ទីភ្នាក់ងារអវកាសអាម៉េរិក (NASA) បានឱ្យដឹងថា សូរ្យគ្រាសទាំងស្រុងតែមួយគត់ក្នុងឆ្នាំនេះនឹងកើតឡើងនៅក្នុងថ្ងៃទី ៤ ធ្នូ ប៉ុន្តែ គួរឱ្យស្ដាយ បាតុភូតនេះអាចត្រូវបានមើលឃើញតែនៅក្នុងតំបន់ប៉ូលខាងត្បូងប៉ុណ្ណោះ។
បាតុភូតសូរ្យគ្រាសនេះនឹងឡើងដល់ចំណុចកំពូលនៅវេលាម៉ោងប្រហែល ១៤៖៣៣ នាទី ថ្ងៃទី ៤ ធ្នូ (ម៉ោងនៅភ្នំពេញ) សម្រាប់អ្នករស់នៅក្បែរជាយផ្ទាំងទឹកកក Ronne នៅប៉ូលខាងត្បូង។ ប្រជាជនក្នុងតំបន់ខ្លះនៅប៉ូលខាងត្បូង អាចតាមដានព្រឹត្តិការណ៍សូរ្យគ្រាសមួយចំហៀង។
ព្រឹត្តិការណ៍សូរ្យគ្រាសទាំងស្រុងបន្ទាប់នឹងកើតឡើងនៅថ្ងៃទី ៨ មេសា ២០២៤ និងអាចមើលឃើញពីតំបន់ជាច្រើននៅ កាណាដា ម៉ិកស៊ិក និង សហរដ្ឋអាម៉េរិក។
បាតុភូតសូរ្យគ្រាសកើតឡើងនៅពេល ព្រះចន្ទគោចរដល់ចន្លោះផែនដី និងព្រះអាទិត្យ ពេលនោះ ស្រមោលរបស់ព្រះចន្ទគ្របដណ្ដើបលើផែនដី។ ក្នុងបាតុភូតសូរ្យគ្រាសទាំងស្រុង ទាំងផែនដី ព្រះចន្ទ និងព្រះអាទិត្យ ត្រូវតែស្ថិតនៅលើបន្ទាត់ត្រង់។ ព្រះអាទិត្យត្រូវបានបាំងដោយព្រះចន្ទ នៅពេលគេមើលពីផែនដី៕
