វត្ថុអវកាសមួយចំនួននឹងហោះកាត់មុខផែនដី នៅក្នុងគន្លាតសុវត្ថិភាពក្នុងអំឡុងពេលចាប់ពីថ្ងៃទី ២៤ ដល់ ២៩ ធ្នូ ២០២១ ក្នុងនោះមានទាំងអាចម៍ផ្កាយ ១ ដុំ ដែលមានមុខកាត់ ២៦០ ម៉ែត្រផងដែរ។
អាចម៍ផ្កាយដំបូងដែលមានឈ្មោះថា 2016 TR54 នឹងហោះមកក្បែរផែនដីនៅថ្ងៃទី ២៤ ធ្នូ នេះបើតាមទីភ្នាក់ងារអវកាសអាម៉េរិក (NASA)។ 2016 TR54 នឹងហោះមកក្បែរផែនដីបំផុត នៅវេលាម៉ោង ១៣៖៣០ នាទី ថ្ងៃទី ២៤ ធ្នូ ម៉ោងនៅ ភ្នំពេញ ដោយមានចម្ងាយ ៦.៤ លានគីឡូម៉ែត្រ ពី ផែនដី ឆ្ងាយជាង ១៧ ដង ធៀបនឹងគន្លាតពី ព្រះចន្ទ មក ផែនដី។
អាចម៍ផ្កាយ 2016 TR54 ដែលមានមុខកាត់ប្រមាណពី ១០០ ទៅ ២៣០ ម៉ែត្រនេះ ហោះហើរក្នុងល្បឿន ៥៥,៨៤៤ គីឡូម៉ែត្រ/ម៉ោង។
អាចម៍ផ្កាយទី ២ មានឈ្មោះថា 2018 AH មានទំហំតូចបន្តិច ធៀបនឹង 2016 TR54 ដោយមានមុខកាត់ចាប់ពី ៨៤ ដល់ ១៩០ ម៉ែត្រ ហើយវានឹងហោះមកក្បែរផែនដី នៅចុងខែធ្នូ។ 2018 AH នឹងហោះមកក្បែរផែនដីបំផុតនៅវេលាម៉ោង ២១៖៤០ នាទី ថ្ងៃទី ២៧ ធ្នូ ក្នុងគម្លាត ជាង ១ លានគីឡូម៉ែត្រ ឆ្ងាយជាង ២ ដង ធៀបនឹងគម្លាតរវាង ផែនដី និង ព្រះចន្ទ។
អាចម៍ផ្កាយចុងក្រោយមានឈ្មោះថា 2017 AE3។ វានឹងហោះមកក្បែរ ផែនដី បំផុត នៅវេលាម៉ោង ៨៖៥៤ នាទី ថ្ងៃទី ២៩ ធ្នូ ក្នុងគម្លាត ៣ លានគីឡូម៉ែត្រ។ អាចម៍ផ្កាយនេះ ហោះហើរក្នុងល្បឿនប្រមាណ ៦៨,៥៥៨ គីឡូម៉ែត្រ/ម៉ោង ពោលគឺលឿនជាងអាចម៍ផ្កាយទាំង ២ ដុំខាងលើ៕