ក្រៅពីកាកសរសៃអាហារដែលមាននៅក្នុងបន្លែផ្លែឈើដែលមនុស្សជាច្រើនព្យាយាមទទួលទានឱ្យបានច្រើនៗ ដែលវានឹងជួយលើការធ្វើការងាររបស់ប្រព័ន្ធបន្ទោបង់ កាត់បន្ថយការប្រថុយប្រថាននឹងអាការចុកឆ្អល់ពោះហើយនោះ វានៅជួយកាត់បន្ថយការប្រថុយប្រថាននឹងការកើតរោគផ្សេងៗ តាំងពីរោគមហារីកពោះវៀនធំ ទឹកនោមផ្អែមប្រភេទ2 រហូតទៅដល់រោគសរសៃឈាមបេះដូងបានទៀតផង ដូច្នេះហើយទើបកាកសរសៃអាហារគឺជាសារធាតុចាំបាច់មួយចំពោះរាងកាយ។
តែសំណួរក៏គឺ តើយើងទទួលទានអាហារដែលមានជាតិកាកសរសៃបានគ្រប់គ្រាន់ហើយឬនៅ?
“កាកសរសៃអាហារ”ញ៉ាំច្រើនប៉ុនណាទើបល្អចំពោះរាងកាយ?
ក្រសួងកសិកម្មរបស់សហរដ្ឋអាមេរិកបានណែនាំថា យើងគួរទទួលទានអាហារដែលមានកាកសរសៃអាហារប្រមាណ 25ក្រាមសម្រាប់មនុស្សស្រី 38ក្រាមសម្រាប់មនុស្សប្រុស(អាយុមិនលើស 50ឆ្នាំ) ចំណែកឯមនុស្សចាស់ដែលមានអាយុច្រើនជាង 50ឆ្នាំឡើងទៅ គួរទទួលទានអាហារដែលមានជាតិកាកសរសៃ 21 – 30ក្រាមក្នុង 1ថ្ងៃ។
យើងនឹងដឹងពីបរិមាណរបស់កាកសរសៃអាហារដែលយើងទទួលទានចូលទៅបានដោយការមើលនៅលើតារាងភោជនាហាដែលមានបង្ហាញនៅលើស្លាករបស់ផលិតផលនោះ ដោយព្យាយាមជ្រើសយកអាហារណាដែលមានជាតិកាកសរសៃអាហារច្រើនជាង ក្នុងករណីដែលមានផលិតផលស្រដៀងៗគ្នាច្រើន និងសូមឱ្យមានការសប្បាយចិត្តចុះថា ជាតិកាកសរសៃអាហារនេះ រឹតតែទទួលទាន រឹតតែល្អ លើកលែងតែក្នុងករណីរបស់មនុស្សចាស់ដែលអាចនឹងមិនគួរទទួលទានច្រើនពេកឡើយ។
វិធីបង្កើនកាកសរសៃអាហារនៅក្នុងពេលបាយក្នុង 1ថ្ងៃៗ
- ចាប់ផ្ដើមថ្ងៃថ្មីដោយអាហារដែលពោរពេញទៅដោយជាតិកាកសរសៃអាហារ ដូចជា អាហារស៊ីរៀលដែលដាក់ផ្លែឈើស្រស់។
- ដាក់បន្លែ និងសណ្ដែកទៅក្នុងស៊ុប ឬសម្លដែលញ៉ាំ។
- ដាក់សណ្ដែក និងធញ្ញជាតិផ្សេងៗចូលទៅក្នុងយ៉ាអួ(ទឹកដោះគោជូរ)។
- ញ៉ាំបន្លែផ្លែឈើជំនួសនំ ឬអាហារពេលទំនេរ(ចម្អាប)ដូចជា មើមការ៉ុត ប្រូខូលី សណ្ដែកកួរ ឬផ្កាខាត់ណា។ល។
- ជ្រើសរើសញ៉ាំបន្លែផ្លែឈើស្រស់ ជាជាងតំណាប់ ឬបន្លែផ្លែឈើជ្រក់ត្រាំ។
សម្រាប់អ្នកដែលមិនសូវបានទទួលទានអាហារដែលមានជាតិកាកសរសៃច្រើននោះ យើងណែនាំឱ្យបន្ថែមជាតិកាកសរសៃអាហារនៅក្នុងពេលបាយម្ដងៗ ម្ដងបន្តិចៗ កុំសម្រុកញ៉ាំតែម្ដងច្រើនៗ កុំភ្លេចញ៉ាំទឹកឱ្យបានច្រើនឡើង និងបើមានបញ្ហាជាមួយប្រព័ន្ធបន្ទោបង់យូរមកហើយនោះ គួរទៅជួបគ្រូពេទ្យដើម្បីរិះរកវិធីព្យាបាលឱ្យបានត្រឹមត្រូវ៕
