ថ្មីៗនេះ កីទ្បាករខ្សែប្រយុទ្ធសញ្ជាតិខ្មែរ របស់ក្រុមក្លិបវិសាខា កែវ សុខផេង បានបង្ហាញសារមួយ សុំទោសក្មេងរើសបាល់ម្នាក់ ដែលខ្លួនមិនបានចាប់ដៃស្វាគមន៍ ដោយសារតែកំពុងអបអរនឹងគ្រាប់បាល់ដែលរូបគេ បានស៊ុតបញ្ចូលទី ក្នុងអំទ្បុងការប្រកួតវគ្គផ្តាច់ព្រ័ត្រ ក្នុងពានរង្វាន់សម្តេច ហ៊ុន សែន លើកទី14 ថ្នាក់ជាតិ ឆ្នាំ2020។
នៅក្នុងសារនោះ កែវ សុខផេង បានបរិយាយថា «ដោយសារអបអរពេក ភ្លេចខ្លួន បងសុំទោស ដែលមិនបានចាប់ដៃប្អូន កាលពីការប្រកួតវគ្គផ្ដាច់ព្រ័ត្រ ពានរង្វាន់សម្តេចអគ្គមហាសេនាបតីតេជោ ហ៊ុន សែន លើកទី14 ថ្នាក់ជាតិ (ឆ្នាំ2020) រវាងក្រុមណាហ្គាវើលដ៏ និងក្រុមវិសាខា នៅពហុកីឡដ្ឋានជាតិកាលពីពេលកន្លងមកថ្មីៗនេះ… អ៊ីចឹង បើពុកម៉ែបងប្អូនណា ដែលបានស្គាល់កុមារាម្នាក់នោះ សូមជួយឱ្យគាត់ទាក់ទងមកខ្ញុំផង ដើម្បីជូនជាកាដូលើកទឹកចិត្តដល់គាត់»
គួរឱ្យដឹងដែរថា កែវ សុខផេង គឺជាអ្នករកគ្រាប់បាល់ជ័យជម្នះ ដែលជួយឱ្យក្រុមវិសាខា ឈ្នះណាហ្គាវើលដ៍ ដោយលទ្ធផល 2ទល់នឹង0 នៅក្នុងវគ្គផ្តាច់ព្រ័ត្រ ពានរង្វាន់សម្តេចអគ្គមហាសេនាបតីតេជោ ហ៊ុន សែន ប្រចាំឆ្នាំ2020 កន្លងទៅនេះ៕
