បច្ច័យសំខាន់ ដែលមានផលប៉ះពាល់ ដល់ការបំផ្លាញកោសិកាស្បែកឱ្យចុះទ្រុឌទ្រោម យារជ្រីវជ្រួញ មុនវ័យនោះ គឺពូជអម្បូរ និងបរិស្ថានជុំវិញខ្លួន ដែលយើងស្នាក់អាស្រ័យនៅជាប្រចាំ ដូចជា ការបានទទួលពន្លឺថ្ងៃខ្លាំងជ្រុលពេក ភាពធុញថប់តានតឹង និងធាតុអាកាសពុលជាដើម។
តែ សូមកុំអាលអស់សង្ឃឹមអី ទោះជាអ្នកកើតមកពីពូជអម្បូរដែលមិនស្អាត ឬរស់នៅក្នុងស្ថានភាពបរិស្ថានយ៉ាងម៉េចក៏ដោយ តែបើត្រូវការមានសុខភាពល្អ ស្បែកស្អាត ភ្លឺថ្លា តឹងណែនរលោង នៅពេលមានអាយុច្រើនឡើង រហូតអ្នកណាៗ ក៏មិនអាចស្មានអាយុពិតប្រាកដរបស់អ្នកបាននោះ យើងក៏មានដំណាក់កាល ដែលគ្រប់គ្នាអាចមើលថែទាំខ្លួនឯងឱ្យមើលទៅឃើញស្អាត មានសុខភាពស្បែកដ៏ល្អបានដែរ។
1.អ្នកវិទ្យាសាស្ត្រខាងវិជ្ជាពេទ្យ បានរកឃើញថា រឿងដែលសំខាន់បំផុតរបស់មនុស្សគ្រប់អាយុវ័យ តាំងពី ១៨ឆ្នាំឡើងមក គឺគួរញ៉ាំទឹកឱ្យបានច្រើនក្នុង 1ថ្ងៃៗ ដើម្បីឱ្យស្បែកមានសំណើម។ គួរការពារស្បែកពីកម្ដៅថ្ងៃ ព្រោះកម្ដៅថ្ងៃ គឺជាបច្ច័យសំខាន់បំផុត ក្នុងការបំផ្លាញស្បែកឱ្យចុះទ្រុឌទ្រោម និងគួរលាបឡេការពារកម្ដៅថ្ងៃ។
2.នៅពេលអាយុឈានចូលវ័យ 20ឆ្នាំ នឹងមើលឃើញថា មុននៅលើផ្ទៃមុខ ចាប់ផ្ដើមថយចុះ ជាងកាលពីនៅវ័យជំទង់ តែសម្រាប់ស្រីក្រមុំ នៅក្នុងវ័យនេះ ក៏នៅតែមានមុនច្រើននៅលើថ្ពាល់ និងចង្កា ដែលបណ្តាលមកពី អ័រម៉ូននៅក្នុងរាងកាយ។ ដូច្នេះគួរលាងសម្អាតមុខ ដោយផលិតផលដែលខ្សោយៗ និងធុនកណ្តាល គ្មានធាតុផ្សំរបស់សារធាតុបង្កឱ្យកើតមុន និងអាចប្រើរួមជាមួយ ផលិតផលការពារមុនបាន។ មិនគួរយកដៃញេច ឬកេះក្បាលមុនឡើយ ព្រោះវានឹងធ្វើឱ្យស្បែកមុខ មានរន្ធ និងស្នាមកន្ទួល។ គួរកាត់បន្ថយអាហារណា ដែលផ្អែមខ្លាំង ខ្លាញ់ច្រើន និងលាងមុខឱ្យបានស្អាតជានិច្ច។
3 .ពេលចូលដល់វ័យ៣០ ស្បែកនឹងចាប់ផ្តើមស្ងួត មានជាតិខ្លាញ់ ចេញមកតាមស្បែកតិច។ ក្នុងវ័យនេះ មុនអាចនៅឃើញមានខ្លះដែរ ដូច្នេះគួរជ្រើសរើស ប្រើគ្រឿងសម្អាងណា ដែលប្រាសចាកធាតុផ្សំរបស់សារធាតុបង្កឱ្យកើតមុន តែគួរប្រើគ្រឿងសម្អាងណា ដែលមានចំណែកផ្សំរបស់វិតាមីន ដែលជួយបង្កើត និងជួសជុលកោសិកាស្បែកឱ្យបានល្អ ដូចជាវិតាមីនE និងវិតាមីនC ជាដើម។
