ការមានសុខភាពដែលល្អបាននោះ ជួនកាលយើងក៏ចាំបាច់ត្រូវសាកល្បងផ្លាស់ប្តូរទង្វើផ្សេងៗ ដើម្បីឱ្យខ្លួនឯងកើតមានភាពស៊ាំធ្លាប់ និងធ្វើរហូតក្លាយជាទម្លាប់ ដែលការសាងទម្លាប់ល្អៗជាមួយនឹងសុខភាពរបស់យើងនេះ ប្រាកដណាស់ថា លទ្ធផលដែលទទួលបានមកវិញ គឺពិតជាធ្វើឱ្យសុខភាពរបស់យើងល្អប្រសើរឡើងទ្វេគុណ។ ថ្ងៃនេះ យើងមានទម្លាប់ល្អៗ 5យ៉ាងដែលអ្នកគួរសាងឡើង ឬក៏សាកល្បងផ្លាស់ប្តូរ មកជម្រាបប្រីយមិត្តអ្នកអានដូចខាងក្រោម។
- ញ៉ាំអាហារពេលព្រឹក ដែលសម្បូរទៅដោយប្រូតេអ៊ីន: ក្នុងអំឡុងពេល 30នាទីក្រោយភ្ញាក់ពីដំណេក ទាំងអស់គ្នាប្រហែលជាបានដឹងច្បាស់ស្រាប់ហើយថា អាហារពេលព្រឹក គឺជាពេលអាហារមួយដែលសំខាន់បំផុតរបស់ថ្ងៃថ្មី ហើយអាហារដែលមានប្រូតេអ៊ីនខ្ពស់ នឹងបង្កើនការដុតបំផ្លាញកាន់តែខ្លាំងឡើង បើប្រៀបធៀបនឹងអាហារពេលព្រឹកបែបសម្បូរខាបូហាយដ្រេតនោះ។
- បង្កើនភាពយឺតយាររបស់សាច់ដុំ: យើងច្រើនតែភ្ញាក់ពីដំណេកឡើងដោយរាងកាយរឹងស្តូក ព្រោះស្ថិតនៅក្នុងឥរិយាបថតែមួយ ពេញ ១យប់មកហើយ ការពន្យឺតសាច់ដុំបែបស្រាលៗ នឹងជួយបន្ធូរបន្ថយសាច់ដុំ បង្កើនភាពស្វាហាប់ និងកាត់បន្ថយអាការចុករួយសាច់ដុំបានក្នុងរយៈពេលវែង ដូចពេលមុនគេងបាន។ ការពន្យឺតសាច់ដុំ ដោយការធ្វើលំហាត់ប្រាណបែបស្រាលៗ ក៏អាចជួយក្នុងរឿងប្រព័ន្ធឈាមរត់ ជួយឱ្យមានអារម្មណ៍ធូរស្រាល និងធ្វើឱ្យគេងលក់បានកាន់ស្រួលឡើងទៀតផង។
- ចេញទៅខាងក្រៅផ្ទះយ៉ាងហោចណាស់ក្នុង 1ថ្ងៃឱ្យបាន 30នាទី: ការបានទទួលពន្លឺថ្ងៃស្រទន់ៗនៅពេលព្រឹក ធ្វើឱ្យរាងកាយបានផលិតវីតាមីនD ដែលយើងមិនអាចទទួលបានពីអាហារ និងសំខាន់ចំពោះសុខភាពឆ្អឹង រោគបេះដូង និងរោគមហារីកប្រភេទខ្លះ។ ចូរសាកល្បងចេញទៅខាងក្រៅផ្ទះ ឱ្យបានយ៉ាងតិច ក្នុង 1ថ្ងៃ 30នាទី ដើម្បីទទួលយកពន្លឺថ្ងៃ និងបានស្រូបយកធាតុអាកាសបរិសុទ្ធផង។
- រកកន្លែងស្ងាត់ៗនៅម្នាក់ឯង: បណ្តាញសង្គម ធ្វើឱ្យយើងអាចចូលដល់បានគ្រប់កន្លែង គ្រប់ពេលវេលា និងការទទួលបានព័ត៌មានច្រើន រហូតដល់ហៀរហូរដូច្នេះសូមសាកល្បងរកពេលវេលា និងទីកន្លែងណាស្ងាត់ៗ នៅតែម្នាក់ឯង ទោះជា 5 ឬ 10នាទីក៏បានដែរ ដោយធ្វើការបិទទូរស័ព្ទ បិទភ្នែក និងបន្ធូរអារម្មណ៍ដោយការតាំងសមាធិជាមួយការដកដង្ហើម ឈប់នឹកកង្វល់ពីអ្វីទាំងអស់ មួយរយៈជាដើម។ ការតាំងសមាធិ ជួយកាត់បន្ថយភាពតានតឹងធុញថប់ក្នុងអារម្មណ៍ បង្កើនសេចក្តីសុខ បង្កើនភាពប្រឆាំងនឹងជំងឺ និងកាត់បន្ថយភាពប្រថុយនឹងការកើតជំងឺបេះដូង។
- ក្រោកចេញពីតុធ្វើការម្តងម្កាលផង: សាកល្បងគិតទៅមើលថា តើអ្នកប្រើពេលវេលាអង្គុយនៅនឹងតុធ្វើការ យូរប៉ុនណាហើយ? ចូរក្រោកឈរឡើង ហើយដើរទៅនេះ ទៅនោះ ឱ្យបានញឹកញាប់ ដើម្បីការពារភាពធុញថប់ខាងខ្សែភ្នែក និងឱ្យសាច់ដុំភ្នែកបានសម្រាកផង។ ការអង្គុយនៅមយយកន្លែងយូរជ្រុលពេក ក៏អាចសាងកម្លាំងសង្កត់ ឱ្យឆ្អឹងខ្នងផ្នែកខាងក្រោមឈឺចាប់បានដែរ៕
