ប្រសិនបើអ្នកកំពុងជួបនឹងបញ្ហាពិបាកក្នុងការគេង នោះដំណោះស្រាយដែលអាចជួយអ្នកបាននោះគឺ ទម្លាប់នៃការកត់ត្រា ដោយប្រើប៊ិច និងក្រដាស ពីកិច្ចការដែលអ្នកត្រូវធ្វើនៅថ្ងៃស្អែក។
ប្រសិនបើអ្នកធ្លាប់ជួបនឹងបញ្ហាពិបាកគេង ឬគេងមិនលក់ អ្នកប្រហែលជាដឹងហើយថារឿង ដែលធ្វើឱ្យអ្នកភ្ញាក់ដឹងខ្លួនពីដំណេកនៅកណ្តាលយប់ គឺជារឿងព្រួយបារម្ភប្រចាំថ្ងៃរបស់អ្នក បារម្ភថា តើអ្នកត្រូវធ្វើអ្វីខ្លះនៅថ្ងៃបន្ទាប់ ជាពិសេសប្រសិនបើអ្នកមានកិច្ចការដែលត្រូវធ្វើច្រើន និងនៅមិនទាន់បានបញ្ចប់ការងារទាំងនោះនៅឡើយ។
នៅក្នុងការសិក្សារបស់និយោជិតនៅក្នុងក្រុមហ៊ុន IT របស់អាឡឺម៉ង់ បានបង្ហាញថា អ្នកដែលមានកិច្ចការងារដែលមិនទាន់បានបញ្ចប់នៅកន្លែងការងារ ពួកគេតែងគិតអំពីបញ្ហាការងាររបស់ពួកគេនៅថ្ងៃចុងសប្តាហ៍ច្រើន បើធៀបទៅអ្នកដែលមានការងារច្រើន ឬតិចជាងនៅលើបន្ទុកការងាររបស់ពួកគេ។ អ្នកស្រាវជ្រាវ Christine Syrek មកពីសាកលវិទ្យាល័យ Trier បានសរសេរថា លទ្ធផលស្រាវជ្រាវរបស់ពួកគេបានបង្ហាញថា “ការដែលមិនបានបញ្ចប់កិច្ចការរបស់ខ្លួននៅក្នុងថ្ងៃធ្វើការ ធ្វើឱ្យបុគ្គលិករងសម្ពាធការងារ និងធ្វើឱ្យពួកគេគេងមិនលក់នៅថ្ងៃចុងសប្តាហ៍ ឬថ្ងៃសម្រាក ដោយសារការរងនូវឥទ្ធិពលសម្ពាធនៃពេលវេលា”។
ការគិតពីការងារដែលមិនទាន់បញ្ចប់ នឹងធ្វើឱ្យអ្នកពិបាកគេង ជាពិសេសនៅយប់ថ្ងៃអាទិត្យ ពីព្រោះថ្ងៃស្អែក អ្នកនឹងត្រូវចូលធ្វើការវិញ ហើយប្រាកដណាស់អ្នកនឹងប្រឈមមុខនឹងកិច្ចការដែលអ្នកមិនទាន់បានបញ្ចប់ ហើយរួមទាំងការងារថ្មីមួយចំនួនទៀត ដែលអ្នកនឹងទទួលបានជាបន្តបន្ទាប់។ ដូច្នេះ តើអ្នកគួរធ្វើយ៉ាងណា ដើម្បីបញ្ឈប់ការព្រួយបារម្ភ និងភាពធុញថប់ទាំងនេះ ដែលរំខានដល់ការសម្រាកនាថ្ងៃចុងសប្តាហ៍ និងការគេងរបស់អ្នក? អ្នកអាចរាប់លេខ ឬគេតែងនិយមហៅថា រាប់កូនចៀម អានសៀវភៅ ធ្វើសមាធិ ដោយផ្តោតលើការដកដង្ហើមរបស់អ្នក ឬអ្នកអាចធ្វើបញ្ជី ដោយកត់ត្រានូវរាល់ការងារទាំងអស់ដែលអ្នកត្រូវធ្វើនៅថ្ងៃបន្ទាប់ ដើម្បីឱ្យអ្នកអាចគ្រប់គ្រងពេលវេលា និងការងាររបស់អ្នកបានយ៉ាងល្អជារៀងរាល់ថ្ងៃ ហើយវិធីនេះក៏អាចជួយកាត់បន្ថយការគិត និងការព្រួយបារម្ភច្រើនរបស់អ្នកផងដែរ។