4.ពេលឈានចូលដល់វ័យ40 ក្រពេញផលិតជាតិខ្លាញ់នៅក្រោមស្បែក ធ្វើការកាន់តែខ្សោយ ធ្វើឱ្យស្បែកឡើងស្ងួត និងឃើញមានស្នាមជ្រួញនៅជុំវិញមាត់ និងភ្នែក។ ការប្រើឃ្រីមបំប៉ន ឱ្យស្បែកមានសំណើមគ្រប់ពេលវេលា មិនថាតែពេលគេង ឬនៅពេលថ្ងៃឡើយ ជាពិសេសបំផុតអ្នកដែលគេង និងធ្វើការនៅក្នុងបន្ទប់ម៉ាស៊ីនត្រជាក់ អាចជួយបានច្រើនណាស់ ដូចជា ឃ្រីមថែបំប៉ន ដែលមានធាតុផ្សំពីប្រទាលកន្ទុយក្រពើ វិតាមីនE , A និងបេតាឃែរ៉ូធីន ជាដើម និងគួរប្រើឃ្រីមបំប៉នស្បែក ដែលមានសារធាតុប្រេងច្រើន ដើម្បីជួយបង្កើនសំណើមយ៉ាងឆាប់រហ័ស និងការពារស្បែកបានយូរពេញ 1ថ្ងៃផង។
5.ក្នុងវ័យឈានចូល 50ឆ្នាំ ស្បែកនឹងចាប់ផ្តើមរលុង លែងយឺតយារ។ អ្នកខ្លះអាចកើតមានស្នាមអុចៗ
ខ្មៅៗ ឬអាចម៍រុយនៅលើស្បែក និងបបូរមាត់ចាប់ផ្តើមយារធ្លាក់។ ការហាត់ប្រាណ និងការទទួលទានអាហារគ្រប់ប្រភេទក្រុមជាប់ជានិច្ច រៀងរាល់ថ្ងៃ នឹងជួយឱ្យភាពយឺតតឹងរបស់ស្បែកនៅល្អ និងពន្យារការចុះខ្សោយបានច្រើនណាស់។ ឯឃ្រីមថែបំប៉នស្បែក គួរតែជ្រើសប្រើឃ្រីមណា ដែលសម្បូរដោយសារធាតុខ្លាញ់ពីធម្មជាតិ និងសារធាតុផ្ដល់សំណើមដល់ស្បែក ដើម្បីជំនួសនូវអ្វី ដែលបាត់បង់ទៅនោះ។
6.ក្នុងវ័យ60 ឬច្រើនជាងនោះ នឹងជួបប្រទះឃើញស្នាមជ្រីវជ្រួញកាន់តែច្រើនឡើង សាច់ដុំ និងស្បែកនឹងរលុងទន់ជ្រាយ កាន់តែខ្លាំងឡើង។ នៅក្នុងវ័យនេះ អ្នកខ្លះអាចពេញចិត្ត ឱ្យពេទ្យជួយកម្ចាត់ភាពរយីករយាក និងស្នាមជ្រីវជ្រួញរបស់ស្បែក តាមរយ:ការវះកាត់ តែក៏គួរពិចារណា ឱ្យបានច្បាស់លាស់ជាមុនដែរ ព្រោះវាអាចមិនសមដូចបំណងក៏អាចថាបានដែរ។
ការមើលថែទាំរាងកាយ និងសុខភាពឱ្យបានពេញទំហឹង ជារៀងរាល់ថ្ងៃ ឱ្យមើលទៅឃើញ ស្រស់ស្អាតទៅតាមវ័យ ដ៏សក្តិសមទៅវិញទេ ដែលធ្វើឱ្យយើងមានភាពជឿជាក់លើខ្លួនឯងខ្លាំងជាងនោះ៕
