មហាសេដ្ឋី Yusaku Maezawa រួមនឹងក្រុមហោះហើរ បានចុះចតនៅឯ កាហ្សាក់ស្ថាន (Kazakhstan) បន្ទាប់ពីការចំណាយពេលប្រមាណ ១២ ថ្ងៃ រស់នៅក្នុងទីអវកាស។
ស្ថាបនិកនៃក្រុមហ៊ុនលក់រាយសម្លៀកបំពាក់អនឡាញ ZOZO គឺ មហាសេដ្ឋី Yusaku Maezawa, ជំនួយការផ្នែកថតវីដេអូ Yozo Hirano រួមនឹងអ្នកអវកាស Alexander Misurkin នៃទីភ្នាក់ងារអវកាសរុស្ស៊ី Roscosmos បានត្រលប់មកកាន់ផែនដីវិញ ដោយប្រើយានអវកាស Soyuz MS-20។
ពួកគេបានចុះចតលើវាលស្មៅភាគអាគ្នេយ៍នៃទីរួមស្រុក Dzhezkazgan នៃ ប្រទេសកាហ្សាក់ស្ថាន កាលពីវេលាម៉ោង ១០ និង ១៣ នាទី ថ្ងៃទី ២០ ធ្នូ ២០២១ (ម៉ោងនៅ ភ្នំពេញ)។
Misurkin, Maezawa និង Hirano បានឡើងដល់ស្ថានីយអវកាសអន្តរជាតិ (ISS) កាលពីថ្ងៃទី ៨ ធ្នូ ក្រោយការធ្វើដំណើររយៈពេលប្រហែល ៦ ម៉ោង ដែលហោះហើរចេញពីមូលដ្ឋានបាញ់បង្ហោះយានអវកាស Baikonur នៃ ប្រទេសកាហ្សាក់ស្ថាន។
អ្នកទាំង ៣ ត្រូវបាននាំទៅកាន់ទីក្រុង Karaganda របស់ កាហ្សាក់ស្ថាន ដោយឧទ្ធម្ភាគចក្រ បន្ទាប់មកក៏ឡើងយន្តហោះទៅកាន់ Star City របស់ រុស្ស៊ី និងមជ្ឈមណ្ឌលហ្វឹកហាត់អ្នកអវកាស Gagarin។
