ថ្មីៗនេះ ក្រុមហ៊ុន Xiaomi បានបង្ហោះរូបភាព 1សន្លឹក លើបណ្តាញសង្គម Weibo ផ្លូវការរបស់ខ្លួន ឱ្យប្រិយមិត្ត បានដឹងពីបច្ចេកវិទ្យាសាកថ្ម ឥតប្រើខ្សែ កម្លាំងបញ្ជូនថាមពល 80W ជាកម្លាំងថាមពលធំបំផុត មិនធ្លាប់មាន។
បើយោងតាមការបញ្ជាក់ពី Xiaomi ឆ្នាំងសាកកម្លាំង 80W នេះ មានសមត្ថភាពអាចសាកថ្មទំហំ 4,000mAh បានពី 0 ទៅ 50% ដោយប្រើពេលតែ 8នាទីប៉ុណ្ណោះ និងអាចសាកពី 0 បានដល់ 100% ប្រើពេល 19នាទី។
ទោះជាវា ត្រូវបានក្រុមហ៊ុនប្រកាសជាផ្លូវការ ក៏ពិតមែន តែមិនទាន់បានបង្ហាញតម្លៃជាក់លាក់នៅឡើយ។
សូមរំឭកផងដែរថា ពី 1ជំនាន់ទៅ 1ជំនាន់ Xiaomi ដែលជាក្រុមហ៊ុនផលិតឧបករណ៍ឆ្លាតវៃ បានយកចិត្តទុកដាក់ខ្លាំងណាស់ ទៅលើ បច្ចេកវិទ្យា Wireless Charging ។ ជាក់ស្តែង បច្ចេកវិទ្យាសាកថ្មឥតខ្សែរបស់ពួកគេ មានកម្លាំងកាន់តែធំឡើងៗ ក៏ដូចជាមានសមត្ថភាពសាកបញ្ចូលថាមពលថ្មកាន់តែលឿនឡើងៗដូចគ្នា។
កាលពីខែសីហា កន្លងទៅ ពួកគេទើបនឹង ប្រកាស ចេញឆ្នាំងសាក ប្រើបច្ចេកវិទ្យាសាកថ្ម ឥតខ្សែកម្លាំង 50W មានសមត្ថភាពបញ្ចូលថាមពលថ្មទំហំ 4,500mAh ពី 0 ដល់ 100% ចំណាយពេលខ្ទង់ប្រហែលជា 40នាទី ជាមួយនឹងស្មាតហ្វូនលំដាប់ខ្ពស់ ម៉ូដែល Xiaomi Mi 10 Ultra។ នៅទៀត!! មិនទាន់អស់ត្រឹមនេះទេ Xiaomi ក៏កំពុងអភិវឌ្ឍបច្ចេកវិទ្យាសាកថ្ម ឥតខ្សែកម្លាំង 80W 1ទៀត ដែលមកទល់ពេលនេះ Xiaomi Mi 11 Series ក៏កំពុងលេចឮដំណឹងថា ជិតប្រកាសបង្ហាញខ្លួនហើយដែរ៕
