ដោយសារតែចេញទៅក្រៅផ្ទះបន្ទាប់ពីមានបំរាមគោចរ កំលោះវ័យ28ឆ្នាំម្នាក់នៅប្រទេសហ្វីលីពីន ត្រូវកងសន្តិសុខក្នុងតំបន់ចាប់ខ្លួន និងដាក់ពិន័យឱ្យអង្គុយចុះ-ក្រោកឈរ ចំនួន 300ដង។
សារព័ត៌មាន Rappler បានរាយការណ៍ថា កំលោះ Darren Manaog Peñaredondo បានចេញពីផ្ទះទៅទិញទឹកផឹកនៅវេលាក្រោយម៉ោង18យប់ ដូច្នេះក៏បានរំលោភលើបំរាមគោចររបស់ទីក្រុង General Trias នៃខេត្ត Cavite ដែលបំរាមនេះត្រូវអនុវត្តចាប់ពីម៉ោង 18យប់ ដល់ម៉ោង 5ព្រឹកនៃថ្ងៃបន្ទាប់ ដើម្បីទប់ស្កាត់វីរុសCovid-19។
មិត្តម្នាក់របស់ Peñaredondo ឈ្មោះ Reichelyn Balce បាននិយាយកាលពីថ្ងៃទី1មេសាថា គាត់រួមនឹងបុរសម្នាក់ផ្សេងទៀតបានល្មើសនឹងបំរាមគោចរ ទើបត្រូវចាប់ខ្លួនបញ្ជូនទៅកាន់មជ្ឈមណ្ឌលពាណិជ្ជកម្ម Malabon ដែលស្ថិតនៅទល់មុខសាលាក្រុង។ ក្រោយមក ពួកគេក៏ត្រូវបានបង្គាប់ឱ្យធ្វើកាយវិការអង្គុយចុះ-ក្រោកឈរចំនួន 100ដង។
យោងតាមការឱ្យដឹងពីសាច់ញាតិរបស់កំលោះខាងលើ សមត្ថកិច្ចបាននិយាយថា អ្នកទាំងពីរត្រូវតែធ្វើកាយវិការនេះសាជាថ្មី បើសិនពួកគេធ្វើមិនបានស្របគ្នា ឬឈប់កណ្ដាលទី។ ជាលទ្ធផល អ្នកទាំងពីរត្រូវធ្វើកាយវិការនេះរហូតដល់ប្រហែល 300ដង។
Peñaredondo ត្រលប់មកផ្ទះនៅវេលាម៉ោង 8ព្រឹក ថ្ងៃទី4 ខែមេសា ហើយគាត់ស្ទើរតែកម្រើកដៃជើងលែងរួច ព្រោះតែបាក់កម្លាំងជ្រុល។ Peñaredondo បានប្រាប់ Balce ថា ខ្លួនបានដួលជាច្រើនលើកនៅក្នុងពេលទទួលពិន័យ។ «ពេញមួយថ្ងៃនោះ គាត់ពិបាកដើរខ្លាំងណាស់ ដោយគ្រាន់តែអាចវារនៅលើដីប៉ុណ្ណោះ» Balce បានបង្ហោះនៅលើ Facebook ដូច្នេះ។
ចូលដល់ថ្ងៃទី 3មេសា Peñaredondo ចាប់ផ្ដើមប្រកាច់ និងគាំងបេះដូង។ កំលោះវ័យ 28ឆ្នាំរូបនេះបានដឹងខ្លួនឡើងវិញក្នុងរយៈពេលខ្លី ហើយក៏បានបាត់បង់ជីវិតនៅវេលាម៉ោង10ព្រឹក ក្នុងថ្ងៃដដែល។
ក៏ប៉ុន្តែ ស្នងការប៉ូលិសក្រុង General Trias លោក Marlo Nillo Solero បានឱ្យដឹងថា ពួកគេមិនដាក់ពិន័យបែបនេះចំពោះជនដែលល្មើសនឹងបំរាមគោចរទាក់ទងនឹង Covid-19 នោះទេ។ ផ្ទុយទៅវិញ អ្នកល្មើសគ្រាន់តែត្រូវស្ដាប់ការអប់រំពីសមត្ថកិច្ច។ ចំណែកអភិបាលក្រុង គឺលោក Antonio Ferrer បានបញ្ជាក់ថា សមត្ថកិច្ចបានចាប់ផ្ដើមបើកការស៊ើបអង្កេតលើបញ្ហាខាងលើនេះហើយ។
រដ្ឋាភិបាលហ្វីលីពីន បានពន្យារសុពលភាពនៃបំរាមគោចរទូទាំងប្រទេសក្នុងរយៈពេលមួយសប្ដាហ៍បន្ថែមទៀត ដោយរាប់ចាប់ពីថ្ងៃទី 5មេសា បន្ទាប់ពីករណីឆ្លង Covid-19 បានកើនឡើងជាថ្មី។ គិតមកដល់បច្ចុប្បន្ន ស្ថានភាពCovid-19 នៅប្រទេសនេះ មានភាពធ្ងន់ធ្ងរជាងគេលំដាប់ទីពីរនៅក្នុងតំបន់អាស៊ីអាគ្នេយ៍ បន្ទាប់ឥណ្ឌូនេស៊ី ដោយបានរកឃើញអ្នកវិជ្ជមាននឹងCovid-19 សរុបជាង 795,000នាក់ ក្នុងនោះមាន 13,425នាក់បានស្លាប់៕
ប្រភព៖ Guardian
ប្រែសម្រួល៖ បុត្រា
