ក្រសួងការបរទេសអ៊ីរ៉ង់ បានឱ្យដឹងថា ឯកអគ្គរដ្ឋទូតរបស់ខ្លួនប្រចាំ ប្រទេសយេម៉ែន បានបាត់បង់ជីវិតដោយសារតែ ជំងឺកូវីដ-១៩ និងបានចោទប្រកាន់ប្រទេសមួយចំនួនថា បានបង្កការលំបាកក្នុងការនាំមន្ត្រីរូបនេះត្រលប់មកប្រទេស។
«Irloo បានលាចាកលោក បន្ទាប់ពីត្រូវបានបញ្ជូនត្រលប់មក ប្រទេសអ៊ីរ៉ង់ ក្នុងសភាពធ្ងន់ធ្ងរបំផុត ព្រោះតែការសហការយឺតយ៉ាវរបស់ប្រទេសមួយចំនួន» ក្រសួងការបរទេសអ៊ីរ៉ង់ ប្រកាសកាលពីថ្ងៃទី ២១ ធ្នូ ដូច្នេះ។
សារព័ត៌មាន Aljazeera បានរាយការណ៍ថា លោក Irloo ត្រូវបាននាំត្រលប់មកកាន់ ទីក្រុងតេហេរ៉ង់ កាលពីថ្ងៃទី ១៨ ខែធ្នូ បន្ទាប់ពី អ៊ីរ៉ង់ និងប្រទេសជាច្រើន បានដាក់សម្ពាធ បង្ខំឱ្យ អារ៉ាប៊ីសាអូឌីត ជាប្រទេសដែលកំពុងបិទខ្ទប់ដែនអាកាសរបស់ យេម៉ែន អនុញ្ញាតឱ្យយន្តហោះដឹកលោក Irloo ហោះមកកាន់ អ៊ីរ៉ង់។
សារព័ត៌មាន Wall Street Journal មុននោះ បានដកស្រង់សម្ដីក្រុមមន្ត្រីក្នុងតំបន់ ឱ្យដឹងថា អារ៉ាប៊ីសាអូឌីត បានស្នើដល់ក្រុមប្រដាប់អាវុធ Houthi ឱ្យដោះលែងទាហានមួយចំនួនរបស់ អារ៉ាប៊ីសាអូឌីត ដែលត្រូវក្រុមនេះចាប់ឃាត់ខ្លួន ដើម្បីដោះដូរជាមួយនឹងការអនុញ្ញាតឱ្យនាំឯកអគ្គរដ្ឋទូត Irloo ត្រលប់ទៅ អ៊ីរ៉ង់។
ក្រុមមន្ត្រីរបស់ អារ៉ាប៊ីសាអូឌីត និង សហរដ្ឋអាម៉េរិក យល់ថា អ៊ីរ៉ង់ ផ្គត់ផ្គង់កាំជ្រួចផ្លោង និងយន្តហោះគ្មានមនុស្សបើក (UAV) ដល់ក្រុម Houthi រួមនឹងការបណ្ដុះបណ្ដាល និងផ្ដល់ប្រឹក្សាដល់កងកម្លាំងនេះផងដែរ។ ក៏ប៉ុន្តែ ភាគីខាង អ៊ីរ៉ង់ បានបដិសេធការចោទប្រកាន់នេះ។
អ៊ីរ៉ង់ និង អារ៉ាប៊ីសាអូឌីត បានបើកការចរចាជាច្រើនលើកនៅក្នុងឆ្នាំនេះ ដោយមាន អ៊ីរ៉ាក់ ជាអ្នកសម្របសម្រួល ដើម្បីកាត់បន្ថយភាពតានតឹង ប៉ុន្តែ រហូតមកដល់បច្ចុប្បន្ន ពុំទាន់មាន «ផ្លែផ្កា» ល្អណាមួយនៅឡើយ៕
