វាជាដំណឹងល្អមួយទៀតសម្រាប់មិត្តនារីៗ តើមានអ្នកណាដែលទៅនឹកស្មានដល់ថា គ្រាន់តែគេងត្រាំទឹកក្ដៅលេងៗសោះ អាចជួយដុតកម្ដៅកាឡូរីបាន ប្រៀបបីដូចជាដើរហាត់ប្រាណបានកន្លះម៉ោងទៅហើយនោះ។ ទស្សនាវដ្ដី ឡារ៉ែន បានពាំនាំការស្រាវជ្រាវមួយនេះ មកផ្ដល់ជូនប្រិយមិត្តអ្នកអានទាំងអស់ឱ្យបានជ្រាប។
បើតាមក្រុមអ្នកស្រាវជ្រាវបានបង្ហើបឱ្យដឹងថា មានក្រុមបុរសចំនួន14នាក់មកពី Loughborough University មកសាកល្បងធ្វើការពិសោធការដុតកម្ដៅកាឡូរី។ បុរសទាំងអស់ត្រូវចែកជាពីរក្រុម ដែលក្រុមបុរស7នាក់ដំបូងនឹងត្រូវធ្វើការសាកល្បងដុតកាឡូរីដោយការជិះកង់ក្នុងរយៈពេល1ម៉ោង និងក្រុមមួយទៀត
តម្រូវឱ្យគេងត្រាំទឹកក្ដៅលេងៗ នៅក្នុងអាងងូតទឹកក្ដៅស្ថិតនៅក្នុងសីតុណ្ហភាព104ហ្វារិនហៃ ឬស្មើរនឹង40អង្សាសេ នៅក្នុងរយៈពេល1ម៉ោងដូចគ្នា។ ជាចុងក្រោយលទ្ធផលបានបញ្ជាក់ឱ្យឃើញថា ក្រុមគេងត្រាំទឹកក្ដៅ បានដុតកម្ដៅកាឡូរីបាន130កាឡូរីឯណោះ បើធៀបទៅនឹងក្រុមអ្នកជិះកង់បានកន្លះម៉ោង។
ដោយសារតែការគេងត្រាំទឹកក្ដៅមានគុណប្រយោជន៍ចំពោះសុខភាពរាងកាយដូចជាការហាត់ប្រាណដែរ ហើយវាក៏អាចជួយសម្រាលអាការរលាកផ្សេងៗនៅក្នុងរាងកាយបានថែមទៀតផង។ ម្យ៉ាងទៀត ឆ្លងកាត់ការពិសោធខាង
លើអស់រយៈពេល24ម៉ោង ក្រុមអ្នកស្រាវជ្រាវបានរកឃើញថា ជាតិស្ករដែលមាននៅក្នុងឈាមបានធ្លាក់ចុះដល់ទៅ10% ដែលវាជាគុណប្រយោជន៍ដ៏ល្អសម្រាប់អ្នកជំងឺទឹកនោមផ្អែម រោគបេះដូង និងលើសឈាម។
បច្ចុប្បន្ននេះមានប្រទេសជាច្រើននៅជុំវិញពិភពលោកមានការចាប់អារម្មណ៍ជាខ្លាំងចំពោះការគេងត្រាំទឹកក្ដៅបែបនេះ ជាពិសេសគឺពេញនិយមនៅប្រទេសហ្វាំងឡង់។ ដោយសម្លឹងឃើញថា វាជាវិធីមួយដើម្បីព្យាបាលជំងឺ ហើយការគេងត្រាំទឹកក្តៅឧណ្ហៗបែបនេះជួយបន្ថែមសីតុណ្ហភាពរាងកាយឱ្យកាន់តែកក់ក្ដៅបន្ថែមទៀតផង។ ចំពោះបងប្អូនប្រជាកសិករ ក៏អាចប្រើប្រាស់វិធីសាស្ត្រនេះ ដើម្បីព្យាបាលខ្លួនជាបឋមនៅតាមផ្ទះផងដែរ។ ការលាតត្រដាងនូវគុណសម្បត្តិនៃការគេងត្រាំទឹកក្ដៅ គេសង្កេតឃើញថា នៅក្នុងប្រទេសដែលស្ថិតក្នុងតំបន់ត្រជាក់ និយមអនុវត្តវិធីសាស្ត្រនេះនៅក្នុងអំឡុងខែត្រជាក់ជាពិសេសតែម្តង។
ចំពោះអ្នកដែលមមាញឹកនឹងការងារខ្លាំង ពុំមានពេលវេលាគ្រប់គ្រាន់សម្រាប់ធ្វើការហាត់ប្រាណ ក៏គប្បីពិចារណាអនុវត្តវិធីសាស្ត្រដ៏ល្អមួយនេះដែរ ហើយវិធីនេះអ្នកអាចអនុវត្តបានជារៀងរាល់ថ្ងៃនៅពេលងូតទឹកម្តងៗ បើទោះបីជាកន្លះម៉ោង ឬមួយម៉ោងក្ដី ពោលគឺត្រូវញែកពេលវេលាសម្រាប់ថែរក្សាសុខភាពរបស់អ្នកផងណា៎៕
