ក្រុមអ្នកវិទ្យាសាស្ត្រនៅប្រទេស អាហ្វ្រិកខាងត្បូង ទើបតែបានប្រកាសលទ្ធផលនៃការស្រាវជ្រាវមួយ បង្ហាញថា វីរុសកូវីដ-១៩ ប្រភេទ អូមីក្រុង មិនមានសមត្ថភាពគេចរួចពីខ្សែការពារទីពីររបស់ប្រព័ន្ធការពាររាងកាយមនុស្សឡើយ នេះបើតាមសារព័ត៌មាន Reuters។
យោងតាមការស្រាវជ្រាវ បណ្ដាកោសិកា T នៅតែមានសមត្ថភាពខ្ពស់ក្នុងការកំណត់អត្តសញ្ញាណ និងវាយប្រហារទៅលើ វ៉ារ្យ៉ង់ អូមីក្រុង ដូច្នេះ អាចទប់ស្កាត់ករណីវិជ្ជមាននឹងកូវីដ-១៩ ប្រភេទនេះ វិវត្តទៅជាជំងឺធ្ងន់ធ្ងរ។
បណ្ដាកំណែរបស់ អូមីក្រុង ជួយឱ្យវាគេចផុតពីអង្គបដិប្រាណ ដែលជាខ្សែការពារជួរមុខរបស់រាងកាយ ដែលមានតួនាទីទប់ទល់នឹងការឆ្លងរោគ។ កន្លងមក ក្រុមអ្នកវិទ្យាសាស្ត្របានសន្និដ្ឋានថា សមាសធាតុផ្សេងទៀតរបស់ប្រព័ន្ធការពាររាងកាយមនុស្ស នៅតែចោលមុខព្រួញទៅលើ អូមីក្រុង ប៉ុន្តែ មកដល់ពេលនេះ ទើបពួកគេរកឃើញភ័ស្ដុតាងដែលបញ្ជាក់អំពីការសន្និដ្ឋាននោះ។
លទ្ធផលនៃការស្រាវជ្រាវនេះ ទើបតែត្រូវបានប្រកាសកាលពីថ្ងៃទី ២៨ ធ្នូ នៅលើទំព័រ medRxiv ដែលជាថ្នាលបច្ចេកវិទ្យាសម្រាប់ចុះផ្សាយលទ្ធផលនៃការស្រាវជ្រាវផ្នែកវេជ្ជសាស្ត្រ។
ទោះជាយ៉ាងណាក៏ដោយ ក្រុមអ្នកវិទ្យាសាស្ត្រខាងលើបានព្រមានថា មិនគួរលើកឡើងនូវការសន្និដ្ឋានលឿនពេកដោយយោងទៅលើទិន្នន័យបឋមនេះទេ ព្រោះថាការដែលបានទទួលការចាក់វ៉ាក់សាំង និងការដែលធ្លាប់ឆ្លង កូវីដ-១៩ អាចជះឥទ្ធិពលដល់លទ្ធផលនៃការស្រាវជ្រាវ៕
