អាជ្ញាធរតំបន់ Kashmir នៃប្រទេសឥណ្ឌា រៀបផែនការត្រៀមកន្លែងស្នាក់នៅសម្រាប់ហិណ្ឌូសាសនិកចំនួន 600,000នាក់ ដែលនឹងចូលរួមធ្វើធម្មយាត្រា Amarnath ប្រព្រឹត្តទៅចាប់ពីខែមិថុនាខាងមុខ។
ក្រុមមន្ត្រីនៅតំបន់ Kashmir បានផ្អាកការអនុញ្ញាតឱ្យពលរដ្ឋចុះឈ្មោះតាមគេហទំព័រដើម្បីចូលរួមពិធីធម្មយាត្រាទៅកាន់ប្រាសាទទេពក្នុងល្អាងភ្នំ Amarnath (Shri Amarnath Cave Temple) ក៏ប៉ុន្តែ បានប្រកាសថា ព្រឹត្តិការណ៍នេះនឹងនៅតែប្រព្រឹត្តទៅតាមកាលបរិច្ឆេទ ចាប់ពីថ្ងៃទី28 ខែមិថុនា ដល់ថ្ងៃទី22 ខែសីហា ឆ្នាំ2021។
អាជ្ញាធរតំបន់ Kashmir ក៏មានគម្រោងសង់ជំរំស្នាក់នៅចំនួនពីរកន្លែងដើម្បីធ្វើជាកន្លែងឈប់សម្រាកសម្រាប់ហិណ្ឌូសាសនិកដែលចូលរួមធ្វើធម្មយាត្រាទៅកាន់ប្រាសាទ Amarnath។ ប្រាសាទ Amarnath ដែលស្ថិតនៅលើកម្ពស់ 3,880ម៉ែត្រ បើធៀបនឹងផ្ទៃទឹកសមុទ្រនេះ តែងតែទទួលភ្ញៀវដែលជាហិណ្ឌូសាសនិក រាប់សែននាក់ជារៀងរាល់ឆ្នាំ។
នៅក្នុងគ្រាដែលប្រទេសឥណ្ឌា កំពុងប្រឈមនឹងការរីករាលដាលនៃវីរុសCovid-19 មនុស្សជាច្រើនកំពុងមានការព្រួយបារម្ភ ខ្លាចស្ថានភាពកាន់តែអាក្រក់ឡើងៗ បន្ទាប់ពីមានព្រឹត្តិការណ៍ធម្មយាត្រានេះ។
«ស្ថានការណ៍កំពុងអាក្រក់នៅពាសពេញប្រទេសឥណ្ឌា។ នឹងជារឿងល្អ បើសិនជាធម្មយាត្រា Amarnath ឆ្នាំនេះ គ្រាន់តែធ្វើឡើងជានិមិត្តរូប ដោយអនុញ្ញាតឱ្យមនុស្សតិចតួច ទៅកាន់ប្រាសាទ។ មិនដូច្នេះទេ ធម្មយាត្រានេះនឹងក្លាយទៅជាសោកនាដកម្ម» អ្នកនយោបាយ Tanvir Sadiq និយាយដូច្នេះ។
Tanvir Sadiq បានព្រមានថា ធម្មយាត្រាដែលមានមនុស្សរាប់សែននាក់ចូលរួម អាចជា «ព្រឹត្តិការណ៍មហាចម្លង ដែលគ្រោះថ្នាក់ដល់ជីវិត ខណៈដែលសមត្ថភាពរបស់ប្រព័ន្ធសុខាភិបាលនៃតំបន់ Kashmir នៅមានកម្រិតនៅឡើយ»។
គណៈកម្មការគ្រប់គ្រងប្រាសាទ Shri Amarnath (SASB) ដែលជាអ្នកប្រារព្ធពិធីធម្មយាត្រា បានឱ្យដឹងថា គិតដោយឡែកក្នុងខែនេះ ហិណ្ឌូសាសនិកយ៉ាងតិច 30,000នាក់ បានចុះឈ្មោះចូលរួមធ្វើធម្មយាត្រានេះ បើទោះជាពិធីបុណ្យ Kumbh Mela មុននេះ បានក្លាយជាព្រឹត្តិការណ៍មហាចម្លងវីរុសហើយក្ដី។
បច្ចុប្បន្ន (រសៀលថ្ងៃទី27 ខែមេសា) ប្រទេសឥណ្ឌា មានអ្នកឆ្លងវីរុសCovid-19 សរុបចំនួន 17,636,307នាក់ ក្នុងនោះមានអ្នកស្លាប់សរុបចំនួន 197,894នាក់, ជាសះស្បើយ 14,556,209នាក់ និងកំពុងព្យាបាល 2,882,204នាក់៕
ប្រភព៖ DW
ប្រែសម្រួល៖ បុត្រា
