ប្រេងអូលីវ គឺជាប្រេងល្អបំផុតមួយដែលអ្នកជំនាញតែងយកមកប្រើ ដើម្បីធ្វើការម៉ាស្សាលើដងខ្លួន ព្រោះគេជឿជាក់ថា ប្រេងអូលីវមានគុណសម្បត្តិខ្ពស់ក្នុងការជួយបង្កើនសម្រស់របស់អ្នក ហើយវាក៏មានប្រយោជន៍ចំពោះសុខភាពផងដែរ។ ដូច្នេះបើមិត្តអ្នកអានទាំងឡាយបានមកមើលពីគុណប្រយោជន៍នៃការម៉ាស្សាប្រេងចំពោះសម្រស់បន្តិចក៏ល្អដែរ។
បន្ថយការឈឺចាប់៖ នេះគឺជាគុណប្រយោជន៍ដ៏ល្អមួយដែលមាននៅក្នុងប្រេងអូលីវចំពោះរាងកាយ។ ការម៉ាស្សារាងកាយដោយប្រេងអូលីវក្តៅតិចៗអាចជួយសម្រួលដល់ចលនាសាច់ដុំបន្ថយការឈឺចាប់ ហើយវានឹងកាន់តែមានប្រសិទ្ធភាពជាងនេះទៅទៀត បើអ្នកធ្វើវារួមជាមួយនឹងការហាត់យូហ្គា ផ្នែកខាងក្រោយខ្នង និងជើងផងនោះ។
បំបាត់ភាពធុញថប់៖ ជីវិតរបស់យើងម្នាក់ៗពោរពេញទៅដោយបញ្ហា និងសំពោធ ទាំងនៅកន្លែងធ្វើការ និងនៅផ្ទះ ជាហេតុធ្វើឱ្យអារម្មណ៍តានតឹងអាចកើតមានឡើងបានគ្រប់ពេលវេលា។
ការម៉ាស្សារាងកាយដោយប្រេងអាចជួយជំរុញចលនាឈាមឱ្យដើរបានស្រួល បន្ថែមការសម្រាកដល់ខួរក្បាល និងជួយបន្ថែមថាមពលដល់រាងកាយផងដែរ។
សម្រួលដល់បញ្ហាដំណេក៖ ក្រៅពីទទួលបានការសម្រាក និងកាត់បន្ថយភាពតានតឹងហើយនោះ ការម៉ាស្សាដោយប្រេងអូលីវ អាចជួយព្យាបាលអាការគេងមិនលក់បានទៀតផង។
កាត់បន្ថយការរលាកដោយកម្តៅថ្ងៃ៖ សម្រាប់អ្នកដែលស្រឡាញ់ចូលចិត្តស្លៀកខ្លីៗ ប្រហែលជាត្រូវចិត្តហើយពេលបានដឹងថា ការម៉ាស្សាប្រេងអាចជួយសម្រួលបញ្ហានេះបាន។ ប្រេងអូលីវគឺជាប្រេងមួយប្រភេទដែលពេញទៅដោយគុណប្រយោជន៍ក្នុងការផ្លាស់ប្តូរស្បែកដែលរលាករោលឱ្យមកនៅក្នុងសភាពធម្មតាវិញ។ លាយប្រេងអូលីវ និងទឹកស្អាតក្នុងចំណុះស្មើគ្នាដាក់ក្នុងដបមួយ រួចក្រឡុកវាឱ្យរលាយចូលគ្នា សឹមយកមកលាបលើស្បែកដែលរលាកដោយកម្តៅថ្ងៃនោះ។ ជាតិប្រេងនឹងជ្រាបចូលទៅក្នុងស្រទាប់ស្បែក បន្ថយអាការរមាស់ ជួយសម្រួលពណ៌ស្បែកឱ្យសស្មើគ្នាឡើងវិញ។
ជួយផ្តល់សំណើមឱ្យស្បែកដែលស្ងួត៖ ជាតិសំណើមយ៉ាងសន្ធឹកសន្ធាប់ដែលមាននៅក្នុងប្រេងអូលីវ គឺជាសារធាតុផ្សំម្យ៉ាងក្នុងការជួយកែខៃបញ្ហាស្បែកស្ងួត។ ជាតិសំណើមពីប្រេងអូលីវនឹងជ្រាបចូលទៅក្នុងស្រទាប់ស្បែក កាត់បន្ថយភាពស្ងួត ប្រេះបែកស្រកា អាការរមាស់នៃស្បែក ជាពិសេសវាក៏ជួយឱ្យស្បែកតឹងណែនស្រស់ស្អាតទៀតផង។
កាត់បន្ថយបញ្ហាចាស់មុនអាយុ៖ ប្រេងអូលីវគឺជាធនធានដ៏ល្អក្នុងការជួយកាត់បន្ថយស្នាមជ្រួញលើផ្ទៃមុខ ថ្ងាស កន្ទុយភ្នែក ក្បែរបបូរមាត់ ព្រោះវាជួយបន្ថែមខូឡាជិន និងភាពតឹងណែនដល់ស្បែក។ សូមចាំថាការម៉ាស្សាមុខជាមួយនឹងប្រេងអូលីវ គឺជាទម្លាប់ដ៏ល្អក្នុងការថែរក្សាផ្ទៃមុខ។
ទាំងនេះគឺជាគុណប្រយោជន៍ដែលបានមកពីការម៉ាស្សាស្បែកដោយប្រេងអូលីវ ដូច្នេះបើអ្នកកំពុងតែមានចិត្តចង់បានភាពស្រស់ស្អាតដូចដែលបានរៀបរាប់ខាងលើនេះ សូមកុំភ្លេចស្វែងរកជំនួយពីប្រេងអូលីវពីពេលនេះតែម្តងទៅ៕
