បើសិនជាអាចម៍ផ្កាយនេះ ហោះមកបុកចំភពផែនដីមែន នោះវានឹងបង្កមហន្តរាយធ្ងន់ធ្ងរ គឺសាហាវជាគ្រាប់បែកនុយក្លេអែរទៅទៀត។
ពិភពផែនដីនៅតែបន្តទទួលរងការគំរាមកំហែងពីបណ្ដាដុំថ្មអវកាស ហើយក្នុងខែនេះនឹងមានអាចម៍ផ្កាយមួយដុំទៀត ហោះកាត់ផែនដី។ វាមានឈ្មោះថា ២០១៨ AH។
អាចម៍ផ្កាយមួយដុំនេះមានទំហំប្រហាក់ប្រហែលនឹងបូជនីយដ្ឋានវ៉ាស៊ីងតោន (Washington Monument) និងហោះកាត់មុខផែនដីនៅក្នុងខែធ្នូ នេះបើតាមប្រព័ន្ធតាមដានអាចម៍ផ្កាយរបស់អង្គការអវកាសអាម៉េរិក (NASA)។
NASA បានព្យាករថា បើសិនជាបុកចំផែនដី អាចម៍ផ្កាយនេះអាចបង្កមហន្តរាយធំជាងឆ្ងាយ ធៀបនឹងការផ្ទុះគ្រាប់បែកនុយក្លេអែរមួយគ្រាប់។ ប៉ុន្តែ រឿងនេះមិនអាចកើតឡើងឡើយ ព្រោះថា គន្លងគោចរបច្ចុប្បន្នរបស់វា នឹងធ្វើឱ្យវាមានគម្លាតពីផែនដីប្រមាណ ៤.៥ លានគីឡូម៉ែត្រ នៅពេលវាហោះមកក្បែរបំផុត។ រយៈចម្ងាយនេះស្មើនឹង ១២ ដង ធៀបនឹងរយៈចម្ងាយពីផែនដី ទៅព្រះចន្ទ។
យ៉ាងនេះក្ដី អាចម៍ផ្កាយនេះក៏ធ្លាប់បានហោះកាត់មុខផែនដីក្នុងរយៈចម្ងាយជិតផងដែរកាលពីអតីតកាល។ ឆ្នាំ ២០១៨ វាធ្លាប់ហោះមកក្បែរផែនដីក្នុងគម្លាតជិត ៣ សែនគីឡូម៉ែត្រ ដែលគម្លាតនេះជិតជាងរយៈចម្ងាយពីព្រះចន្ទ មកផែនដី៕
