ភ្លៀងធ្លាក់ខ្លាំង បណ្ដាលឱ្យទឹកទន្លេកើនឡើងខ្ពស់ និងច្រាលចូលតំបន់ក្បែរខាង ធ្វើឱ្យតំបន់ទីក្រុងជាច្រើនត្រូវលិចលង់ នាំឱ្យមនុស្សរាប់ម៉ឺននាក់ត្រូវបានឈ្លៀសទៅកាន់ទីទួលសុវត្ថិភាព។
ជំនន់ទឹកភ្លៀងបានវាយប្រហាររដ្ឋទាំងឡាយរបស់ ប្រទេសម៉ាឡេស៊ី ធ្វើឱ្យមនុស្សជាង ៤១,០០០ នាក់ ត្រូវរត់ទៅកាន់ទីជម្រកសុវត្ថិភាព ក្នុងនោះ Selangor គឺជារដ្ឋដែលរងគ្រោះធ្ងន់ធ្ងរបំផុត។ យ៉ាងហោចណាស់ មានមនុស្សម្នាក់បានស្លាប់ និង ១០ នាក់ បានបាត់ខ្លួន នៅក្នុងគ្រោះធម្មជាតិលើកនេះ។
ម៉ាឡេស៊ី បានបញ្ចេញកងទ័ពទៅកាន់តំបន់រងគ្រោះដោយសារជំនន់ទឹកភ្លៀង ដើម្បីជួយសង្គ្រោះប្រជាជន។
នៅលើបណ្ដាញសង្គម គេឃើញមានករណីជនរងគ្រោះកំពុងស្រែកហៅឱ្យជួយ ដោយសារជាប់ក្នុងទឹកជំនន់។
គ្រោះធម្មជាតិនេះ ក៏បានបណ្ដាលឱ្យរថយន្តក្រុងនៅក្នុង និងជុំវិញរដ្ឋធានីកូឡាឡាំពួរ រួមនឹងរថភ្លើងច្រើនខ្សែដែលធ្វើដំណើរទៅកាន់ទីក្រុងកំពង់ផែ Klang ត្រូវបានផ្អាកជាបណ្ដោះអាសន្ន។
ម៉ាឡេស៊ី តែងតែរងគ្រោះដោយសារភ្លៀងនៅចុងឆ្នាំ ដែលបានបណ្ដាលឱ្យមានទឹកជំនន់ទ្រង់ទ្រាយធំកើតឡើង។
ប្រទេសនេះធ្លាប់បានរងគ្រោះទឹកជំនន់អាក្រក់បំផុតក្នុងអំឡុងរាប់ទសវត្សរ៍កាលពីឆ្នាំ ២០១៤ ដែលកាលណោះ បានធ្វើឱ្យមនុស្សជាង ១១៨,០០០ នាក់ ត្រូវចាកចេញពីផ្ទះសម្បែង៕
