របបសឹកនៃប្រទេសមីយ៉ានម៉ា បានដោះលែងក្រុមបាតុករប្រឆាំងរដ្ឋប្រហារជាង 600នាក់នៅក្នុងថ្ងៃទី 24មីនានេះ ខណៈដែលក្រុមសកម្មជនអំពាវនាវឱ្យ «ធ្វើកូដកម្មស្ងាត់ស្ងៀម» នៅទីក្រុង Yangon។
«យើងបានដោះលែងបុរសចំនួន 360នាក់ និងស្ត្រីចំនួន 268នាក់ ពីពន្ធនាគារ Insein នៅថ្ងៃនេះ» មន្ត្រីជាន់ខ្ពស់ម្នាក់របស់ពន្ធនាគារ បានប្រាប់ដូច្នេះ។
ក្រុមសាក្សី ដែលរួមមានទាំងមេធាវីរបស់បាតុករដែលត្រូវបានចាប់ខ្លួន បានឱ្យដឹងថា រថយន្តដែលដឹកពេញដោយមនុស្សជាច្រើនគ្រឿងបានចាកចេញពីពន្ធនាគារ Insein នៅទីក្រុង Yangon ជាទីក្រុងធំលំដាប់ទីមួយនៅមីយ៉ានម៉ា នៅវេលាម៉ោងប្រហែល 10ព្រឹក។
មេធាវីបាននិយាយថា៖ «អ្នកដែលត្រូវបានដោះលែងទាំងអស់ សុទ្ធតែត្រូវបានចាប់ខ្លួននៅក្នុងបាតុកម្មមុននោះ ដែលត្រូវបានចាប់នៅពេលយប់ ឬក្រុមមនុស្សដែលចេញក្រៅផ្ទះដើម្បីទៅទិញរបស់របរ (រំលោភលើបទបញ្ជាអាជ្ញាសឹក)»។ មេធាវីបន្ថែមថា រថយន្តប្រហែល 16គ្រឿងបានចាកចេញពីពន្ធនាគារ។ «ពួកគេត្រូវបានដឹកទៅកាន់ប៉ុស្តិ៍ប៉ូលិសនានាដែលជាប់ទាក់ទង មុននឹងបានត្រលប់ទៅផ្ទះ»។
បច្ចុប្បន្ន របបសឹកភូមាមិនបានបញ្ជាក់អំពីតួលេខអ្នកទោសដែលត្រូវបានដោះលែងនៅឡើយ។ អ្នកនាំពាក្យរបស់កងទ័ព មិនបានលើកទូរស័ព្ទរបស់អ្នកយកព័ត៌មាន។
សមាគមជួយអ្នកទោសនយោបាយ (AAPP) បានឱ្យដឹងថាមនុស្សប្រមាណ 2,600នាក់ ត្រូវបានចាប់ខ្លួន និងយ៉ាងតិច 275នាក់បានស្លាប់ រាប់ចាប់ពីមានបាតុកម្មប្រឆាំងរដ្ឋប្រហារនៅមីយ៉ានម៉ា។ ក្រុមសកម្មជនយល់ថា តួលេខជាក់ស្ដែងអាចខ្ពស់ជាងនេះឆ្ងាយណាស់។
កូដកម្មមួយបានកើតឡើងមួយថ្ងៃក្រោយពីបុគ្គលិករបស់ក្រុមរៀបចំពិធីបុណ្យសពនៅ Mandalay ដែលជាទីក្រុងធំលំដាប់ទីពីរនៅមីយ៉ានម៉ា បានឱ្យដឹងថា ក្មេងស្រីអាយុ 7ឆ្នាំម្នាក់ ត្រូវបានកងកម្លាំងសន្តិសុខបាញ់សម្លាប់ និងបានក្លាយជាជនរងគ្រោះដែលមានអាយុទាបបំផុតនៅក្នុងវិបត្តិនយោបាយនៃប្រទេសមីយ៉ានម៉ានាបច្ចុប្បន្ន។ ភាគីខាងកងទ័ពក៏មិនទាន់មានការអធិប្បាយអ្វីមួយអំពីហេតុការណ៍នេះនៅឡើយ៕
ប្រភព៖ AFP, Reuters
ប្រែសម្រួល៖ បុត្រា
