ថ្មីៗនេះ ក្រុមហ៊ុន Google បានបញ្ចេញកំណែអាប់ឌែតថ្មី ទៅឱ្យកម្មវិធី YouTube របស់ខ្លួនដែលដំណើរការនៅលើទូរទស្សន៍ Android TV ជាផ្លូវការហើយ។ អ្វីដែលគួរឱ្យចាប់អារម្មណ៍នៅលើ កំណែអាប់ឌែតជំនាន់ YouTube for Android TV v.2.12.08 នោះ គឺបានផ្ដល់ជូននូវការគាំទ្រក្នុងការចាក់វីដេអូ រហូតដល់កម្រិត 8K ជាមួយទូរទស្សន៍ឆ្លាតវៃទំនើបៗទាំងនោះ ក៏ដូចជាបន្ថែមមុខងារមួយចំនួនផងដែរ។
ក្រៅពីទទួលបានសមត្ថភាពចាក់វីដេអូកម្រិត 8K នៅលើទូរទស្សន៍ Android TV ។ Google ក៏ផ្ដល់ជូនការគាំទ្រចាក់វីដេអូ ប្រភេទ AV1 HDR ដែរ និងការជុសជួលកំហុសផ្សេងៗ ដូចជា បញ្ហាបណ្ដាញប្រព័ន្ធ Network មិនដំណើរការបានរលូន ព្រមទាំងជំនួយ ឱ្យដើរលឿនជាងមុន ជាដើម។
ការបន្ថែមមុខងារ Cast Connect នៅលើកំណែអាប់ឌែតចុងក្រោយ ក៏មានអត្ថប្រយោជន៍ច្រើន ដូចគ្នា ដោយអនុញ្ញាតឱ្យអ្នកប្រើប្រាស់ ធ្វើការបញ្ជាលើផ្ទាំងចាក់វីដេអូ ឬបទចម្រៀងពីទូរស័ព្ទវៃឆ្លាត ទៅកាន់ទូរទស្សន៍តាមរយៈតេឡេបញ្ជាផ្ទាល់ ដោយមិនចាំបាច់ប្រើប្រាស់ស្មាតហ្វូនទៀតឡើយ។
ជាការពិតណាស់ វីដេអូកម្រិត 8K នៅលើ YouTube មិនទាន់សូវមានច្រើនទេ ហើយក៏ទាមទារល្បឿនអ៊ីនធើណេតលឿនផងដែរ។ បើទោះជាបច្ចុប្បន្ន ទូរទស្សន៍ឆ្លាតវៃ 8K មិនទាន់មានភាពធំទូលាយ និងនៅមានតម្លៃខ្ពស់នៅឡើយ តែប្រសិនបើអ្នកប្រើប្រាស់ទាំងឡាយណា ដែលមានប្រព័ន្ធអ៊ីនធើណេតដើរលឿន ហើយជាពិសេសមានទូរទស្សន៍ 8K ស្រាប់ហើយនោះ នឹងអាចទស្សនាវីដេអូនៅលើ YouTube បានកាន់តែដិតច្បាស់ ថែមទៀតផង៕