តួលេខអ្នកស្លាប់ដោយសារទឹកជំនន់ និងបាក់ដីនៅប្រទេសឥណ្ឌូនេស៊ី និងទីម័រខាងកើត កាលពីសប្ដាហ៍មុន បានកើនឡើងដល់ 157នាក់ ខណៈដែលមនុស្សរាប់សិបនាក់ផ្សេងទៀតកំពុងបាត់ខ្លួន។
ស្ថាប័នគ្រប់គ្រងគ្រោះធម្មជាតិឥណ្ឌូនេស៊ី នាថ្ងៃនេះបានប្រកាសឱ្យដឹងថា បានរកឃើញមនុស្សចំនួន 130នាក់បានស្លាប់នៅក្នុងតំបន់ប្រជុំកោះនៅក្បែរប្រទេសទីម័រខាងកើត ជាប្រទេសដែលបានរកឃើញអ្នកស្លាប់ចំនួន 27នាក់ ដោយសារទឹកជំនន់ និងបាក់ដីកាលពីចុងសប្ដាហ៍មុននេះដែរ។ កងកម្លាំងជួយសង្គ្រោះនៅឥណ្ឌូនេស៊ី កំពុងតែរត់ប្រណាំងជាមួយនឹងពេលវវេលា នៅក្នុងការស្វែងរកជនរងគ្រោះជាង 70នាក់ ដែលកំពុងបាត់ខ្លួន។
ភ្លៀងធ្លាក់ខ្លាំងដោយសារតែព្យុះ Seroja បង្កឱ្យមានទឹកជំនន់ និងបាក់ដី ចាប់ពីថ្ងៃទី 3មេសា បានបំផ្លិចបំផ្លាញតំបន់ជាច្រើនរបស់ឥណ្ឌូនេស៊ី នាំឱ្យមនុស្សរាប់ពាន់នាក់ត្រូវជម្លៀសទៅកាន់ទីសុវត្ថិភាព។
មន្ត្រីឥណ្ឌូនេស៊ីបានឱ្យដឹងថា ផ្ទះសម្បែករាប់ពាន់ខ្នង មន្ទីរពេទ្យជាច្រើនកន្លែង រួមនឹងសាលារៀន ហេដ្ឋារចនាសម្ព័ន្ធជាច្រើន ត្រូវរងការបំផ្លិចបំផ្លាញ ព្រោះតែទឹកជំនន់ និងការបាក់ដី។ អ្នកនាំពាក្យរបស់ស្ថាប័នគ្រប់គ្រងគ្រោះធម្មជាតិឥណ្ឌូនសេស៊ី Raditya Djati បានបញ្ជាក់ថា ស្ថានភាពអាកាសធាតុអាក្រក់នឹងនៅតែបន្តកើតមានក្នុងរយៈពេលជាច្រើនថ្ងៃតទៅមុខទៀត។
នៅឯទីម័រខាងកើតវិញ រដ្ឋធានី Dili ក៏ទទួលរងគ្រោះទឹកជំនន់យ៉ាងធ្ងន់ធ្ងរ បង្កការខូចខាតដល់ផ្លូវថ្នល់ និងលិចទាំងវិមានប្រធានាធិបតីផងដែរ។ ឧបនាយករដ្ឋមន្ត្រីទីម័រខាងកើត Jose Reis បានឱ្យដឹងថា នេះគឺជាគ្រោះធម្មជាតិអាក្រក់បំផុតដែលមិនធ្លាប់មាននៅតំបន់នេះក្នុងអំឡុង40ឆ្នាំកន្លងមក៕
ប្រភព៖ AFP/Reuters
ប្រៃសម្រួល៖ បុត្រា
