អាចម៍ផ្កាយមួយដុំដែលមានប្រវែងវែងជាងតួ Eiffel របស់ បារាំង និងមានផ្ទុកលោហធាតុក្នុងបរិមាណច្រើន នឹងហោះកាត់ក្បែរផែនដី ក្នុងល្បឿន ២៣,៧០០ គីឡូម៉ែត្រ/ម៉ោង នៅថ្ងៃទី ១១ ធ្នូ ខាងមុខ។
អាចម៍ផ្កាយមួយដុំដែលមានលទ្ធភាពបង្កគ្រោះថ្នាក់ដល់ផែនដី ដោយសារមានទំហំធំ នឹងហោះកាត់មុខពិភពផែនដីនៅសប្ដាហ៍ក្រោយ នេះបើតាមទីភ្នាក់ងារអវកាសអាម៉េរិក (NASA)។ អាចម៍ផ្កាយដែលត្រូវបានគេដាក់ឈ្មោះថា 4660 Nereus នេះ មានរូបរាងដូចទៅនឹងគ្រាប់ស៊ុត និងមានប្រវែងប្រហែល ៣៣០ ម៉ែត្រ។ តាមការគណនា វានឹងហោះចូលដល់គន្លងគោចររបស់ផែនដីក្នុងល្បឿន ២៣,៧០០ គីឡូម៉ែត្រ/ម៉ោង នៅថ្ងៃទី ១១ ខែធ្នូ។
ក្រុមតារាវិទូឱ្យដឹងថា 4660 Nereus នឹងគ្រាន់តែហោះកាត់ក្បែរផែនដី និងមិនបង្កការប៉ះទង្គិចនោះទេ។ ប៉ុន្តែ នេះគឺជាការហោះក្បែរផែនដីបំផុតរបស់អាចម៍ផ្កាយនេះ ក្នុងអំឡុង ២០ ឆ្នាំកន្លង។ វានឹងមកក្បែរផែនដីក្នុងរយៈចម្ងាយប្រហែល ៣.៨៦ លានគីឡូម៉ែត្រ ឆ្ងាយជាង ១០ ដង បើធៀបនឹងគម្លាតរវាងផែនដី និងព្រះចន្ទ។
អាចម៍ផ្កាយ 4660 Nereus នឹងហោះមក «ជួប» ផែនដីជាថ្មី នៅក្នុងខែមីនា ឆ្នាំ ២០៣១ និងខែវិច្ឆិកា ឆ្នាំ ២០៥។ ក្នុងខែកុម្ភៈ ឆ្នាំ ២០៦០ វានឹងហោះមកក្បែរផែនដីបំផុត ពោលគឺក្នុងរយៈចម្ងាយតែ ១.២ លានគីឡូម៉ែត្រ ឆ្ងាយជាង ៣ ដងប៉ុណ្ណោះ ធៀបនឹងចម្ងាយពីផែនដី ទៅព្រះចន្ទ៕
