ក្រសួងសុខាភិបាលកម្ពុជា នារសៀលថ្ងៃទី 1ធ្នូនេះ បានចេញសេចក្ដីប្រកាសព័ត៌មានមួយ ឱ្យដឹងថា ក្រសួងបានរកឃើញថា មានផលិតផលបំប៉នផ្លូវភេទបុរសមួយចំនួនត្រូវបានផ្សព្វផ្សាយលក់នៅលើបណ្ដាញសង្គម Facebook ដោយមិនមានការអនុញ្ញាតត្រឹមត្រូវពីក្រសួងសុខាភិបាល។
ក្រសួងសុខាភិបាលកម្ពុជាបានសង្កេតឃើញ និងជូនដំណឹងថា គណនី Facebook ឈ្មោះ M-Shop, ពិភព បុរសពិត, ពិភពក្ដីសុខបុរស, ZoZo បង្កើនថាមពល, ZO-ខ្លាំងពិត, Zozo-ហាងបុរស, Xoxo plus man, Bro ManTher និងគណនីឈ្មោះ Zozo swiss កំពុងតែផ្សាយលក់ផលិតផលបំប៉នផ្លូវភេទបុរសដែលមានឈ្មោះថា ZOZO និង XOXO ដោយមិនមានលេខបញ្ជិកាពីក្រសួងសុខាភិបាល រាប់ចាប់ពីថ្ងៃទី វិច្ឆិកា2020។
ដូច្នេះ ក្រសួងក៏តម្រូវឱ្យម្ចាស់គណនីខាងលើបញ្ឈប់សកម្មភាពលក់ផលិតផលដែលមានឈ្មោះថា ZOZO និង XOXO ជាបន្ទាន់ ហើយថាក្រសួងនឹងមានវិធានការតឹងរ៉ឹងទៅតាមច្បាប់ចំពោះម្ចាស់គណនីខាងលើ។
ដោយយោងទៅតាមច្បាប់ស្ដីអំពីការគ្រប់គ្រងឱសថ រួមនឹងច្បាប់ដែលពាក់ព័ន្ធ រាល់ឱសថ ឬផលិតផលដែលមានគុណភាពស្រដៀងនឹងឱសថ ត្រូវតែមានលេខបញ្ជិកាពីក្រសួងសុខាភិបាល។ ក្រសួងបានអំពាវនាវដល់សាធារណជនដែលជាអ្នកប្រើប្រាស់ ឱ្យមានការពិនិត្យត្រឹមត្រូវមុននឹងសម្រេចចិត្តទិញផលិតអ្វីមួយ។
សូមបញ្ជាក់ថា ឱសថ ឬផលិតផលបំប៉នសុខភាពគឺជាកាំបិតមុខពីរ ហើយពួកវាក៏អាចជារបស់ក្លែងក្លាយក៏ថាបាន បើសិនជាមានលេខបញ្ជិកាត្រឹមត្រូវពីក្រសួងសុខាភិបាល។ ដូច្នេះ ដើម្បីការពារសុវត្ថិភាពសុខភាព អ្នកប្រើប្រាស់ចាំបាច់ត្រូវតែស្គាល់ថា ឱសថ ឬថ្នាំបំប៉នដែលនឹងទិញយកមកប្រើប្រាស់នោះ គឺជារបស់ពិត ឬក្លែងក្លាយ ចៀសវាងការប្រើប្រាស់ផលិតផលខុសច្បាប់ដែលអាចនាំឱ្យប៉ះពាល់ដល់សុខភាព។ ដើម្បីច្បាស់អំពីប្រការនេះ ក្រសួងបានបញ្ជាក់ថា “ឱសថដែលស្របច្បាប់គឺមានលក្ខណដូចតទៅ៖ ទីមួយគឺ ផ្នែកខាងលើមានឈ្មោះគ្រឹះស្ថានអាហរ័ណ នីហរ័ណឱសថ និងទីពីរគឺ ផ្នែកខាងក្រោមមានលេខបញ្ជិកាដូចគំរូដែលមានភ្ជាប់មកជាមួយ”៕
