ទីភ្នាក់ងារសារព័ត៌មាន AP បានរាយការណ៍ពីរឿងរ៉ាវខាងក្រោយរូបភាពដ៏គួរឱ្យរំភើបចិត្តនៅក្នុងបន្ទប់វះកាត់ នៅពេលដែលស្វាមី-ភរិយាកំពុងផ្ដល់កម្លាំងចិត្តគ្នាទៅវិញទៅមកឆ្លងកាត់របាំងមុខការពារមេរោគកូរ៉ូណា ក្រោមស្ថានការណ៍តានតឹងពីមេរោគរាតត្បាតកូវីដ-19។
បេន ខេយើរ និងមិនឌី ប្រុក ស្វាមី-ភរិយាជនជាតិអាមេរិកាំង ដែលសុទ្ធតែជាគ្រូពេទ្យជំនាញផ្នែកថ្នាំសណ្ដំក្នុងបន្ទប់វះកាត់ សម្លឹងកែវភ្នែកគ្នាទៅវិញទៅមកឆ្លងកាត់កញ្ចក់របាំងមុខការពារមេរោគ និងសម្លៀកបំពាក់ឈុតការពារមេរោគ តែក៏នៅតែមិនអាចរារាំងអារម្មណ៍ព្រួយបារម្ភពីគ្នាបានឡើយ ធ្វើឱ្យមិត្តរួមការងាររំភើបចិត្តរហូតដល់ទាញទូរស័ព្ទដៃមកថតយករូបភាពដ៏គួរឱ្យរំជួលចិត្តនេះ យកមកផូស្តនៅក្នុងប្រព័ន្ធបណ្ដាញសង្គម។
នៅពេលក្រោយមក រូបភាពនេះបានទទួលការចែករំលែកនៅក្នុងបណ្ដាញសង្គមអនឡាញយ៉ាងទូលំទូលាយ ព្រោះវាក្លាយជាកម្លាំងជំរុញចិត្តដល់មនុស្សទូទាំងពិភពលោក…។
ខេយើរ វ័យ 46ឆ្នាំ បាននិយាយថា មនុស្សទាំងអស់នាំគ្នានិយាយពីរូបភាពនោះ ព្រោះយើងកំពុងដើរឈានរំលងរឿងដ៏គួរឱ្យភ័យខ្លាចមួយជាមួយគ្នា ហើយវាជានិមិត្តសញ្ញា នៃសេចក្ដីសង្ឃឹម និងសេចក្ដីស្រឡាញ់។
ចំណែក ប្រុក វ័យ 38ឆ្នាំ បានឱ្យដឹងថា ពួកគេទាំង 2នាក់ស្រឡាញ់គ្នាណាស់ ធ្វើការងារជាមួយគ្នា និងគាំទ្រ ផ្ដល់កម្លាំងចិត្តគ្នាទៅវិញទៅមកជានិច្ច មិនមែនដោយសារតែ បេនជាស្វាមីប៉ុណ្ណោះទេ តែក្នុងឋានៈជាមិត្តមនុស្សដូចគ្នាទៀតផង។
![រូបភាពក្នុងថ្ងៃរៀបការរបស់អ្នកទាំង2 នៅឯទីក្រុងឆាលស្តុន រដ្ឋសៅថ៍ ឃែរ៉ូឡៃណា](https://i0.wp.com/www.lareine.com.kh/wp-content/uploads/2020/04/photo2.jpg?resize=696%2C696&ssl=1)
ទាំង 2នាក់រស់នៅក្នុងផ្ទះ នៅឯរដ្ឋហ្វ្ល៉រីដា សហរដ្ឋអាមេរិក ធ្វើការនៅកន្លែងជាមួយគ្នា រួមភារកិច្ចជាមួយគ្នា និងត្រូវកៀកស្មាគ្នាទទួលបន្ទុកតួនាទីដ៏សែនប្រថុយប្រថានក្នុងការស៊កបញ្ជូនបំពង់ជួយដកដង្ហើមឱ្យអ្នកជំងឺដែលត្រូវវះកាត់ ដែលអ្នកជំងឺភាគច្រើន ជាអ្នកជំងឺកូវីដ-19 តែទាំង 2នាក់មិនដែលរួញរាក្នុងការធ្វើជាគ្រូពេទ្យស្ម័គ្រចិត្តនៅក្នុងមន្ទីរពេទ្យ ថេមប៉ា ជេនើរ៉ល ឡើយ៕
![រូបភាពដក់ជាប់ក្នុងចិត្ត ស្វាមី-ភរិយាសម្លឹងភ្នែកគ្នា៖ “យើងនឹងឆ្លងផុតវិបត្តិកូវីដទៅជាមួយគ្នា...”](https://i0.wp.com/www.lareine.com.kh/wp-content/uploads/2020/04/photo4.jpg?resize=522%2C696&ssl=1)
ប្រភព៖ សារព័ត៌មានបរទេស