(សហរដ្ឋអាម៉េរិក)-បុរសវ័យ 25 ឆ្នាំម្នាក់ ត្រូវទទួលការវះកាត់តភ្ជាប់សួតទាំងពីរសងខាង បន្ទាប់ពីត្រូវ COVID-19 ស៊ីទម្លុះគ្រប់កន្លែង។
Blake Bargatze រស់នៅក្នុងរដ្ឋ Georgia សហរដ្ឋអាម៉េរិក បានចូលព្យាបាលនៅមន្ទីរពេទ្យកាលពីខែមេសា ពេលធ្លាក់ខ្លួនឈឺធ្ងន់ដោយសារឆ្លង COVID-19។ ក្នុងអំឡុងសម្រាកព្យាបាល ស្ថានភាពជំងឺចេះតែធ្ងន់ធ្ងរឡើងៗ រហូតដល់ថ្នាក់ក្រុមវេជ្ជបណ្ឌិតឱ្យដឹងថា Bargatze ត្រូវការការវះកាត់ភ្ជាប់សួត ទើបអាចរស់បាន។ Bargatze ត្រូវបានវះកាត់ភ្ជាប់សួតចំនួនពីរកាលពីខែមិថុនា។
«COVID-19 ស៊ីសួតទាំងពីរសងខាងរបស់ខ្ញុំ អស់គ្មានសល់» Bargatze រៀបរាប់នៅក្នុងកិច្ចសម្ភាសជាមួយ Insider កាលពីថ្ងៃទី 26 កញ្ញា។ «ពេលគ្រូពេទ្យយកចេញ សួតរបស់ខ្ញុំមើលទៅដូចជាសំណល់ស្ការកៅស៊ូ ធ្លុះស្ទើរគ្រប់កន្លែង។ ខ្ញុំសំណាងណាស់ ព្រោះមុខងារនានាក្នុងរាងកាយ មិនចុះខ្សោយ»។
Bargatze គឺជាមនុស្សម្នាក់ក្នុងចំណោមអ្នកជំងឺដែលបានវះកាត់ភ្ជាប់សួតទាំងសងខាងដោយជោគជ័យ ក្រោយពីបានឆ្លង COVID-19។ Bargatze យល់ថា ខ្លួនបានឆ្លងវីរុសនេះនៅពេលទៅចូលរួមព្រឹត្តិការណ៍ប្រគំតន្ត្រីមួយនៅ Florida កាលពីខែមីនា ហើយគាត់ពិតជាមានវិប្បដិសារីជាខ្លាំង។
កាលណោះ Bargatze ពាក់ម៉ាស ប៉ុន្តែមិនទាន់បានចាក់វ៉ាក់សាំង ព្រោះតែមិនមានលក្ខខណ្ឌគ្រប់គ្រាន់ និងរង់ចាំមើលផលវិបាករបស់អ្នកដែលបានចាក់វ៉ាក់សាំងរួចហើយ។
ម្ដាយរបស់ Bargatze និយាយថា៖ «វាចង់រង់ចាំរហូតដល់វ៉ាក់សាំងអភិវឌ្ឍបាន 10 ឆ្នាំទៀត ឬយូរជាងនេះ ដូចទៅនឹងមនុស្សជាច្រើនដែលកំពុងរារែកនៅពេលនេះ»។
ក្រោយការវះកាត់តភ្ជាប់សួត កំលោះវ័យ 25 ឆ្នាំរូបនេះ បានអំពាវនាវឱ្យគ្រប់គ្នាទៅចាក់វ៉ាក់សាំងបង្ការ COVID-19។ Bargatze សង្ឃឹមថា ខ្លួននឹងឆាប់បានត្រលប់ទៅធ្វើកិច្ចការដែលខ្លួនចូលចិត្ត ដូចជាការស្ទូចត្រីជាដើម។ គាត់នឹងត្រលប់ទៅធ្វើការវិញចាប់ពីសប្ដាហ៍នេះ និងបាននិយាយថា នេះគឺជា «ជោគជ័យដ៏ធំមួយ»។ ទោះជាត្រូវលេបថ្នាំ 50 គ្រាប់ជារៀងរាល់ថ្ងៃ ប៉ុន្តែ Bargatze នៅតែរីករាយ ព្រោះថា ខ្លួននៅដើរបាន និង «អរគុណដែលនៅមានជីវិត»។
បច្ចុប្បន្ន Black Bargatze បានទទួលការចាក់វ៉ាក់សាំងដូសទីពីររួចហើយ។ គ្រួសាររបស់បុរសនេះ បានបង្កើតទំព័រសម្រាប់រៃអង្គាសប្រាក់ ដោយសង្ឃឹមថា សប្បុរសជននានានឹងជួយដល់ Bargatze៕
