«សហរដ្ឋអាម៉េរិក មិនផ្លាស់ប្ដូរគោលជំហររបស់ខ្លួនស្ដីពី កោះតៃវ៉ាន់ មិនលើកទឹកចិត្តឱ្យកោះនេះប្រកាសឯករាជ្យនោះទេ» ប្រធានាធិបតីអាម៉េរិក លោក Joe Biden បានឱ្យដឹងដូច្នេះ បន្ទាប់ពីជំនួបកំពូលរវាងមេដឹកនាំចិន និងសហរដ្ឋអាម៉េរិក។
«យើងនឹងមិនប្ដូរផ្លាស់គោលនយោបាយ។ យើងមិនលើកទឹកចិត្តឱ្យប្រកាសឯករាជ្យ ប៉ុន្តែ លើកទឹកចិត្តឱ្យពួកគេធ្វើឱ្យបានត្រឹមត្រូវទៅតាមអ្វីដែលបានចែងនៅក្នុង «ច្បាប់ទំនាក់ទំនងជាមួយតៃវ៉ាន់»។ នោះគឺជាអ្វីដែលយើងកំពុងធ្វើ» លោក Joe Biden ឆ្លើយនឹងសំណួររបស់អ្នកយកព័ត៌មាន នៅក្នុងដំណើរទស្សនកិច្ចនៅ New Hampshire កាលពីថ្ងៃទី 16 វិច្ឆិកា។
ការថ្លែងនេះត្រូវបានធ្វើឡើងបន្ទាប់ពីជំនួបកំពូលតាមអនឡាញ រវាងប្រធានាធិបតីចិន Xi Jinping និងប្រធានាធិបតីសហរដ្ឋអាម៉េរិក Joe Biden។ នៅពេលត្រូវបានសួរថា ជំនួបនោះបានទទួលផ្លែផ្កាអ្វីខ្លះទាក់ទងនឹងបញ្ហា កោះតៃវ៉ាន់ លោក Biden ឆ្លើយថា បាន «និយាយច្បាស់» ហើយ អំពីការគាំទ្រច្បាប់ដែលកំពុងមានជាធរមាន ដែល សហរដ្ឋអាម៉េរិក អនុវត្តជាមួយ កោះតៃវ៉ាន់។
យោងតាម «ច្បាប់ទំនាក់ទំនងជាមួយកោះតៃវ៉ាន់» សហរដ្ឋអាម៉េរិក ចាត់ទុក តៃវ៉ាន់ ជាផ្នែកមួយរបស់ ចិនដីគោក ប៉ុន្តែ នៅតែរក្សាទំនាក់ទំនងវប្បធម៌ ពាណិជ្ជកម្ម និងយោធាជាមួយកោះនេះ រួមទាំងការលក់អាវុធផងដែរ។ ប៉ុន្តែ អាម៉េរិក គ្រាន់តែជួយកោះនេះ កសាងកម្លាំងការពារខ្លួន ដោយមិនសន្យាជួយការពារកោះនេះ ដើម្បីបញ្ចៀសការបង្កកំហឹងដល់ ចិនដីគោក។
កាលពីខែតុលា នៅពេលត្រូវបានសួរថា តើ សហរដ្ឋអាម៉េរិក នឹងចេញមុខជួយការពារ កោះតៃវ៉ាន់ ដែរទេ នៅពេលមានការវាយប្រហារពី កងទ័ពចិនដីគោក លោក Biden ឆ្លើយថា «ពិតណាស់ យើងមានការសន្យាដូច្នេះ»។ មុននោះ កាលពីខែសីហា ប្រធានាធិបតីអាម៉េរិក ក៏បានលើកឡើងដូចគ្នានេះដែរ។ នៅក្នុងករណីទាំងពីរនេះ ទីប្រឹក្សាសេតវិមាន ក្រោយមកក៏ត្រូវចេញមុខបកស្រាយថា សហរដ្ឋអាម៉េរិក មិនផ្លាស់ប្ដូរគោលនយោបាយស្ដីពី កោះតៃវ៉ាន់ នោះឡើយ។
បញ្ហាស្ដីពី កោះតៃវ៉ាន់ គឺជាប្រធានបទដែលត្រូវបានមេដឹកនាំអាម៉េរិក-ចិន លើកយកមកពិភាក្សាច្រើនជាងគេ នៅក្នុងជំនួបកំពូលដែលអូសបន្លាយពេលប្រហែល 3 ម៉ោង កាលពីថ្ងៃទី 15 វិច្ឆិកា។ ជំនួបកំពូលនេះក៏បានលើកឡើងអំពីបញ្ហា ច្រកសមុទ្រតៃវ៉ាន់ ឧបទ្វីបកូរ៉េ អាហ្វហ្គានីស្ថាន អ៊ីរ៉ង់ ទីផ្សារថាមពលសកល អាកាសធាតុ ពាណិជ្ជកម្ម ការពារជាតិ និងជំងឺរាតត្បាត COVID-19 ផងដែរ៕
