ភ្នំពេញៈ ផ្សាររាត្រីកុងតឺន័រមួយទៀតនឹងបើកដំណើរការជាផ្លូវការល្ងាចថ្ងៃទី26 សីហានេះបន្ទាប់ពីចំណាយពេលរៀបចំអស់រយៈពេលជាច្រើនខែកន្លងមកនេះ។
ផ្សារកុងតឺន័រថ្មីនេះមានឈ្មោះ Arts Container Market ដែលមានទីតាំងនៅក្នុងតំបន់អតីតបឹងកក់ ឬ CITY Centerដែលជាតំបន់មួយកំពុងមានការអភិវឌ្ឍយ៉ាងឆាប់រហ័ស។
អ្នកវិនិយោគផ្សារទំនើបនេះ លោក ប៊ុន សេង បានថ្លែងឲ្យដឹងកាលពីពេលថ្មីៗនេះថា ការបង្កើតអាជីវកម្មនេះ (Art’s Container Market) គឺដើម្បីគាំទ្រទាំងអាជីវកម្មដែលបង្កើតថ្មីក្នុងស្រុក និងក្រៅស្រុកក្នុងការបំពេញតម្រូវការដល់អតិថិជន។ ការបង្កើតកន្លែងអាជីវកម្មនេះមិនមែនជាលើកដំបូងទេ សំណង់ផ្សារកុងតឺន័រជិត80តូបដែលស្ថិតក្នុងផ្ទៃដីជិត3ពាន់ម៉ែត្រការ៉េបានខិតខំធ្វើការឌីហ្សាញជាលក្ខណៈស្តង់ដារថ្មីដោយផ្តោតសំខាន់ទៅលើទម្រង់សិល្បៈដែលកំពុងពេញនិយមសម្រាប់ប្រជាជនកម្ពុជា។
លោក ប៊ុន សេង បានសម្តែងសុទិ្ទដ្ឋិនិយម និងរំពឹងទទួលបានជោគជ័យពីផ្សារទំនើបនៅកម្ពុជា។
ផ្សាររាត្រីកុងតឺន័របានរីកដុះដាលយ៉ាងច្រើននៅកម្ពុជាទាំងនៅរាជធានីភ្នំពេញ ក្រុងព្រះសីហនុ និងខេត្តសៀមរាប បន្ទាប់ពីផ្សាររាត្រី Jet Container Night Market ដែលមានទីតាំងនៅទល់មុខរដ្ឋសភាជាតិបានបើកដំណើរការ និងទទួលបានជោគជ័យយ៉ាងខ្លាំងរួចមក៕
