នៅថ្ងៃសម្ពោធបើកហាង GM របស់ VJ Dada តារាចម្រៀង សុខ រក្សា បានប្រកាសប្រាប់អ្នកសារព័ត៌មានថា លោកនិងភរិយា មានគម្រោងយកកូនបន្ដទៀត បន្ទាប់ពីភរិយាលោក ធ្លាប់បាត់បង់បុត្រម្ដងរួចមកហើយ។ លោកសុខ រក្សា ក៏បានថ្លែងអំណរគុណដល់អ្នកគាំទ្រ មិត្តសិល្បករ សិល្បការនីទាំងអស់ ដែលបានព្រួយបារម្ភពីសុខភាពរបស់ភរិយាខ្លួននាពេលកន្លងមកផងដែរ។
យ៉ាងណាមិញ ចាប់តាំងពីមានរឿងគួរឱ្យសោកស្តាយនោះកើតឡើងគេពុំដែលឃើញប្តីប្រពន្ធគូរនេះចេញមកបកស្រាយ ឬនិយាយអ្វីពាក់ព័ន្ធនិងរឿងនេះឡើយ ទើបពេលនេះដែលលោកតារាចម្រៀង សុខ រក្សា ចេញមុខប្រាប់ឱ្យដឹងថា ពេលនេះភរិយារបស់ខ្លួន (កុល ដាវី) មានសុខភាពល្អវិញហើយ ហើយក៏កំពុងចាប់ផ្តើមបន្តពង្រឹង និងថែទាំសុខភាពឡើងវិញ ដើម្បីត្រៀមនឹងយកបុត្រនៅរយៈពេលពីរខែទៀត ពោលគឺដើមខែធ្នូខាងមុខនេះ។
ត្បិតមិនបង្ហាញមុខក្នុងការងារសិល្បៈច្រើនដូចពីមុន ប៉ុន្តែជីវិតឯកជនរបស់ប្តីប្រពន្ធអ្នកសិល្បៈលោក សុខ រក្សា និង កុល ដាវី នៅតែជាទីចាប់អារម្មណ៍មហាជនគ្រប់មជ្ឈដ្ឋាន។ ជាការពិតណាស់ថ្មីៗនេះ អ្នកទាំងពីរទើបជួបរឿងគួរឱ្យសោកស្តាយ ដោយបានបាត់បង់ដំណក់ឈាមរួមគ្នាកាលពីពេលថ្មីៗនេះ ធ្វើឱ្យអ្នកគាំទ្រមានការព្រួយបារម្ភចំពោះសុខភាពរបស់តារាសម្តែងតួឆ្នាស់ឆ្នើម កុល ដាវី ខ្លាំងមុន៕
