ថ្មីៗនេះក្រុមអ្នកប្រើប្រាស់ បានរាយការណ៍បន្តបន្ទាប់គ្នា អំពីបញ្ហាថ្ម ស្រកចុះលឿនរហ័ស នៅលើឧបករណ៍ ដែលពួកគេបានដំឡើងដល់ជំនាន់ iOS 14.2។
រោគសញ្ញានៃបញ្ហា មានដូចជា ថ្មស្រកចុះលឿនខុសប្រក្រតី និងសាកថ្មយូរជាងធម្មតា។ អ្នកប្រើប្រាស់មួយចំនួនបានរាយការណ៍ថា ឧបករណ៍របស់ពួកគេ បានស្រកថ្មអស់ជាង 50% ក្នុងពេលមិនដល់ 30នាទីផង ហើយការប្រើប្រាស់ធម្មតា រយៈពេលតែប៉ុន្មាននាទីប៉ុណ្ណោះ ស្រកថ្មអស់ប្រមាណ 5%។
បញ្ហានេះ ទំនងជាទាក់ទងនឹង Software ដោយសារអ្នកប្រើប្រាស់មួយចំនួន សង្កេតឃើញថា ថ្មរបស់ពួកគេនៅកម្រិតខ្ពស់ រយៈពេលយូរទើបស្រុកចុះ ហើយពេលបិទ/បើកទូរស័ព្ទឡើងវិញ ឃើញថ្មឡើងខុសពីធម្មតា។ បញ្ហានេះហាក់ដូចជាកើតមានឡើងលើ iPhone ស៊េរីចាស់ៗ ច្រើនជាងគេ មានដូចជា iPhone XS, iPhone 7, iPhone 6s និង iPhone SE ជំនាន់ទី1។ iPad Pro ស៊េរី 2018 ដែលដំណើរការ iPadOS 14.2 ក៏ដូចជាមានបញ្ហានេះដែរ។
នៅលើ iOS 14.2 និង iPad 14.2 ជាប្រព័ន្ធប្រតិបត្តិការថ្មីចុងក្រោយបង្អស់ ដែលបាននាំមកនូវចំណុចថ្មីៗ ដូចជាការបន្ថែម Emoji ថ្មី, មុខងារ AirPods Optimized Battery Charging, មុខងារ People Detection និងផ្ទាំងរូបភាពថ្មី ជាដើម។
Apple មិនទាន់បានឆ្លើយតប ឬស្វែងរកដំណោះស្រាយបណ្ដោះអាសន្ន សម្រាប់អ្នកប្រើប្រាស់សោះនៅឡើយ ខណៈពេលដែល ការបង្ហោះលើបណ្ដាញសង្គម ដើម្បីរាយការណ៍អំពីបញ្ហាមួយនេះ កំពុងតែកើនឡើងច្រើនៗទៅ។ មិនខុសពីសព្វដង ចំពោះអ្នកដែលកំពុងជួបប្រទះនូវ បញ្ហាថាមពលថ្មដ៏ធ្ងន់ធ្ងរមួយនេះ នឹងត្រូវរង់ចាំដំណោះស្រាយពី Apple ទើបអាចត្រឡប់មកដូចដើមវិញបាន ឬត្រូវចាំដល់ជំនាន់ក្រោយ iOS 14.3 beta ជាដើម៕