សូមចាប់ផ្តើមសរសេរនូវរាល់ការងារដែលអ្នកត្រូវធ្វើទៅតាមលំដាប់លំដោយឱ្យបានត្រឹមត្រូវ និងច្បាស់លាស់ ហើយអនុវត្តទៅតាមបញ្ជីការងារទាំងនោះជាប្រចាំ នោះអ្នកនឹងមើលឃើញពីប្រសិទ្ធភាពនៃការកត់ត្រានេះជាក់ជាមិនខាន ស្របតាមការសិក្សាដែលធ្វើឡើងនៅសហរដ្ឋអាមេរិកបានរកឃើញថា វិធីនេះគឺពិតជាមានប្រសិទ្ធភាពគួរឱ្យភ្ញាក់ផ្អើលខ្លាំងណាស់។
លោក Michael Scullin នាយកនៃមន្ទីរពិសោធន៍ Sleep Neuroscience and Cognition Laboratory នៅសាកលវិទ្យាល័យ Baylor សហរដ្ឋអាមេរិកបានស្នើឱ្យអ្នកស្ម័គ្រចិត្តចំនួន២ក្រុមធ្វើការកត់ត្រាតាមវិធីផ្សេងគ្នា ដោយឱ្យក្រុមទី១សរសេរនូវបញ្ជីមុនពេលចូលគេង ជាបញ្ជីរៀបរាប់ពីការងារដែលពួកគេសម្រេចបាននៅថ្ងៃនេះ ហើយក្រុមទី២សរសេរពីបញ្ជីការងារដែលពួកគេត្រូវធ្វើនៅថ្ងៃស្អែក ហើយជាលទ្ធផលនៃការស្រាវជ្រាវនេះបានរកឃើញថា ក្រុមទី២ដែលមានទម្លាប់សរសេរកត់ត្រានូវរាល់ការងារដែលពួកគេត្រូវធ្វើនៅថ្ងៃស្អែក មុនពេលចូលគេង ធ្វើឱ្យពួកគេឆាប់គេងលក់ និងគេងលក់បានស្កប់ជាងក្រុមទី១។ តាមរយៈការស្រាវជ្រាវបានបញ្ជាក់ថា ក្រុមទី២បានសរសេរចេញនូវការងារដែលពួកគេត្រូវធ្វើនៅថ្ងៃស្អែក ធ្វើឱ្យខួរក្បាលរបស់ពួកគេលេងមានការខ្វល់ខ្វាយច្រើន ធ្វើឱ្យខួរក្បាលអាចសម្រាកបានកាន់តែងាយ និងឆាប់រហ័ស ពីព្រោះពួកគេបានសម្រាលបន្ទុកផ្លូវចិត្តរបស់ពួកគេពីការគិតច្រើនពីការងារដែលពួកគេនៅមិនទាន់បានបញ្ចប់ និងការងារដែលពួកគេត្រូវធ្វើនៅថ្ងៃបន្ទាប់។
ដូច្នេះ ការសរសេរចេញនូវបញ្ជីការងារដែលត្រូវធ្វើនៅថ្ងៃស្អែកមុនពេលចូលគេង ឬទម្លាប់នៃការកត់ត្រាទុកនូវបញ្ជីការងារដែលត្រូវធ្វើ គឺជាការតម្រង់ទិសខ្លួនអ្នក ដើម្បីកាត់បន្ថយភាពតានតឹងនៅក្នុងខួរក្បាលរបស់អ្នក ជួយសម្រួលដល់ការគិតរបស់អ្នកឱ្យបានត្រឹមត្រូវ និងមានលំដាប់លំដោយក្នុងការធ្វើការងារបានយ៉ាងល្អ។ ការសរសេរចេញនូវបញ្ជីការងារទៅតាមលំដាប់លំដោយបានល្អ នឹងធ្វើឱ្យអ្នករំសាយចិត្តពីការព្រួយបារម្ភចំពោះការងារដែលត្រូវធ្វើ និងកាត់បន្ថយការគិតវិលទៅវិលមក បារម្ភថានឹងធ្វើការងារមិនចប់ ធ្វើមិនបានល្អ និងខ្លាចភ្លេចធ្វើការងារដែលអ្នកត្រូវធ្វើ ធ្វើឱ្យខួរក្បាលរបស់អ្នកបានសម្រាកពីការគិតខ្វល់ខ្វាយ ហើយឆាប់គេងលក់ និងគេងលក់បានស្កប់ស្កល់ល្អជាងមុខ។
សូមអនុវត្តការកត់ត្រាអំពីការងារដែលអ្នកត្រូវធ្វើនៅថ្ងៃស្អែក មុនពេលចូលគេងទាំងអស់គ្នា ដើម្បីសុខភាពរាងកាយ និងសុខភាពផ្លូវចិត្តរបស់អ្នកបានល្អប្រសើរ បំបាត់ការគិតខ្វល់ខ្វាយច្រើន ហើយថែមទាំងគេងលក់បានស្កប់ស្កល់ល្អថែមទៀតផង៕
