(នេប៉ាល់)-អ្នកដំណើរនាំគ្នាជួយរុញយន្តហោះរបស់ក្រុមហ៊ុនអាកាសចរណ៍ Tara Air ដែលបានបែកកង់ បន្ទាប់ពីបានចុះចតលើព្រលានយន្តហោះ Bajura។
យន្តហោះ 9N AVE របស់ក្រុមហ៊ុនអាកាសចរណ៍ Tara Air បានបែកកង់កាលពីថ្ងៃទី ១ ធ្នូ និងធ្វើឱ្យស្ទះផ្លូវរត់។ វីដេអូដែលថតបានសកម្មភាព បង្ហាញថា អ្នកដំណើរប្រហែល ២០ នាក់ រួមនឹងក្រុមសន្តិសុខ បាននាំគ្នាជួយរុញយន្តហោះចេញពីផ្លូវរត់។ វីដេអូនេះ ក្រោយមកក៏ត្រូវបានគេចែករំលែកពេញបណ្ដាញសង្គម ជាមួយនឹងមតិ៖ «ប្រហែលមានតែនៅ នេប៉ាល់ ប៉ុណ្ណោះ»។
តំណាងរបស់ក្រុមហ៊ុនអាកាសចរណ៍ Yeti Airlines ដែលសហការជាមួយ Tara Air បានឱ្យដឹងថា គ្រានោះ ខាងអាកាសយានដ្ឋាន មិនទាន់មានឧបករណ៍សម្រាប់អូសយន្តហោះដែលបែកកង់ចេញពីផ្លូវរត់ ដូច្នេះហើយត្រូវពឹងអ្នកដំណើរឱ្យជួយរុញ។
យន្តហោះខាងលើ ក្រោយមកក៏ត្រូវបានយកចេញពីផ្លូវរត់ដោយសុវត្ថិភាព ជួយឱ្យយន្តហោះផ្សេងៗចុះចតបានស្រួល។ Yeti Airlines និយាយថា កង់យន្តហោះដែលបែកនោះ ត្រូវបានប្ដូរភ្លាមៗ ហើយវាដំណើរការដូចធម្មតា៕