ភាពស្រស់ស្អាត ក្មេងខ្ចី អាចមើលដឹងភ្លាមៗតាមរយៈរូបរាងកាយផ្នែកខាងក្រៅរបស់អ្នក នៅពេលយកមកប្រៀបធៀបជាមួយនឹងអាយុរបស់អ្នក ហេតុនេះហើយបានជានារីៗភាគច្រើន ដែលមានអារម្មណ៍ថាវ័យរបស់ខ្លួនចេះតែជ្រេរទៅមុខ តែងមានការបារម្ភថា ដំណើរចាកឆ្ងាយនៃភាពក្មេងស្អាតដែលធ្លាប់នៅជាមួយនឹងមកដល់នាថ្ងៃណាមួយ។ ដោយហេតុថា គ្មានអ្នកណាម្នាក់អាចដាក់កំណត់បានទេថា ភាពស្រស់ស្អាតនៅក្នុងអំឡុងវ័យដែលកំពុងពេញស្អាតនឹងអាចស្ថិតនៅជាមួយអ្នកបានយូរប៉ុណ្ណា? ដូច្នេះហើយបានជាម្នាក់ៗតែងតែខិតខំស្វែងរកស្ទើរគ្រប់មធ្យោបាយ ដើម្បីចាប់ចងភាពក្មេងស្អាតឱ្យនៅជាមួយខ្លួនឱ្យបានកាន់តែយូរ។ មកសាកល្បងអនុវត្តតាមវិធីតាមបែបសាមញ្ញខាងក្រោម នោះលោកអ្នកនឹងទទួលបាននូវភាពស្រស់ស្អាតក្មេងជាងវ័យជាមិនខាន។
គិតបែបក្មេង
មានការអះអាងមួយថា ការគិតបែបក្មេង និងសម្តែងចេញនូវសកម្មភាពដូចក្មេង (មិនមែនសម្តៅដល់គំនិត ឬ សកម្មភាពដូចកូនក្មេងតូចៗ ប៉ុន្តែជាវ័យមួយដែលក្មេងជាងអាយុអ្នកបន្តិច) នឹងធ្វើឱ្យអ្នកមើលទៅដូចក្មេងដែរ។ ការស្រាវជ្រាវបានបង្ហាញថា មនុស្សចាស់មួយចំនួនដែលមិនខ្វល់ពីវ័យរបស់ខ្លួន ហើយនៅតែធ្វើខ្លួនឱ្យសកម្មក្នុងការរស់នៅប្រចាំថ្ងៃ គឺពិតជាធ្វើឱ្យពួកគាត់មើលទៅក្មេងជាងវ័យ និងប្រកបដោយសុខភាពមាំមួនជាង បើធៀបទៅនឹងមនុស្សចាស់វ័យដំណាលគ្នា។
ប្រើក្រែមការពារកម្តៅថ្ងៃ
មិនថាអ្នកស្ថិតនៅក្នុងវ័យណានោះទេ ក្រែមការពារកម្តៅថ្ងៃនៅតែមានតួនាទីជាអង្គរក្សដ៏សំខាន់ក្នុងការថែរក្សា និងការពារស្បែកឱ្យចៀសផុតពីការរលាករោលពីកម្តៅថ្ងៃ ជ្រីវជ្រួញ និងស្ងួតគ្មានជាតិសំណើមជាដើម។ ការថែរក្សាស្បែកជាមួយក្រែមការពារកម្តៅថ្ងៃ គួរតែចាប់ផ្តើមធ្វើតាំងពីយូរណាស់មកហើយ តែក៏មិនមែនមានន័យថាយឺតពេលសម្រាប់អ្នកនោះដែរ។ ចាប់ផ្តើមពីថ្ងៃនេះ ដើម្បីកាត់បន្ថយដំណើរនៃការឈានទៅរកភាពចាស់ជ្រីវជ្រួញឱ្យកើតមានយឺតជាងវ័យ។
ភ្ញាក់ឡើង បញ្ចេញកម្លាំង
កុំរស់នៅជាមួយនឹងភាពស្ពឹកស្រពន់ស្តាយភួយស្តាយខ្នើយនាពេលព្រឹកព្រលឹមឱ្យសោះ ព្រោះអ្វីអ្នកដឹងទេ? ព្រោះថា ការដែលអ្នកភ្ញាក់ឡើងនាពេលព្រឹកព្រលឹម ហើយបញ្ចេញកម្លាំងភ្លាមៗ តាមរយៈការហាត់ប្រាណ20នាទីជារៀងរាល់ថ្ងៃ នឹងជួយឱ្យរាងកាយ ក៏ដូចជាអារម្មណ៍កាន់តែស្រស់ស្រាយ ហើយក៏ដូចជាកាវដែលចាំបិទទ្រនិចនាឡិកានៃរូបសម្រស់ឱ្យផ្អាកធ្វើដំណើរទៅមុខផងដែរ។
គេងឱ្យបានគ្រប់គ្រាន់
អ្នកណាក៏ដឹងដែរថាគេងមិនគ្រប់ ស្បែកស្រអាប់ ភ្នែកឡើងខ្មៅ គ្មានកម្លាំង ស្បែកក៏ជ្រីវជ្រួញ ហេតុដូច្នេះល្អបំផុតគឺគេងឱ្យបានគ្រប់គ្រាន់ នោះភាពក្មេងខ្ចីក៏មិនទៅណាចោលអ្នកដែរ។
លំហែកាយ
ភាពធុញថប់ គឺជាកម្លាំងដ៏សាហាវក្នុងការរុញច្រានអ្នកឱ្យដើរទៅឱ្យទាន់វ័យ ឬអាចដើរទៅហួសវ័យរបស់អ្នកទៅទៀត ហេតុនេះហើយរឿងដែលអ្នកមិនត្រូវភ្លេចនោះគឺ សម្រាកឱ្យបានទៀងទាត់។ ស្វែងរកការលំហែកាយក្នុងអំឡុងពេលដែលមានការសម្រាកប្រចាំឆ្នាំ ឬការសម្រាកក្នុងថ្ងៃបុណ្យជាតិនានា ដើម្បីការពារកុំឱ្យភាពធុញថប់មកជិតអ្នកបានឱ្យសោះ។
ញ៉ាំតែបៃតង
បច្ចុប្បន្ននេះជំនឿដែលថា ការទទួលទានតែបៃតងមួយកែវក្នុងមួយថ្ងៃ អាចជួយកាត់បន្ថយឱកាសនៃការកើតជំងឺមហារីក ជួយរក្សាទម្ងន់ឱ្យស្ថិតនៅក្នុងកម្រិតសមស្រប ធ្វើឱ្យអារម្មណ៍ស្រស់ស្រាយ ព្រមទាំងមាន Antioxidants ដែលចាំជួយថែរក្សារាងកាយឱ្យរឹងមាំផងនោះ កំពុងតែរីករាលដាលធំឡើងៗពីមួយថ្ងៃទៅមួយថ្ងៃ ហេតុនេះ ចាប់ពីបានដឹងដំណឹងមួយនេះ ហើយសូមចាប់ផ្តើមចងមិត្តជាមួយតែបៃតងភ្លាមទៅណា៎៕
