ជាមួយនឹងការកំណត់តម្លៃជាង 30ពាន់លានដុល្លារអាមេរិករបស់ DoorDash បន្ទាប់ពី IPO មូលបត្ររបស់ CEO Tony Xu មានតម្លៃប្រមាណ 1.6ពាន់លានដុល្លារអាមេរិក។
ក្រោយពីការបោះផ្សាយមូលបត្រជាសាធារណៈ (IPO) ដែលត្រូវបានធ្វើឡើងកាលពីថ្ងៃទី 9ធ្នូកន្លងទៅ សេវាកម្មដឹកជញ្ជូនអាហារ DoorDash កំពុងតែឆ្ពោះទៅកាន់គោលដៅកំណត់តម្លៃឡើងដល់ 32ពាន់លានដុល្លារអាមេរិក។ សម្រាប់នាយកប្រតិបត្តិ និងជាសហស្ថាបនិក លោក Tony Xu វិញ នេះគឺជាឱកាសល្អដែលជួយឱ្យលោកក្លាយជាមហាសេដ្ឋីក្នុងវ័យ 36ឆ្នាំ។
យោងតាមឯកសាររបស់ក្រុមហ៊ុន បច្ចុប្បន្ន លោក Xu កាន់កាប់ភាគហ៊ុនចំនួន 5% របស់ក្រុមហ៊ុនដែលលោករួមនឹងមិត្តភក្ដិមួយចំនួននៅសាកលវិទ្យាល័យ Stanford ជាអ្នកបង្កើតឡើងកាលពីឆ្នាំ 2013។ ជាមួយនឹងការកំណត់តម្លៃជាង 30ពាន់លានដុល្លារអាមេរិករបស់ DoorDash បន្ទាប់ពី IPO មូលបត្ររបស់ Tony Xu នឹងមានតម្លៃប្រមាណ 1.6ពាន់លានដុល្លារអាមេរិក។
ការក្លាយជាមហាសេដ្ឋី គឺជាជំហានដ៏អស្ចារ្យមួយនៅក្នុងការរកស៊ីរបស់លោក Xu។ ឪពុកម្ដាយរបស់លោកគឺជាជនជាតិចិន ដែលបានទៅរស់នៅសហរដ្ឋអាមេរិកតាំងតែពីឆ្នាំ 1989 ដែលពេលនោះ Xu មានអាយុទើបតែ 5ឆ្នាំ។
គ្រួសាររបស់ Xu រស់នៅក្នុងតំបន់ ChamPaign ដែលជាទីក្រុងតូចមួយនៅក្នុងរដ្ឋ Illinois។ ពេលទៅដល់ទឹកដីអាមេរិក ពួកគេមានប្រាក់ក្នុងហោប៉ៅត្រឹមតែប៉ុន្មានរយដុល្លារអាមេរិកប៉ុណ្ណោះ។ ពុកម្ដាយរបស់ Xu ធ្វើការនៅក្នុងអាហារដ្ឋានមួយ បើទោះកាលនៅប្រទេសចិន ម្ដាយ Xu ជាវេជ្ជបណ្ឌិតក៏ដោយ (អាមេរិកមិនទទួលស្គាល់សញ្ញាបត្ររបស់អ្នកស្រី) ចំណែកឪពុកវិញ ធ្លាប់បានបញ្ចប់ការសិក្សាផ្នែកបច្ចេកទេសអាកាសចរណ៍ និងគណិតវិទ្យាអនុវត្តពីសាកលវិទ្យាល័យ Illinois។ ដើម្បីមានភាពស្និទ្ធស្នាលជាមួយនឹងសិស្សដទៃនៅសហរដ្ឋអាមេរិក Xu ត្រូវប្ដូរឈ្មោះពី Xu Xun ទៅជា Tony Xu។
