ក្រសួងសុខាភិបាលកម្ពុជា បានប្រកាសនាព្រឹកថ្ងៃទី10សីហានេះថា បានរកឃើញអ្នកផ្ទុកវីរុសCOVID-19 ចំនួន3នាក់បន្ថែមទៀត ដែលអ្នកជំងឺទាំងនេះគឺជាជនជាតិខ្មែរ។
យោងតាមគេហទំព័ររបស់ក្រសួងសុខាភិបាលកម្ពុជា អ្នកមានផ្ទុកវីរុសCOVID-19 ខាងលើនេះសុទ្ធតែជាបុរស និងជាពលរដ្ឋនៅក្នុងខេត្តត្បូងឃ្មុំ។
ដូច្នេះ គិតមកដល់ពេលនេះ កម្ពុជាបានរកឃើញអ្នកជំងឺCOVID-19 សរុបឡើងដល់251នាក់។ ក្នុងនោះមាន32នាក់កំពុងទទួលការព្យាបាលនៅមន្ទីរពេទ្យ និង219នាក់បានជាសះស្បើយ។
នៅទូទាំងពិភពលោក បច្ចុប្បន្នបានរកឃើញអ្នកឆ្លងវីរុសCOVID-19 សរុប20,022,265នាក់ ខណៈតួលេខនៃអ្នកបានស្លាប់ដោយសារវីរុសនេះបានឡើងដល់733,971នាក់ ចំណែកអ្នកជំងឺបានជាសះស្បើយមានចំនួន12,897,799នាក់៕
