ប្រជាជនជាច្រើននាក់នៅក្នុងរដ្ឋ Tamil Nadu មានការភ្ញាក់ផ្អើលជាខ្លាំងនៅពេលបានឃើញឧទ្ធម្ភាគចក្រដឹកមន្ត្រីជាន់ខ្ពស់យោធារបស់ ឥណ្ឌា ហោះទៅបុកដើមឈើពេញមួយទំហឹង បណ្ដាលឱ្យឆេះយ៉ាងសន្ធោសន្ធៅ។
«ដំបូង ខ្ញុំឮសំឡេងផ្ទុះយ៉ាងធំ។ ពេលរត់ទៅមើល ទើបឃើញថា ឧទ្ធម្ភាគចក្រមួយគ្រឿងបានបុកដើមឈើ។ ហេតុការណ៍នេះបង្កើតបានជាដុំភ្លើងដ៏ធំ ហើយឧទ្ធម្ភាគចក្រក៏បន្តហោះទៅបុកដើមឈើមួយដើមផ្សេងទៀត។ ខ្ញុំឃើញមនុស្សពី ២ ទៅ ៣ នាក់ ស្ទុះចេញពីឧទ្ធម្ភាគចក្រ ខ្លួនពួកគេរលាកភ្លើងយ៉ាងធ្ងន់ធ្ងរ ហើយក៏ដួលទៅលើដី» ពលរដ្ឋម្នាក់នៅក្បែរកន្លែងកើតហេតុ រៀបរាប់ដូច្នេះ។
ពលរដ្ឋម្នាក់ទៀតនិយាយថា ក្នុងពេលមានហេតុការណ៍ ផ្ទៃមេឃងងឹត ប្រហែលជាដោយសារផ្សែងបាញ់ចេញពីឧទ្ធម្ភាគចក្រដែលបានធ្លាក់។ គាត់បានទៅដល់កន្លែងកើតហេតុ ហើយឃើញថា ឧទ្ធម្ភាគចក្រត្រូវដាំក្បាលចុះ និងកំពុងឆាបឆេះ។
«ខ្ញុំបានជួយដល់ក្រុមពន្លត់អគ្គិស័យ។ ក្រៅពីមនុស្សម្នាក់ អ្នកផ្សេងទៀតទំនងជាត្រូវបានរំដោះចេញមកក្រៅក្នុងស្ថានភាពបាត់បង់ជីវិត។ អ្នកដែលនៅរស់ ក៏ត្រូវបានបញ្ជូនទៅកាន់មន្ទីរពេទ្យជាបន្ទាន់» Prakash ដែលជាពលរដ្ឋម្នាក់នៅក្នុងភូមិ Burliyar បានរៀបរាប់អំពីស្ថានភាពនៃឧបទ្ទវហេតុដែលមានចម្ងាយប្រហែល ២០០ ម៉ែត្រ ពីផ្ទះរបស់គាត់។
ឧទ្ធម្ភាគចក្រប្រភេទ Mi-17V5 បានជួបគ្រោះថ្នាក់នៅពេលកំពុងហោះហើរពីមូលដ្ឋានទ័ពអាកាស Sulur ស្ថិតនៅក្នុងស្រុក Coimbatore ឆ្ពោះទៅកាន់ការិយាល័យការពារជាតិនៅក្នុងទីរួមស្រុក Wellington របស់ស្រុក Nilgiris។
គ្រោះថ្នាក់នេះបានបណ្ដាលឱ្យអគ្គមេបញ្ជាការកងទ័ពជាតិឥណ្ឌា លោក Bipin Rawat និងភរិយារបស់លោក រួមនឹងមន្ត្រីយោធា ១១ នាក់ផ្សេងទៀត បាត់បង់ជីវិត។
យោងតាមព័ត៌មានបឋម គ្រោះថ្នាក់ធ្លាក់ឧទ្ធម្ភាគចក្រនេះ កើតឡើងដោយសារមេឃចុះអ័ព្ទខ្លាំង និងកំពុងត្រូវបានបន្តស៊ើបអង្កេត។