ស្ថានភាពហិរញ្ញវត្ថុរបស់គ្រួសារ Xu មានការលំបាកដល់ថ្នាក់ត្រូវទទួលជំនួយពីកម្មវិធីនានារបស់រដ្ឋាភិបាលអាមេរិក។ ការចូលទៅហូបអាហារនៅក្នុងហាង McDonald’s ក៏ជាប្រការកម្រសម្រាប់គ្រួសារនេះ។ ប៉ុន្តែ ពួកគេមិនបានចុះចាញ់ឡើយ ម្ដាយរបស់ Xu បានធ្វើការ3កន្លែងក្នុង1ថ្ងៃ ដើម្បីមានប្រាក់គ្រប់គ្រាន់សម្រាប់ការសិក្សា និងទទួលសញ្ញាបត្រផ្នែកវេជ្ជសាស្ត្ររបស់អាមេរិក និងបើកបន្ទប់ពិនិត្យសុខភាព។ បន្ទាប់ពីការប្រឹងប្រែងរយៈពេល 12ឆ្នាំ ចុងក្រោយ អ្នកស្រីក៏បានទៅដល់គោលដៅ និងបានដំណើរការបន្ទប់ពិនិត្យសុខភាពអស់រយៈពេល 20ឆ្នាំ។
ដើម្បីជួយដល់គ្រួសារ Xu បានចូលធ្វើការជាអ្នកលាងចាននៅក្នុងហាងដែលម្ដាយរបស់ Xu កំពុងធ្វើការ។ អាយុ 9ឆ្នាំ Xu បានបង្កើតសេវាកម្មកាត់ស្មៅទៅតាមការណែនាំរបស់មិត្តភក្ដិម្នាក់។
«យើងកាត់ស្មៅ និងគិតប្រាក់បន្ថែម សម្រាប់គ្រួសារណាដែលចង់កាត់ទៅតាមម៉ូដែល ឧទាហរណ៍ដូចជា ស្មៅមានរាងជាផ្ទៃក្រឡាជាដើម។ ខ្ញុំយល់ឃើញថា អ្នកណាក៏អាចធ្វើបានច្រើនជាងអ្វីដែលពួកគេគិតថាខ្លួនអាចធ្វើបាន។ ពេលនោះ ដៃរបស់ខ្ញុំលូកស្ទើរមិនដល់ដៃម៉ាស៊ីនកាត់ស្មៅទៀតផង» លោក Xu រៀបរាប់ដូច្នេះ។
នៅក្នុងកិច្ចសម្ភាសមួយជាមួយ CNBC លោក Xu និយាយថា៖ «DoorDash ប្រៀបដូចជាការលើកទឹកចិត្តសម្រាប់មនុស្សដែលប្រឹងប្រែងប្រែក្លាយសុបិនឱ្យទៅជាការពិតនៅក្នុងរយៈពេលជាច្រើនឆ្នាំ ដូចម្ដាយរបស់ខ្ញុំ។ ការធ្វើ IPO កន្លងទៅ ពិតជាថ្ងៃដ៏អស្ចារ្យចំពោះពួកយើង និងក្រុមហ៊ុនទាំងឡាយដែលពួកយើងសហការ»។
កន្លងមក ថ្វីបើមានការលំបាកខ្លាំង ប៉ុន្តែ ម្ដាយរបស់ Xu តែងផ្ដល់អាទិភាពដល់ការសិក្សារបស់ Xu។ គ្រួសារពួកគេសន្សំប្រាក់ដើម្បីទុកឱ្យ Xu បានសិក្សា និងទទួលបានសញ្ញាបត្រវិស្វករឧស្សាហកម្មរបស់សាកលវិទ្យាល័យ California, Berkeley, និង MBA របស់ Stanford។
ក្នុងពេលកំពុងរៀននៅឯសាកលវិទ្យាល័យ Stanford យុវសិស្ស Xu និងមិត្តភក្ដិ 3នាក់ទៀត គឺ Stanley Tang, Andy Fang និង Evan Moore បានរួមដៃគ្នាបង្កើតក្រុមហ៊ុនថ្មីមួយ។ ពួកគេសុទ្ធតែធ្លាប់បានធ្វើការនៅជ្រលង Silicon (Silicon Valley) នៃរដ្ឋ California ក្នុងនោះ Xu ធ្លាប់ហាត់ការនៅក្នុងក្រុមហ៊ុន Square និងធ្វើការក្នុងវិស័យអភិវឌ្ឍអាជីវកម្មនៅក្នុងក្រុមហ៊ុន RedLaser ដែលបច្ចុប្បន្នស្ថិតក្រោមការគ្រប់គ្រងរបស់ eBay។
