ក្រសួងសុខាភិបាល អ៊ីស្រាអែល កាលពីថ្ងៃទី 22 សីហា បានប្រកាសអំពីលទ្ធផលនៃការចាក់វ៉ាក់សាំង Pfizer ដូសទីបី និងបានបញ្ជាក់ថា ដូសបន្ថែមនេះ បានជួយលើកកម្ពស់ប្រសិទ្ធភាពនៃការទប់ស្កាត់ការឆ្លងរាលដាលរបស់ COVID-19។
លទ្ធផលនៃការស្រាវជ្រាវនេះ ត្រូវបានលើកឡើងនៅក្នុងកិច្ចប្រជុំមួយរបស់ក្រុមប្រឹក្សាគ្រប់គ្រងការចាក់វ៉ាក់សាំង កាលពីថ្ងៃទី 19 សីហា និងត្រូវបានចុះផ្សាយនៅលើគេហទំព័ររបស់ក្រសួងសុខាភិបាល អ៊ីស្រាអែល កាលពីថ្ងៃទី 23 សីហា ក៏ប៉ុន្តែ បច្ចុប្បន្ននេះ សេចក្ដីលម្អិតនៃការស្រាវជ្រាវនេះ មិនទាន់ត្រូវបានធ្វើឡើងពេញលេញនៅឡើយ។
ការរកឃើញនេះគឺត្រូវទៅនឹងស្ថិតិដែលត្រូវបានលើកឡើងកាលពីសប្ដាហ៍មុន ដោយ Maccabi ដែលជាអ្នកផ្ដល់សេវាកម្មសុខាភិបាល របស់ អ៊ីស្រាអែល និងជាស្ថាប័នមួយក្នុងចំណោមស្ថាប័នដែលចាក់វ៉ាក់សាំងដូសបន្ថែម ដើម្បីទប់ស្កាត់វ៉ារ្យ៉ង់ Delta។
ក្រោយការពិនិត្យទៅលើទិន្នន័យដែលបានដកស្រង់ពីស្ថិតិ របស់វិទ្យាស្ថាន Gertner និងវិទ្យាស្ថាន KI ក្រុមមន្ត្រីសុខាភីបាល អ៊ីស្រាអែល ឱ្យដឹងថា ក្នុងចំណោមមនុស្សដែលមានវ័យលើសពី 60 ឆ្នាំ លទ្ធភាពនៃការទប់ស្កាត់ការឆ្លងវីរុស បន្ទាប់ពីបានចាក់ម្ជុលទីបី បាន 10 ថ្ងៃ គឺខ្ពស់ជាង 4 ដង ធៀបនឹងអ្នកចាក់តែពីរម្ជុល។
ការចាក់ដូសទីបីដល់ពលរដ្ឋវ័យលើសពី 60 ឆ្នាំ ក៏ជួយកាត់បន្ថយហានិភ័យនៃការចូលពេទ្យ និងអាការធ្ងន់ធ្ងរ ចាប់ពី 5 ដល់ 6 ដងឯណោះ។ នេះគឺជាក្រុមដែលងាយរងគ្រោះដោយសារ COVID-19 និងជាក្រុមពលរដ្ឋដែលទទួលបានការចាក់វ៉ាក់សាំងដំបូងគេនៅ អ៊ីស្រាអែល កាលពីខែធ្នូ ឆ្នាំ 2020។
អ៊ីស្រាអែល គិតមកដល់បច្ចុប្បន្ន បានរកឃើញអ្នកឆ្លង COVID-19 សរុបចំនួន 990,428 នាក់ ក្នុងនោះមាន 6,830 នាក់ បានស្លាប់៕
