ប្រធានសមាគមវេជ្ជសាស្ត្រអាហ្វ្រិកខាងត្បូង ឱ្យដឹងថា ស្ទើរតែទាំងអស់នៃករណីឆ្លង វ៉ារ្យ៉ង់ អូមីក្រុង នៅប្រទេសនេះ សុទ្ធតែបានជាសះស្បើយបន្ទាប់ពីទទួលការព្យាបាលតាមវិធីសាមញ្ញ។
«ក្រោយពីបានធ្វើរោគវិនិច្ឆ័យភ្លាម យើងចាប់ផ្ដើមព្យាបាលដោយប្រើថ្នាំ cortisone និងថ្នាំប្រភេទ ibuprofen កម្រិតស្រាលជាដើម ដើម្បីជួយកាត់បន្ថយការឈឺចាប់សាច់ដុំ និងឈឺក្បាល។ ទាំងអស់គឺមានតែប៉ុណ្ណឹង។ មិនចាំបាច់ប្រើប្រាស់អុកស៊ីសែន និងថ្នាំប្រឆាំងវីរុស» វេជ្ជបណ្ឌិត Angelique Coetzee ប្រធានសមាគមវិជ្ជសាស្ត្រអាហ្វ្រិកខាងត្បូង ថ្លែងដូច្នេះកាលពីថ្ងៃទី ២១ ធ្នូ ២០២១។
ក្រោយការតាមដានករណីឆ្លង អូមីក្រុង នៅ អាហ្វ្រិកខាងត្បូង អស់រយៈពេល ៥ សប្ដាហ៍ អ្នកស្រី Coetzee បង្ហើបឱ្យដឹងថា អ្នកជំងឺសុទ្ធតែមានរោគសញ្ញាឈឺសាច់ដុំ ឈឺក្បាល និងអស់កម្លាំង។
«ពួកគេអាចមាន ឬមិនមានរោគសញ្ញាក្អក។ បើសិនជាក្អក គឺក្អកស្ងួត អមជាមួយនឹងអាការឈឺបំពង់ក» អ្នកស្រី Coetzee ថ្លែងដូច្នេះ និងបន្ថែមថា «យោងតាមការស្រាវជ្រាវថ្មីៗនេះ អូមីក្រុង បង្កផលប៉ះពាល់ដល់ផ្លូវដង្ហើមផ្នែកខាងលើប៉ុណ្ណោះ ពោលគឺមិនមែនបង្កគ្រោះថ្នាក់ដល់ផ្លូវដង្ហើមផ្នែកខាងក្រោមដូច ដេលតា»។
ករណីឆ្លងថ្មី កូវីដ-១៩ ប្រភេទ អូមីក្រុង នៅ អាហ្វ្រិកខាងត្បូង នាប៉ុន្មានថ្ងៃចុងក្រោយនេះ បានចាប់ផ្ដើមមានសញ្ញាថយចុះ។ ជាក់ស្ដែង ករណីឆ្លងប្រចាំថ្ងៃ កាលពីថ្ងៃទី ១៦ ធ្នូ បានឡើងដល់ជិត ២៧,០០០ នាក់ ចំណែកថ្ងៃទី ២១ ធ្នូ បានថយមកនៅត្រឹម ១៥,៤២៤ នាក់។ ប្រការនេះធ្វើឱ្យសហគមន៍អ្នកវេជ្ជសាស្ត្រអះអាងថា អូមីក្រុង បានឆ្លងផុតដំណាក់កាលកំពូលរួចហើយ នៅ អាហ្វ្រិកខាងត្បូង។
បច្ចុប្បន្ន អូមីក្រុង កំពុងឆ្លងរាលដាលក្នុងល្បឿនយ៉ាងលឿនមិនធ្លាប់មាន និងត្រូវបានរកឃើញនៅក្នុងប្រទេសចំនួន ១០៦ នៅទូទាំងពិភពលោក ប៉ុន្តែ ក្រុមអ្នកវិទ្យាសាស្ត្រមិនទាន់អាចកំណត់បានជាក់លាក់ និងជាផ្លូវការនៅឡើយ អំពីភាពសាហាវ ឬសមត្ថភាពនៃការគេចពីវ៉ាក់សាំងរបស់វា៕
