អ្នកទាំងអស់គ្នាបានដឹងរួចមកហើយថា Apple បានបង្កើតគណនី TikTok ជាផ្លូវការ លើកដំបូងតាំងពីជាង 6ខែមុន ហើយពេលនេះក្រុមហ៊ុនបានបង្ហោះវីដេអូ ជាលើកដំបូង ដោយមានវត្តមានបុគ្គលល្បីៗនៅលើ TikTok មួយចំនួន ដែលចេញមកផ្សព្វផ្សាយអំពី iPhone 12 mini។ ប្រការដ៏ចម្លែកនេះ គឺជាលើកដំបូងហើយ ដែលក្រុមហ៊ុន Apple យកបណ្ដាញសង្គម មកផ្សព្វផ្សាយផលិតផលរបស់ខ្លួន ទាំងដែលកន្លងមក មិនដែលធ្វើបែបនេះឡើយ តែម្ដងនេះក៏ដូចសព្វដងនៅលើ YouTubeដែរ ពោលគឺ Apple មិនបានបើកការអនុញ្ញាត សម្រាប់ឱ្យអ្នកទស្សនា ធ្វើការបញ្ចេញមតិឡើយ ដោយអាចធ្វើបាន ត្រឹមតែចុច Like និងទស្សនាវីដេអូប៉ុណ្ណោះ។
គិតមកទល់ពេលនេះមានវីដេអូថ្មីចំនួន4 ហើយដែល Apple បានបង្ហោះក្នុងពេលតែមួយ មានការផ្សព្វផ្សាយអំពីទំហំដ៏តូចរបស់ iPhone 12 mini។ Apple បានបង្ហោះវីដេអូផ្សព្វផ្សាយឱ្យ iPhone 12 mini ស៊េរីថ្មីរបស់ខ្លួន ដែលមានការចូលរួមដោយបុគ្គលល្បីៗដូចជា Zach King, Jessica Wang, Julian Bass និង Kevin B Parry ជាដើម ដើម្បីបង្កើតបានជាវីដេអូ គួរឱ្យទាក់ទាញទាំងនោះ។ នៅក្នុងឃ្លីបវីដេអូទាំងនោះ ពួកគេបានព្យាយាមធ្វើវេទមន្ត ឱ្យវត្ថុធំៗ ក្លាយទៅជាវត្ថុតូចៗ ដោយការប្រើប្រាស់ វិធីកាត់តវីដេអូ និងចុងក្រោយ ជាការធ្វើឱ្យ iPhone 12 Pro ទៅជា iPhone 12 mini វិញ។
ជាការពិតណាស់ កម្មវិធីបណ្ដាញសង្គម TikTok មានភាពល្បីល្បាញខ្លាំងមែនទែន និងបន្ដពង្រីកប្រជាប្រិយភាព ជារៀងរាល់ថ្ងៃ បានយ៉ាងលឿន ស្ទើរតែមិនគួរឱ្យជឿ។ ដូចនេះ ប្រសិនបើចង់ចូលមើលវីដេអូ TikTok របស់ Apple ទាំងអស់នោះ លោកអ្នកអាចស្វែងរកគណនីផ្លូវការ របស់ពួកគេបាន នៅក្នុងកម្មវិធី TikTok តែម្ដង៕
