រដ្ឋាភិបាលសហរដ្ឋអាមេរិក លើកទឹកចិត្តឱ្យបណ្ដារដ្ឋ ប្រញាប់បើកទ្វារសេដ្ឋកិច្ចឡើងវិញដើម្បីកុំឱ្យវិស័យនេះទទួលរងផលប៉ះពាល់ធ្ងន់ធ្ងរបន្ថែមទៀត។
យោងតាមស្ថិតិនៅលើគេហទំព័រ Worldometers ក្នុងអំឡុង24ម៉ោងចុងក្រោយនេះ ចំនួនអ្នកស្លាប់ដោយសារ COVID-19 នៅសហរដ្ឋអាមេរិកមានចំនួនជាង1,600នាក់ ធ្វើឱ្យតួលេខអ្នកស្លាប់សរុបរបស់ប្រទេសនេះឡើងដល់ជាង78,500នាក់។ តួលេខនៃអ្នកជំងឺកូរ៉ូណានេះក៏កើនជាង27,400នាក់ នាំឱ្យតួលេខនៃអ្នកជំងឺCOVID-19សរុបឡើងដល់ជាង1.32លាននាក់។
បើទោះជាស្ថិតិនៃអ្នកជំងឺថ្មី និងអ្នកស្លាប់ថ្មីចេះតែកើនឡើងខ្ពស់ពីមួយថ្ងៃទៅមួយថ្ងៃយ៉ាងណាក៏ដោយ បណ្ដារដ្ឋនៅអាមេរិក នៅតែបន្តបើកទ្វារសេដ្ឋកិច្ចឡើងវិញ ដើម្បីលើកស្ទួយខឿនសេដ្ឋកិច្ចប្រទេសជាតិក្នុងគ្រាដែលពលរដ្ឋរាប់ម៉ឺននាក់បានបាត់បង់ការងារ។ ប្រធានាធិបតី Donald Trump នៅដើមសប្ដាហ៍នេះបានថ្លែងថា សហរដ្ឋអាមេរិកត្រូវការបើកដំណើរការម៉ាស៊ីនសេដ្ឋកិច្ចឡើងវិញឱ្យបានឆាប់រហ័ស បើទោះជាលោកបានទទួលស្គាល់ថា ការបន្ធូរបន្ថយបម្រាមគោចរនឹងនាំឱ្យមានមនុស្សជាច្រើនត្រូវឆ្លងវីរុស និងស្លាប់បន្ថែមទៀតក៏ដោយ។
ឆ្លើយតបនឹងកិច្ចសម្ភាសជាមួយ Bloomberg កាលពីម្សិលមិញ ប្រធានឧត្តមក្រុមប្រឹក្សាសេដ្ឋកិច្ចជាតិនៃសហរដ្ឋអាមេរិក (United States National Economic Council) លោក Larry Kudlow ថ្លែងថា សហរដ្ឋអាមេរិកនឹងមិនបិទទ្វារសេដ្ឋកិច្ចជាលើកទីពីរនោះឡើយ សូម្បីតែក្នុងកាលៈទេសៈដែលវីរុសនេះផ្ទុះឆ្លងខ្លាំងសាជាថ្មី។
យោងតាមតួលេខរបស់ក្រសួងការងារសហរដ្ឋអាមេរិកដែលបានប្រកាសកាលពីម្សិលមិញ ពលរដ្ឋអាមេរិកាំងចំនួន20.5លាននាក់បានបាត់បង់ការងារនៅក្នុងខែមេសា បណ្ដាលឱ្យអត្រាបាត់បង់ការងារនៅប្រទេសនេះឡើងដល់14.7% ខណៈដែលក្នុងខែមីនាមានត្រឹមតែ4.4%។ នេះគឺជាអត្រាបាត់បង់ការងារខ្ពស់បំផុតនៅសហរដ្ឋអាមេរិក រាប់ចាប់ពីសម័យមហាវិបត្តិសេដ្ឋកិច្ចក្នុងទសវត្សរ៍ឆ្នាំ1930។ COVID-19 បានកម្ទេចលទ្ធផលនៃការងារនៅសហរដ្ឋអាមេរិកដែលទទួលបានក្នុងអំឡុង1ទសវត្សរ៍កន្លងមកនេះ៕
ប្រភព៖ សារព័ត៌មានបរទេស
