នៅក្នុងថ្ងៃនេះ ទស្សនាវដ្ដី ឡារ៉ែន សូមជម្រាបជូននូវអត្ថបទអំពីសុខភាពនៃដំណេករបស់អ្នកវិញម្តង។ ក្រៅពីការសម្រាកឱ្យបានគ្រប់គ្រាន់ ទៀងទាត់តាមពេលវេលាឱ្យបានយ៉ាងហោច8ម៉ោងហើយនោះ ការរៀបចំរៀបបែបផែននៃការគេងឱ្យបានត្រឹមត្រូវក៏ជារឿងមួយដែលអ្នកគួរយកចិត្តទុកដាក់ផងដែរ ព្រោះវាអាចហុចផលល្អដល់សុខភាពរាងកាយរបស់អ្នក។ តើលំនាំនៃការគេងផ្អៀងខ្លួនទៅខាងឆ្វេងបានហុចផលអ្វីខ្លះសម្រាប់ស្ត្រី និងបុរស? តោះសូមតាមដានទាំងអស់គ្នាជាមួយនឹងអត្ថបទខាងក្រោមនេះ៖
1. សម្រួលដល់ប្រព័ន្ធរំលាយអាហារ
ដោយសារតែក្រពះ និងលំពែងស្ថិតនៅខាងឆ្វេងនៃរាងកាយ ខណៈដែលអ្នកគេងលក់ដោយបែរខ្លួនមកខាងឆ្វេងដូចគ្នានោះ បណ្ដាលឱ្យក្រពះ និងលំពែងធ្វើការរំលាយអាហារបានយ៉ាងល្អប្រសើរដូចគ្នា និងល្អជាងមុនទៅទៀត។ វាក៏បានធ្វើឱ្យអាហារដែលចូលទៅក្នុងក្រពះរំលាយបានយ៉ាងងាយស្រួល និងបញ្ចេញអង់ស៊ីមទៅក្នុងលំពែងបានល្អប្រសើរថែមទៀតផង។ ក្រៅពីនោះ វាជួយសម្រួលដល់ការបញ្ចេញចោលនូវកាកសំណល់មិនល្អចេញទៅក្នុងពោះវៀនធំ បានយ៉ាងងាយស្រួលផងដែរ ដែលហុចផលល្អសម្រាប់ការបន្ទោរបង់នាពេលព្រឹក។
2. សុខភាពបេះដូងល្អប្រសើរ
បេះដូងស្ថិតនៅខាងឆ្វេងនៃរាងកាយរបស់អ្នក ដូច្នេះហើយប្រសិនបើចង់ឱ្យខ្លួនអ្នកគេងលក់ស្រួល អ្នកគួរតែគេងផ្អៀងខ្លួនមកខាងឆ្វេង ដើម្បីជំរុញលំហូរនៃគ្រាប់ឈាមចូលទៅក្នុងបេះដូងបានយ៉ាងលឿន។ ទង្វើនេះ គឺពិតជាស័ក្ដិសមចំពោះការការពារជំងឺបេះដូង ដែលជួយសម្រួលដល់បេះដូងមិនឱ្យធ្វើការធ្ងន់លើសពីធម្មតា។
3. ប្រសើរចំពោះស្ត្រីមានគភ៌
អ្នកជំនាញបានធ្វើការណែនាំដល់ស្ត្រីមានគភ៌ឱ្យប្រើពេលវេលាឱ្យបានច្រើនបំផុត តាមដែលអាចធ្វើទៅបាន ក្នុងការគេងផ្អៀងមកខាងឆ្វេង។ ដោយសារតែការគេងបែរមកខាងឆ្វេង វាជួយសម្រួលដល់កម្លាំងសង្កត់ទៅខាងក្រោយ និងជួយឱ្យការហូររបស់ឈាមទៅកាន់ស្បូន និងទារកនៅក្នុងផ្ទៃបានយ៉ាងល្អប្រសើរថែមទៀតផង។ ក្រៅពីនេះ វាជួយបន្ថយសម្ពាធនៃការរំញ័រឆ្អឹងខ្នង និងធ្វើឱ្យអ្នកមានអារម្មណ៍គេងលក់ស្រួលជាងមុន។ ម្យ៉ាងទៀត វាជួយបញ្ជូនអាហារទៅកាន់ទារកនៅក្នុងផ្ទៃបានយ៉ាងលឿនផងដែរ។ ដូច្នេះហើយការគេងផ្អៀងមកខាងឆ្វេងជួយឱ្យស្ត្រីមានគភ៌សម្រាន្ដលក់យ៉ាងស្រួលខ្លួន។
4. ការពារការគេងស្រម៉ុក
ការទម្លាប់គេងផ្អៀងមកខាងឆ្វេង អាចជួយសម្រួលឱ្យអ្នកឈប់គេងស្រម៉ុកបាន។ ដោយសារតែការគេងបែរមកខាងឆ្វេងធ្វើឱ្យបំពង់ករបស់អ្នកមិនត្បៀត ហើយចំហផ្លូវដង្ហើមបានធំ ដែលងាយស្រួលក្នុងការដកដង្ហើមខណៈពេលអ្នកដែលគេងលក់។ ដូច្នេះអ្នកគួរដឹងថា កាលដែលអ្នកគេងដោយភាពងាយស្រួលទៅតាមឥរិយាបទរាល់ថ្ងៃរបស់អ្នកនេះ គឺធ្វើឱ្យអ្នកគេងស្រម៉ុកដោយមិនដឹងខ្លួន ព្រោះថាខណៈពេលគេងអ្នកពិបាកក្នុងការដកដង្ហើម។
5. ទម្លាប់គេងផ្អៀងខាងឆ្វេងធ្វើឱ្យគេងលក់ស្រួល និងមានសុខភាពល្អ
ខណៈដែលអ្នកបានដឹងពីគុណប្រយោជន៍នៃការគេងផ្អៀងមកខាងឆ្វេងហើយនោះ សូមលោកអ្នកគិតពិចារណាឡើងវិញ ហើយសូមធ្វើការកែប្រែទម្លាប់របស់អ្នកពីការគេងផ្អៀងទៅខាងស្ដាំ ប្ដូរមកគេងផ្អៀងទៅខាងឆ្វេងវិញ នោះវានឹងធ្វើឱ្យអ្នកគេងលក់ស្រួល បំបាត់ភាពតានតឹង បំបាត់អារម្មណ៍រវើរវាយ បំបាត់ការគេងស្រម៉ុក តែជួយឱ្យអ្នកគេងលក់ស្រួលយ៉ាងស្កប់ស្កល់ ព្រមទាំងហុចផលល្អដល់សុខភាពរបស់អស់អ្នកទៀតផង៕
