ក្រុមហ៊ុន Sinopharm ប្រកាសលទ្ធផលនៃការសាកល្បងប្រើប្រាស់ដំណាក់កាលទីបី ក្រោយពីវ៉ាក់សាំង Covid-19 ចំនួន 200លានដូស របស់ក្រុមហ៊ុនចិនមួយនេះ ត្រូវបានចាក់នៅជុំវិញពិភពលោក។
យោងតាមលទ្ធផលនៃការស្រាវជ្រាវដែលត្រូវបានចុះផ្សាយកាលពីថ្ងៃទី26 ខែឧសភា នៅលើទស្សនាវដ្ដីសមាគមវេជ្ជសាស្ត្រអាមេរិក វ៉ាក់សាំង Covid-19 របស់ក្រុមហ៊ុន Sinopharm ដែលផលិតនៅទីក្រុងប៉េកាំង មានប្រសិទ្ធភាព 78.1%។ វ៉ាក់សាំង Covid-19 របស់ Sinopharm មុននោះ ក៏ត្រូវបានអង្គការសុខភាពពិភពលោក (WHO) អនុម័តឱ្យប្រើប្រាស់បន្ទាន់រួចហើយដែរ។
ចំណែកវ៉ាក់សាំងមួយប្រភេទទៀតរបស់ Sinopharm ផលិតដោយក្រុមហ៊ុនបុត្រសម្ព័ន្ធនៅទីក្រុង Wuhan ប្រទេសចិន មានប្រសិទ្ធភាព 72.8%។ វ៉ាក់សាំងនេះ កំពុងស្ថិតក្នុងដំណាក់កាលស្នើ WHO ផ្ដល់សិទ្ធឱ្យធ្វើចរាចរណ៍បន្ទាន់ និងត្រូវបានអនុម័តដោយមានលក្ខខណ្ឌអមនៅប្រទេសចិន។
លទ្ធផលដែលទទួលបានពីការសាកល្បងប្រើប្រាស់លើកទីបីរបស់ Sinopharm ត្រូវបានធ្វើឡើងដោយយោងទៅលើទិន្នន័យដែលប្រមូលបានពីអ្នកស្ម័គ្រចិត្តចំនួន 40,411នាក់ នៅ UAE និងបារ៉ែន ដែលបានទទួលការចាក់វ៉ាក់សាំងនេះ កាលពីឆ្នាំ2020។ អ្នកស្ម័គ្រចិត្ត ភាគច្រើនមានសុខភាពល្អ និងមានវ័យចាប់ពី 18-59ឆ្នាំ ប៉ុន្តែក៏មានប្រហែល 600នាក់ មានអាយុលើសពី 60ឆ្នាំផងដែរ។
លទ្ធផលខាងលើ បានបង្ហាញថា អ្នកដែលបានជួបផលប៉ះពាល់មានចំនួន 201ករណី ក្នុងនោះមាន 2ករណីមានសភាពធ្ងន់ធ្ងរបំផុត ទាក់ទិននឹងវ៉ាក់សាំងរបស់ Sinopharm ដែលផលិតនៅទីក្រុងប៉េកាំង។ នោះគឺបុរសវ័យ 30ឆ្នាំ ដែលត្រូវបានពិនិត្យឃើញថា អាចប៉ះពាល់ដល់សរសៃវិញ្ញាណ និងស្ត្រីវ័យ 35ឆ្នាំ មានអាការក្អួតចង្អោរខ្លាំង និងត្រូវបញ្ជូនទៅកាន់មន្ទីរពេទ្យ។
ទស្សនាវដ្ដី សមាគមវេជ្ជសាស្ត្រអាមេរិក ក៏បានបញ្ជាក់ថា ការពិសោធដំណាក់កាលទីបីរបស់ Sinopharm ត្រូវបានធ្វើឡើងភាគច្រើនទៅលើក្រុមមនុស្សដែលមានវ័យនៅក្មេង មិនអាចបញ្ជាក់អំពីប្រសិទ្ធភាពចំពោះអ្នកដែលមានជំងឺប្រចាំកាយ ស្ត្រី និងមនុស្សវ័យចំណាស់។
យោងតាមទិន្នន័យកាលពីដើមខែនេះ វ៉ាក់សាំង Sinopharm ប្រមាណ 200លានដូស ត្រូវបានប្រើប្រាស់នៅក្នុងប្រទេស និងដែនដីចំនួន 42 លើពិភពលោក ឈរពីក្រោយ AstraZeneca, Pfizer-BioNTech និង Moderna។
វ៉ាក់សាំង Sinopharm កន្លងមក ធ្លាប់ធ្វើឱ្យមានការសង្ស័យច្រើនពីសំណាក់ក្រុមអ្នកវិទ្យាសាស្ត្រ ដោយសារតែមានទិន្នន័យតិចតួចស្ដីពីការពិសោធន៍លើមនុស្សដំណាក់កាលចុងក្រោយ ដែលត្រូវបានប្រកាសដោយរដ្ឋាភិបាលចិន ក៏ដូចជាការបង្ហើបពីក្រុមហ៊ុននេះ៕
ប្រភព៖ SCMP
ប្រែសម្រួល៖ បុត្រា
