ក្រុមហ៊ុន Nanogen បានសាកល្បងវ៉ាក់សាំង Covid-19 នៅលើសត្វកណ្ដុរ និងស្វា ដោយជោគជ័យកាលពីខែមិថុនា ឆ្នាំ2020 បន្ទាប់មក ក្រុមហ៊ុននេះនឹងសហការជាមួយមន្ទីរស្រាវជ្រាវវេជ្ជសាស្ត្រយោធា ដើម្បីជ្រើសរើសអ្នកស្ម័គ្រចិត្តចូលរួមក្នុងការធ្វើតេស្តវ៉ាក់សាំង Covid-19 របស់វៀតណាម ក្នុងដំណាក់កាលទីមួយ នៅថ្ងៃទី 10 ខែធ្នូខាងមុខ។
បច្ចុប្បន្ន វៀតណាមមានក្រុមហ៊ុនចំនួន 3 ដែលបានដំណើរការផលិតវ៉ាក់សាំង Covid-19 សម្រាប់ការសាកល្បងនៅក្នុងមន្ទីរពិសោធន៍ នោះគឺក្រុមហ៊ុន IVAC, Vabiotech និង Nanogen។ ក្រុមហ៊ុនទាំងនេះ កំពុងស្ថិតក្នុងដំណាក់កាលវាយតម្លៃអំពីសុវត្ថិភាព និងប្រសិទ្ធភាពរបស់វ៉ាក់សាំងនៅលើសត្វ។ ដោយឡែក ក្រុមហ៊ុន Nanogen បានឆ្លងផុតដំណាក់កាលខាងលើ និងបានត្រៀមខ្លួនជាស្រេចសម្រាប់ការប្រើប្រាស់សាកល្បងនៅលើមនុស្សដំណាក់កាលទីមួយ។
ស្ថាបនិក និងជានាយកក្រុមហ៊ុន Nanogen លោក Ho Nhan បានឱ្យដឹងថា ក្រុមហ៊ុននេះបានចាប់ផ្ដើមស្រាវជ្រាវ និងអភិវឌ្ឍវ៉ាក់សាំង Covid-19 តាំងពីដើមខែមិនា ឆ្នាំ2020 ក្នុងគ្រាដែលវីរុសនេះកំពុងឆ្លងរាលដាលនៅប្រទេសចិន។ ខែឧសភា2020 ក្រសួងវិទ្យាសាស្ត្រនិងបច្ចេកវិទ្យា បានប្រគល់ភារកិច្ចក្នុងការស្រាវជ្រាវវ៉ាក់សាំងប្រឆាំង Covid-19 មកឱ្យ Nanogen ជាផ្លូវការ។
ថ្ងៃទី 15 ខែឧសភា ក្រសួងខាងលើបានបន្តប្រគល់កិច្ចការអភិវឌ្ឍផ្នែកផលិតវ៉ាក់សាំង Covid-19 ដោយបច្ចេកវិទ្យាប្រូតេអ៊ីនផ្សំដើម្បីបង្កើតប្លាកែតដូចវីរុស និងប្លាកែតណាណូ ទៅឱ្យក្រុមហ៊ុនខាងលើ។ ថ្ងៃទី 21ឧសភា ប្រធានបទស្រាវជ្រាវវ៉ាក់សាំង Covid-19 របស់ក្រុមហ៊ុន Nanogen ទទួលបានការអនុម័តយល់ព្រមឱ្យដំណើរការពីក្រសួងវិទ្យាសាស្ត្រនិងបច្ចេកវិទ្យាវៀតណាម។
![វៀតណាមអភិវឌ្ឍវ៉ាក់សាំងប្រឆាំង Covid-19 ដល់ដំណាក់កាលណាហើយ?](https://i0.wp.com/www.lareine.com.kh/wp-content/uploads/2020/12/output-onlinejpgtools-2020-12-09T154158.452.jpg?resize=696%2C465&ssl=1)
លោក Ho Nhan បញ្ជាក់ថា ក្រុមហ៊ុនរបស់លោក បានវិនិយោគជាង 200ពាន់លានដុង (8,662,600 ដុល្លារអាមេរិក) សម្រាប់ពង្រីករោងចក្រចំនួន3 ទិញវត្ថុធាតុដើម និងប្រព័ន្ធផលិតវ៉ាក់សាំង។ ក្រុមហ៊ុន Nanogen ឱ្យដឹងថា របាយការណ៍វាយតម្លៃអំពីប្រសិទ្ធភាព បង្ហាញថា វ៉ាក់សាំងរបស់ក្រុមហ៊ុននេះ ទទួលបានលទ្ធផលល្អក្នុងការប្រឆាំងនឹង Covid-19។ ដោយយោងទៅលើលទ្ធផលនេះ Nanogen ក៏បានធ្វើលិខិតស្នាមរួចរាល់ហើយ សម្រាប់បញ្ជូនឡើងទៅកាន់ក្រសួងសុខាភិបាល ដើម្បីសុំការអនុញ្ញាតបន្តដំណាក់កាលបន្ទាប់។
តំណាងរបស់ Nanogen និយាយថា វ៉ាក់សាំងរបស់វៀតណាមនឹងមានតម្លៃមិនលើសពី 500,000 ដុង (21.5 ដុល្លារអាមេរិក) នៅក្នុងមួយម្ជុល (ដូស) នោះទេ នៅពេលត្រូវបានបញ្ចេញលក់ក្នុងទីផ្សារ៕