ភ្នំពេញ៖ ការពិនិត្យមើលកាលបរិច្ឆេទផលិត និងថ្ងៃផុតកំណត់ប្រើប្រាស់នៅលើទំនិញដាក់លក់នៅលើទីផ្សារគឺជារឿងមួយសំខាន់ណាស់ដែលអាណាព្យាបាល ឬស្ត្រីមេផ្ទះទាំងឡាយមិនត្រូវមើលរំលងឡើយ ព្រោះថា ការប្រើប្រាស់ទំនិញផុតកាលបរិច្ឆេទប្រើប្រាស់គឺជាទំនិញដែលខូចគុណភាពដែលបង្កផលប៉ះពាល់ដល់សុខភាពរាងកាយមនុស្សយើងយ៉ាងធ្ងន់ធ្ងរ។នេះជាការលើកឡើងរបស់មន្ត្រីជំនាញ។
ការលើកឡើងនេះបានធ្វើឡើងនៅពេលដែលមន្ត្រីជំនាញសាខាកាំកុងត្រូលខេត្តពោធិ៍សាត់ បានសហការជាមួយមន្ទីរពាណិជ្ជកម្មខេត្ត និងអាជ្ញាធរដែនដីនៅថ្ងៃទី22 ខែសីហានេះរួមគ្នាចុះពិនិត្យទំនិញម្ហូបអាហារនៅផ្សារបន្ទាយយួន ស្ថិតក្នុងឃុំស្យា និងផ្សារភូមិពោធិ ស្ថិតនៅក្នុងឃុំស្រែស្តុក ស្រុកកណ្តៀង ខេត្តពោធិ៍សាត់ ហើយបានរកឃើញ និងធ្វើការដកហូតទំនិញផុតកាលបរិច្ឆេទប្រើប្រាស់ និងទំនិញហាមឃាត់សរុបចំនួន10មុខ ស្មើនឹង 594.3 គីឡូក្រាមដែលកំពុងចរាចរដាក់លក់នៅលើទីផ្សារដើម្បីយកទៅរក្សាទុកសម្រាប់ធ្វើការកម្ទេចចោល។
មន្ត្រីជំនាញសាខាកាំកុងត្រូលនិយាយថា ទំនិញចំនួន10មុខដែលបានដកហូតនោះមានដូចជា ភេសជ្ជៈគ្រឿងកំប៉ុង មី ចាហួយដូងយួន និងគ្រឿងទេសផ្សេងៗដែលទាំងអស់នេះសុទ្ធតែជាទំនិញហួសកាលបរិច្ឆេទប្រើប្រាស់ និងត្រូវហាមឃាត់មិនឱ្យដាក់លក់នៅលើទីផ្សារ ព្រោះវានឹងបង្កផលប៉ះពាល់យ៉ាងធ្ងន់ធ្ងរដល់សុខភាពមនុស្ស ពិសេសអ្នកដែលជាអ្នកប្រើប្រាស់ដោយមិនបានពិនិត្យមើលកាលបរិច្ឆេទនេះ។
ក្នុងយុទ្ធនាការចុះពិនិត្យទំនិញខាងលើ មន្ត្រីសាខាកាំកុងត្រូលក៏ដូចជាអាជ្ញាធរពាក់ព័ន្ធបានណែនាំដល់អាជីវករកុំឱ្យលក់ដូរសម្ភារប្រើប្រាស់ ភេសជ្ជៈ និងអាហារហូបចុកផ្សេងៗណាដែលផុតកំណត់កាលបរិច្ឆេទដូច្នេះទៀត ដោយត្រូវចេះមើលកាលបរិច្ឆេទទំនិញឱ្យបានច្បាស់ មុននឹងយកមកដាក់លក់នៅលើទីផ្សារទៅឱ្យអតិថិជនប្រើប្រាស់។ ជាមួយគ្នានេះដែរអតិថិជនខ្លួនឯង ក៏ត្រូវចេះពិនិត្យមើលស្លាកសញ្ញា កាលបរិច្ឆេទប្រើប្រាស់ឱ្យបានគ្រប់ពេល ចៀសវាងការបោកប្រាស់ ឬបន្លំពីឈ្មួញខិលខូចដែលចង់បានតែប្រាក់ដោយមិនគិតពីសុខភាពអ្នកប្រើប្រាស់ដូច្នេះនោះ៕
