មន្ត្រីជាន់ខ្ពស់មួយរូបរបស់កងជីវពលអ៊ីស្លាម ហាម៉ាស នៃចលនាប៉ាលេស្ទីន បានព្យាករថា ប៉ុន្មានថ្ងៃខាងមុខនេះនឹងមានការឈប់បាញ់ ខណៈដែលសង្គ្រាមរវាង អ៊ីស្រាអែល និង ប៉ាលេស្ទីន នៅតំបន់ ហ្គាហ្សា ឈានដល់ថ្ងៃទី11។
«ខ្ញុំយល់ថា ការខិតខំដើម្បីឈានដល់ការបង្កើតបទឈប់បាញ់នឹងទទួលបានជោគជ័យ» Moussa Abu Marzouk អ្នកនយោបាយមួយរបស់ក្រុម ហាម៉ាស បានប្រាប់ទូរទស្សន៍ al-Mayadeen របស់ លីបង់ នាថ្ងៃទី20 ខែឧសភានេះ។ «ខ្ញុំសង្ឈឹមថា នឹងសម្រេចបាននូវបទបញ្ជាឈប់បាញ់ នៅមួយ ឬពីរថ្ងៃទៀត ដោយយោងទៅលើការឯកភាពរបស់ភាគីទាំងសងខាង»។
ប្រធានាធិបតីអាមេរិក លោក Joe Biden កាលពីថ្ងៃទី19 ឧសភា បានអំពាវនាវឱ្យនាយករដ្ឋមន្ត្រី អ៊ីស្រាអែល Benjamin Netanyahu រកវិធីដើម្បីបន្ថយភាពតានតឹង សំដៅឈានដល់ការឈប់បាញ់។ ប្រភពព័ត៌មានសន្តិសុខពីប្រទេស អេហ្ស៊ីប បានឱ្យដឹងថា ភាគីទាំងពីរ ជាមូលដ្ឋាន គឺបានយល់ស្របថា នឹងមានការឈប់បាញ់ ដោយសារតែមានជំនួយពីអន្តរការី ប៉ុន្តែ កំពុងចរចាលម្អិតនៅឡើយ។
ទូរទស្សន៍ Al Jazeera ដែលមានទីស្នាក់ការនៅប្រទេសកាតា បានរាយការណ៍ថា Tor Wennesland ប្រេសិតពិសេសរបស់អង្គការសហប្រជាជាតិ ទទួលបន្ទុកលើបញ្ហាសន្តិភាពនៅមជ្ឈិមបូព៌ា កំពុងជួបពិភាក្សាជាមួយនឹងមេដឹកនាំ Ismail Haniyeh របស់ក្រុម ហាម៉ាស នៅប្រទេសកាតា។
ក៏ប៉ុន្តែ ក្ដីសង្ឃឹមដែលថា នឹងឈានដល់កិច្ចព្រមព្រៀងឈប់បាញ់ កំពុងតែជួបឧបសគ្គធំ នៅពេលដែលការប្រយុទ្ធគ្នារវាង អ៊ីស្រាអែល និងក្រុម ហាម៉ាស នៅតែបន្តកើតមាន។ អ៊ីស្រាអែល បានវាយប្រហារតាមផ្លូវអាកាសជាង 10លើក ទៅលើតំបន់ ហ្គាហ្សា កាលពីរំលងអធ្រាត្រ ខណៈ ក្រុម ហាម៉ាស ឱ្យដឹងថា មានមនុស្ស 4នាក់ បានរងរបួសក្នុងការវាយប្រហាររបស់ អ៊ីស្រាអែល នៅទីរួមស្រុក Khan Younis ភាគខាងត្បូង ហ្គាហ្សា។
វេលាទៀបភ្លឺ នៃថ្ងៃទី20 ខែឧសភា សំឡេងស៊ីរ៉ែនប្រកាសអាសន្នដែលជាសញ្ញាណប្រាប់ថា រ៉ុក្កែត កំពុងហោះចូលទឹកដី បានបន្លឺឡើងពាសពេញទីរួមស្រុក Beersheba នៅភាគខាងត្បូងនៃប្រទេស អ៊ីស្រាអែល និងតំបន់ជាប់ព្រំដែនជាមួយ ហ្គាហ្សា។ ប៉ុន្តែ មិនទាន់មានរបាយការណ៍អំពីករណីស្លាប់ ឬរបួស និងការខូចខាតនៅឡើយ។
ចាប់ពីមានការវាយប្រយុទ្ធគ្នាតាំងពីថ្ងៃទី10 ខែឧសភា ក្រុមមន្ត្រីសុខាភិបាល ប៉ាលេស្ទីន ឱ្យដឹងថា មនុស្សយ៉ាងតិច 228នាក់បានស្លាប់ នៅក្នុងការវាយប្រហារពី អ៊ីស្រាអែល។ ចំណែក អ៊ីស្រាអែល ក៏បានឱ្យដឹងថា ពលរដ្ឋរបស់ខ្លួនចំនួន 12នាក់បានស្លាប់ នៅក្នុងការវាយប្រហារពីរ៉ុក្កែត របស់កងជីវពល ហាម៉ាស។
សូមរំលឹកថា ក្រុម ហាម៉ាស បានបាញ់រ៉ុក្កែតទៅលើទឹកដីអ៊ីស្រាអែល កាលពីថ្ងៃទី10 ខែឧសភា ដើម្បីសងនឹងសកម្មភាពដែលពួកគេហៅថាជា ទង្វើរំលោភសិទ្ធិមនុស្សរបស់ អ៊ីស្រាអែល ទៅលើជនជាតិប៉ាលេស្ទីន ដែលកំពុងរស់នៅក្នុងតំបន់ យេរូសាឡឹម នៅក្នុងរដូវបុណ្យ Ramadan របស់សាសនិកអ៊ីស្លាម និងការព្រមានអំពីការបណ្ដេញចេញជនជាតិ ប៉ាលេស្ទីន ពីតំបន់ យេរូសាឡឹមខាងកើត។
ភាពតានតឹងរវាងគូភាគីនេះ ក៏បានរួមចំណែកបង្កើតឱ្យមានអំពើហិង្សារវាងជនជាតិជ្វីហ្វ និងជនជាតិអារ៉ាប់ នៅក្នុងប្រទេសអ៊ីស្រាអែល។ ការប្រយុទ្ធគ្នាក៏បានរាលដាលដល់ព្រំដែនអ៊ីស្រាអែល-លីបង់ បណ្ដាលឱ្យមានអំពើហិង្សានៅតំបន់ West Bank ដែលត្រូវអ៊ីស្រាអែលកាន់កាប់។
ភាគីអ៊ីស្រាអែល ឱ្យដឹងថា កាលពីថ្ងៃទី19 ខែឧសភា រ៉ុក្កែតចំនួន 4គ្រាប់ ត្រូវបានបាញ់ចេញពីប្រទេសលីបង់ ចូលទឹកដីរបស់អ៊ីស្រាអែល ជាលើកទីបី រាប់ចាប់ពីមានការប្រយុទ្ធគ្នានៅ ហ្គាហ្សា។ អ៊ីស្រាអែល ក៏បានឆ្លើយតបដោយគ្រាប់កាំភ្លើងធំ៕
ប្រភព៖ Reuters
ប្រែសម្រួល៖ បុត្រា