ក្រុម តាលីបង់ បានប្រកាសថា លទ្ធិប្រជាធិបតេយ្យពុំមានមូលដ្ឋានគ្រឹះនៅ អាហ្វហ្គានីស្ថាន នោះទេ ហើយប្រទេសនេះ អាចត្រូវបានគ្រប់គ្រងដោយក្រុមប្រឹក្សា តាលីបង់។
«នឹងពុំមានលទ្ធិប្រជាធិបតេយ្យណាមួយនោះឡើយ ពីព្រោះថា វាគ្មានមូលដ្ឋានគ្រឹះអ្វីទាំងអស់នៅក្នុងប្រទេសរបស់យើង។ យើងនឹងមិនពិភាក្សាអំពីប្រភេទរបបនយោបាយដែលនឹងត្រូវអនុវត្តនៅ អាហ្វហ្គានីស្ថាន ដោយសារវាច្បាស់លាស់អស់ទៅហើយ។ នោះគឺជាច្បាប់សាសនាអ៊ីស្លាម សារី (Sharia)» អ្នកនាំពាក្យ តាលីបង់ លោក Waheedullah Hashimi និយាយកាលពីថ្ងៃទី 18 សីហា ដោយចង់បញ្ជាក់ថា តាលីបង់ នឹងប្រើប្រាស់ច្បាប់សាសនាអ៊ីស្លាម។
យោងតាមអ្នកនាំពាក្យរូបនេះ អាហ្វហ្គានីស្ថាន អាចត្រូវបានដឹកនាំដោយក្រុមប្រឹក្សា តាលីបង់ និងមេបញ្ជាការកំពូល Haibatullah Akhundzada ដែលមានតួនាទីដូចទៅនឹងប្រធានាធិបតី។
រចនាសម្ព័ន្ធនៃអំណាចដែល Hashimi បានថ្លែងនេះ មានចំនុចប្រហាក់ប្រហែលនឹងវិធីដែល តាលីបង់ បានប្រើប្រាស់សម្រាប់គ្រប់គ្រង អាហ្វហ្គានីស្ថាន ក្នុងអំឡុងពីឆ្នាំ 1996 ដល់ឆ្នាំ 2001។ កាលណោះ មេបញ្ជាការកំពូល Mulllah Omar មិនបង្ហាញវត្តមាន ដោយទុកឱ្យក្រុមប្រឹក្សាមួយជាអ្នកដឹកនាំប្រទេស។
ក្រុមមេដឹកនាំ តាលីបង់ នឹងបើកកិច្ចប្រជុំមួយនៅចុងសប្ដាហ៍នេះ ដើម្បីពិភាក្សាគ្នា និងកំណត់យករបបដឹកនាំប្រទេស។ ក្នុងរយៈពេលច្រើនថ្ងៃមកនេះ ពិភពលោកបានមើលឃើញថា សមាជិក ក៏ដូចជាអ្នកនាំពាក្យជាច្រើនរូបរបស់ តាលីបង់ កំពុងតែបន្ទន់ឥរិយាបថខ្លាំង បើធៀបនឹងកាលពីជាង 20 ឆ្នាំមុន។ យ៉ាងនេះក្ដី ការលើកឡើងរបស់ Waheedullah Hashimi ហាក់មិនបានចូលរួមបន្ធូរបន្ថយការព្រួយបារម្ភរបស់ប្រជាជន ពិសេសគឺស្ត្រី ចំពោះរបប តាលីបង់ នោះទេ។
ចាប់តាំងពី សហរដ្ឋអាមេរិក ចាប់ផ្ដើមដកទ័ពចេញពី អាហ្វហ្គានីស្ថាន កាលពីខែឧសភា តាលីបង់ ក៏បានវាយលុក និងសម្រុកចូលកាន់កាប់រដ្ឋធានីកាប៊ុល បានសម្រេច កាលពីថ្ងៃទី 15 សីហា ដោយពុំមានការវាយប្រហារតបតពីកម្លាំងរដ្ឋាភិបាល។ ជនជាតិអាហ្វហ្គានីស្ថាន រាប់ពាន់នាក់ បានរត់ទៅកាន់ព្រលានយន្តហោះ ដើម្បីស្វែងរកវិធីចាកចេញពីប្រទេស៕