កាលពីឆ្នាំ 2012 អ្នកទាំង4ខាងលើបានជួបគ្នាតាមរយៈគម្រោងមួយរបស់ថ្នាក់រៀន។ បន្ទាប់មក ពួកគេក៏បានសម្រេចចិត្តសហការគ្នាដើម្បីបង្កើតកម្មវិធី (App) មួយសម្រាប់បណ្ដាក្រុមហ៊ុនខ្នាតតូច។ ឆ្នាំដដែលនោះ ពួកគេបានដំណើរការកម្មវិធីអនឡាញមួយដែលមានឈ្មោះថា PaloAltoDelivery.com។ ដំណើរដើមទងបានចាប់ផ្ដើមនៅពេលម្ចាស់ហាងជាច្រើននៅក្បែរ Stanford រអ៊ូប្រាប់ពួកគេអំពីលទ្ធភាពនៃការឆ្លើយតបនឹងការបញ្ជាទិញពីអតិថិជន។
ឆ្នាំ 2013 ក្រុមហ៊ុនរបស់ពួកគេបានចូលរួមកម្មវិធីបង្កើនល្បឿនចាប់ផ្ដើមអាជីវកម្មរបស់ Y Combinator ហើយក៏ទទួលបានប្រាក់វិនិយោគចំនួន 120,000ដុល្លារអាមេរិក។ ឆ្នាំនោះ Xu និងសហស្ថាបនិក បានប្ដូរឈ្មោះក្រុមហ៊ុនទៅជា DoorDash និងចាប់ផ្ដើមជ្រើសរើសបុគ្គលិកបន្ថែម ក៏ដូចជាអ្នកប្រគល់ទំនិញ។
ឆ្នាំ 2014 DoorDash ទទួលបានទុនវិនិយោគចំនួនជិត 20លានដុល្លារអាមេរិកបន្ថែមទៀត។ ក្រុមហ៊ុននេះគឺជាអ្នកប្រគល់ទំនិញជាអាហាររបស់ភោជនីយដ្ឋានជាង 1,000កន្លែងនៅតំបន់ Bay Area និង Los Angeles មុនពេលពង្រីកខ្លួនពេញទឹកដីអាមេរិក។ គិតមកដល់បច្ចុប្បន្ន ក្រុមហ៊ុននេះប្រមូលទុនបានជាង 2.5ពាន់លានដុល្លារពីក្រុមអ្នកវិនិយោគធំៗ ដូចជា SoftBank, Sequoia Capital និងមូលនិធិវិនិយោគរបស់សិង្ហបុរីជាដើម។
ក្នុងនាមជានាយកប្រតិបត្តិ លោក Xu គឺជាអ្នកគ្រប់គ្រងកម្មវិធី (App) ប្រគល់ទំនិញជាអាហារដែលមានគេស្គាល់ច្រើនបំផុតនៅសហរដ្ឋអាមេរិក។ DoorDash បច្ចុប្បន្នមានបុគ្គលិកប្រគល់ទំនិញជាង 1លាននាក់ និងមានអតិថិជនចំនួន 18លានស្ថាប័ន។ គិតមកដល់ចុងខែកញ្ញា ឆ្នាំ 2020 របាយការណ៍របស់ក្រុមហ៊ុននេះ បង្ហាញថា ក្រុមហ៊ុនរកចំណូលបាន 1.9ពាន់លានដុល្លារអាមេរិក រួមនឹងខ្ទង់ខាតបង់ចំនួន 149លានដុល្លារ ដោយសារមិនទាន់មានចំណេញ។ យោងតាមឯកសារ ប្រាក់បៀវត្សគោលរបស់ Xu នៅក្នុងឆ្នាំ 2019 គឺ 300.000ដុល្លារអាមេរិក៕
ប្រភព៖ Bloomberg
