កីឡាករខ្សែប្រយុទ្ធ កែវ សុខផេង របស់ក្លិបវិសាខា បានរៀបអាពាហ៍ពិពាហ៍ហើយ កាលពីថ្ងៃអាទិត្យ ទី1 ខែវិច្ឆិកា ឆ្នាំ 2020 កន្លងទៅនេះ ក្រោយពេលដែលពួកគេ បានភ្ជាប់ពាក្យអស់រយៈពេលប្រមាណជា 1ឆ្នាំជាងរួចមក។
នៅឯវិមានអាពាហ៍ពិពាហ៍ នៃផ្សារទំនើបអ៊ីអន សែនសុខ ជាទីមង្គលរបស់កីឡាករខាងលើ បានណែនណាន់តាន់តាប់យ៉ាងខ្លាំង ដោយមានភ្ញៀវចេញ-ចូលជាហូរហែ។ ក្នុងនោះ ក្រៅពីញាតិមិត្តទាំងសងខាងរបស់កូនកំលោះ និងកូនក្រមុំ ហើយ គេសង្កេតឃើញមានបុគ្គលល្បីៗជាច្រើន បានចូលរួមក្នុងកម្មវិធីដ៏មានន័យរបស់កីឡាករក្លិបវិសាខាខាងលើដែរ ដែលរួមមានទាំងមិត្តរួមអាជីព សិល្បករ សិល្បការិនី និងអ្នកកាសែតជាច្រើនរូបទៀតផង។
ចំពោះពិធីមង្គលការរបស់ កែវ សុខផេង ដែលធ្លាប់បានពន្យារពេល រហូតមកដល់ពេលនេះ គឺអាចដោយសារតែមកពីមូលហេតុជំងឺកូវីដ-19 ដែលបានអូសបន្លាយរយៈពេលយូរ ស្ទើរតែពេញ ១ឆ្នាំ2020 ហ្នឹងឯង៕
