(កាណាដា)-កម្មករចំនួន 39 នាក់ កំពុងជាប់ក្នុងអណ្ដូងរ៉ែលោហធាតុនៅភាគខាងកើតនៃ ប្រទេសកាណាដា ក្រោយមានឧបទ្ទវហេតុមួយដែលបណ្ដាលឱ្យផ្លូវចេញ-ចូលត្រូវស្ទះមុននោះ 24 ម៉ោង។
Vale ជាក្រុមហ៊ុនគ្រប់គ្រងអណ្ដូងរ៉ែ Totten នៅក្នុងខេត្ត Ontario របស់ កាណាដា បានឱ្យដឹងថា ពុំមានកម្មករណាម្នាក់រងរបួងនៅក្នុងហេតុការណ៍កាលពីថ្ងៃទី 26 កញ្ញានោះទេ ហើយពួកគេនៅតែទទួលបានអាហារ និងទឹក។ «ក្រុមសង្គ្រោះបានទៅដល់កន្លែងរបស់កម្មករ និងកំពុងនាំពួកគេឡើងមកលើ តាមរយៈប្រព័ន្ធជណ្ដើរទីពីរ» Vale បានប្រាប់ដូច្នេះ។ ក្រុមហ៊ុននេះសង្ឃឹមថា នឹងសង្គ្រោះកម្មករបានទាំងអស់នៅយប់ថ្ងៃទី 27 កញ្ញា (ព្រឹកថ្ងៃទី 28 កញ្ញា នៅ ភ្នំពេញ)។
Danica Pagnutti ជាអ្នកនាំពាក្យរបស់ក្រុមហ៊ុន Vale និយាយថា មិនមានអ្នកណាម្នាក់ស្ថិតនៅត្រង់ច្រកចេញ-ចូលធំនោះទេ នៅពេលផ្នែកមួយនៃឧបករណ៍ធុនធ្ងន់ ប៉ះទង្គិចនឹងជណ្ដើរយន្តរបស់ប្រព័ន្ធដឹកជញ្ជូន។
សកម្មភាពនៅឯអណ្ដូងរ៉ែ Totten ក្នុងទីក្រុង Greater Sudbury នៃខេត្ត Ontario ត្រូវបានផ្អាកដំណើរការចាប់ពីថ្ងៃទី 27 កញ្ញា ហើយ Vale ឱ្យដឹងថា នឹងវាយតម្លៃស្ថានការណ៍ មុនពេលដំណើរការឡើងវិញ។ អណ្ដូងរ៉ែ Totten បានបិទទ្វារកាលពីឆ្នាំ 1972 ប៉ុន្តែ ក្រុមហ៊ុន Vale បានបើកទ្វារឡើងវិញចាប់ពីឆ្នាំ 2014។ នៅក្នុងរយៈពេល 6 ខែដើមឆ្នាំនេះ ធាតុនីកែល ប្រហែល 3,600 តោន ត្រូវបានទាញយកពីអណ្ដូងរ៉ែ Totten៕