ប្រភពព័ត៌មានពី តាលីបង់ បានប្រកាសថា ក្រុមនេះបានចូលកាន់កាប់ជ្រលងភ្នំ Panjshir ដែលជាបន្ទាយចុងក្រោយរបស់ រណសិរ្យតស៊ូជាតិ អាហ្វហ្គានីស្ថាន ប៉ុន្តែ ក្រុមប្រឆាំងនឹង តាលីបង់ បានច្រានចោលការប្រកាសនេះ។
ប្រភពព័ត៌មានចំនួនបី ពី តាលីបង់ បាននិយាយថា កងកម្លាំងនេះ កាលពីថ្ងៃទី 3 កញ្ញា បានគ្រប់គ្រងជ្រលងភ្នំ Panjshir ដែលស្ថិតនៅភាគខាងជើងរដ្ឋធានីកាប៊ុល បញ្ចប់ដំណាក់កាលវាយកាន់កាប់ប្រទេស អាហ្វហ្គានីស្ថាន ទាំងស្រុង។
«ដោយព្រះគុណពីព្រះអាល់ឡោះដ៏ខ្ពង់ខ្ពស់ យើងកំពុងគ្រប់គ្រង អាហ្វហ្គានីស្ថាន ទាំងស្រុង។ ក្រុមជនបង្កភាពវឹកវរ ត្រូវបានកម្ចាត់ ហើយ Panjshir បច្ចុប្បន្ន ស្ថិតក្រោមបញ្ជារបស់យើង» មេបញ្ជាការម្នាក់របស់ តាលីបង់ និយាយដូច្នេះ។
គណនី Facebook នានា កំពុងចែករំលែកព័ត៌មានអំពីបរាជ័យរបស់ រណសិរ្សតស៊ូជាតិ អាហ្វហ្គានីស្ថាន (NRFA) នៅ Panjshir ខណៈដែលស្នូរកំភ្លើងអបអរជ័យជំនះរបស់ តាលីបង់ ក៏កំពុងលាន់កងរំពងនៅពាសពេញរដ្ឋធានីកាប៊ុល។
ក៏ប៉ុន្តែ អតីតអនុប្រធានាធិបតី អាហ្វហ្គានីស្ថាន លោក Amrullah Saleh ដែលជាមេដឹកនាំកងទ័ព NRFA មួយរូប បានឱ្យដឹងថា កងកម្លាំងរបស់ខ្លួន មិនបានចុះចាញ់នោះឡើយ។
«ពិតហើយដែលថា យើងកំពុងស្ថិតក្នុងស្ថានភាពលំបាក។ យើងកំពុងត្រូវបាន តាលីបង់ វាយដណ្ដើមទឹកដី។ ប៉ុន្តែ យើងនៅតែប្រឹងប្រែងការពារខ្លួន និងតតាំងប្រឆាំងតបត» លោក Saleh ថ្លែងដូច្នេះ។
មេបញ្ជាការមួយចំនួនផ្សេងទៀតរបស់ក្រុម NRFA ក៏បានច្រានចោលព័ត៌មានដែលថា ជ្រលងភ្នំ Panjshir បានធ្លាក់ក្នុងដៃ តាលីបង់។ «ព័ត៌មានអំពីការប្រយុទ្ធដណ្ដើមគ្រប់គ្រង Panjshir កំពុងត្រូវបានចែករំលែកនៅលើប្រព័ន្ធផ្សព្វផ្សាយនៅ ប៉ាគីស្ថាន។ នោះគឺជារឿងកុហក» Ahmad Massoud មេដឹកនាំសង្គ្រាមប្រឆាំង តាលីបង់ នៅ Panjshir អះអាងដូច្នេះ។
មុននោះ មានព័ត៌មានផ្សាយថា មានមនុស្សស្លាប់ និងរបួសជាច្រើននាក់ បន្ទាប់ពីមានការប្រយុទ្ធគ្នានៅជ្រលងភ្នំ Panjshir។ Panjshir គឺជាតំបន់ដែលត្រូវបានកងកម្លាំងប្រឆាំង តាលីបង់ NRFA យកមកធ្វើជាបន្ទាយ និងទឹកដីចុងក្រោយសម្រាប់តតាំងនឹង តាលីបង់។ កំពូលភ្នំទាំងឡាយដែលព័ទ្ធជុំវិញជ្រលងភ្នំ Panjshir គឺឧបសគ្គធំដែលរារាំងរាល់កម្លាំងទាំងឡាយណាដែលចង់វាយដណ្ដើមកាន់កាប់តំបន់នេះ៕
