំបន់បានឱ្យដឹងថា សមត្ថកិច្ចកំពុងតាមរកស្ត្រីជាម្ដាយរបស់ទារិកានេះ ប៉ុន្តែ ដោយសារក្នុងព្រៃពុំមានកាមេរ៉ា ដូច្នេះការកំណត់អត្តសញ្ញាណនឹងជារឿងលំបាក។
ឯកសារនៅក្នុងមន្ទីរពេទ្យដែលនៅក្បែរកន្លែងកើតហេតុបំផុត បានបង្ហាញថា ថ្មីៗនេះមិនមានស្ត្រីណាម្នាក់ឆ្លងទន្លេនោះទេ។
«ម្ដាយរបស់ទារិកានេះទំនងជាមកពីតំបន់ផ្សេង ហើយបានយកកូនមកចោលក្នុងព្រៃនេះ» វរសេនីឯកប៉ូលិស Prasit Yodthong បានបញ្ជាក់ដូច្នេះ។
អាជ្ញាធរថៃ បានប្រកាសថា នឹងដាក់ពាក្យប្ដឹងប្រឆាំងនឹងអ្នកដែលបានបោះបង់ចោលទារិកានេះ។ «អ្នកដែលបានបោះបង់ទារិកានេះគឺដឹងច្បាស់ថា ក្មេងទើបកើតនេះអាចបាត់បង់ជីវិត»។
ក្រោយពីខាងមន្ទីរពេទ្យ Khao Phanom បញ្ចប់ការតាមដានសុខភាព ពួកគេនឹងប្រគល់ទារិកានេះឱ្យទៅសមត្ថកិច្ចខេត្ត Krabi។ ប៉ូលិសក្នុងតំបន់ឱ្យដឹងថា ទារិកានេះប្រហែលជាអាចត្រូវបាននាំទៅកាន់មណ្ឌលកុមារកំព្រា៕
