មនុស្សជាច្រើននៅកម្ពុជាកំពុងរអ៊ូពីភាពរវល់របស់ខ្លួន ហើយមិនព្រមចាប់ផ្តើមអាន បើទោះបីជាដឹងថា ការអានមានសារៈសំខាន់សម្រាប់ជីវិតក៏ដោយ។ មានអ្នកខ្លះ ចាយពេលទំនេរជាច្រើននៅក្នុងចន្លោះពេលរវល់ដោយឥតប្រយោជន៍ ហើយមិនព្រមអាន ខណៈអ្នកខ្លះទៀតមិនដឹងជាមានវិធីអ្វីអាចឱ្យខ្លួនអាចអានបាននៅពេលដែលការងារមមាញឹករាល់ថ្ងៃ។
ខាងក្រោមនេះ ជាវិធីសាស្ត្រងាយៗមួយចំនួនដើម្បីដោះស្រាយបញ្ហាសម្រាប់អ្នករវល់ឱ្យក្លាយជាមនុស្សម្នាក់ដែលទទួលបានចំណេះដឹង និងប្រភពនៃព័ត៌មានថ្មីៗសម្រាប់ជីវិតតាមរយៈការអាន។
1.យកសៀវភៅតាមខ្លួន
មនុស្សមួយចំនួនគិតថា វាជារឿងដែលគួរឱ្យខ្មាសគេនៅពេលដែលអង្គុយអានតែម្នាក់ឯងនៅកន្លែងរង់ចាំឡានក្រុង នៅពេលរង់ចាំអ្នកណាម្នាក់ក្នុងហាងកាហ្វេ នៅមុខការិយាល័យ នៅក្នុងឡាន ឬនៅតាមទីសាធារណៈមួយចំនួន។ តាមពិតបញ្ហានេះនឹងលែងកើតជាបញ្ហាសំខាន់ទៀតហើយប្រសិនបើយើងទាំងអស់គ្នាដាក់ចិត្តថាធ្វើវា បើទោះបីជានៅកម្ពុជាមិនសូវមានអ្នកអានច្រើនក៏ដោយ។ អ្នកទាំងអស់គ្នាអាចសាកល្បងគិតទៅមើលថា តើក្នុងមួយសប្តាហ៍យើងអាចអានបានប៉ុន្មានទំព័រដោយគ្រាន់តែចំណាយពេលប្រមាណជា 20នាទី ឬច្រើនជាងនេះនៅពេលរង់ចាំនោះ។
ប្រសិនបើអ្នកដាក់ចិត្តដាក់កាយក្នុងការអានសៀវភៅដោយមិនប្រកាន់ពេលវេលានោះ អ្នកនឹងទទួលបាននូវការសម្រាកយ៉ាងល្អ ព្រោះអ្នកទទួលបានព័ត៌មានថ្មីៗរៀងរាល់ថ្ងៃដោយការអានបន្តភាគ មួយថ្ងៃបន្តិចៗរហូតដល់ចប់ និងបន្តទៅឯកសារសំខាន់ផ្សេងៗទៀត។
- យកការអានដើម្បីធ្វើជាការសម្រាកមុននឹងបន្តការងារថ្មី
នៅប៉ុន្មានឆ្នាំចុងក្រោយនេះ អ្នកធ្វើការការិយាល័យបានកើនឡើង ហើយទម្លាប់នៃការរស់នៅរបស់ប្រជាជនខ្មែរក៏មានការផ្លាស់ប្តូរ ដោយរស់នៅក្នុងភាពស៊ីវិល័យ តែមមាញឹកកាន់តែខ្លាំងជាមួយនឹងការងារនៅក្នុងស្ថាប័នដែលខ្លួនធ្វើការ។ ការមមាញឹកខ្លាំងធ្វើឱ្យមនុស្សភាគច្រើនកាត់ផ្តាច់ខ្លួនឯងកាន់តែឆ្ងាយពីការអានដោយសំអាងលើហេតុផលថា “គ្មានពេលអាន‟ តែតាមពិតទៅនៅចន្លោះពេលដកឃ្លាពីការងារ ការអានជាវិធីល្អបំផុតសម្រាប់បង្កើនថាមពលការងារ។ សម្រាប់អ្នកធ្វើការរវល់អ្នកអាចឆ្លៀតពេលខ្លះៗក្នុងពេលការងារដើម្បីអានមុននឹងចាប់ផ្តើមការងារបន្ត ចៀសវាងធ្វើឱ្យខ្លួនឯងស្មុគស្មាញជាមួយនឹងរឿងដែលមិននាំប្រយោជន៍ដល់ខ្លួនឯង។ នៅពេលដែលមនុស្សម្នាក់ធ្វើការងារច្រើនម៉ោង ខួរក្បាលប្រាកដជាមានភាពនឿយហត់ ហេតុនេះអ្នកអាចដកឃ្លាពីការងារប្រមាណជា15នាទីដើម្បីអាន ហើយទើបចាប់ផ្តើមការងារថ្មីបន្តបន្ទាប់ទៀត នោះអ្នកនឹងឃើញពីប្រសិទ្ធភាពជាក់ជាមិនខាន។ ការធ្វើបែបនេះគឺជាការប្រើប្រាស់អស់លទ្ធភាពដែលខ្លួនមានដើម្បីធ្វើការងារឱ្យកាន់តែមានប្រសិទ្ធភាព វាមិនខុសពីយើងយួររបស់របរដៃឆ្វេងអស់កម្លាំងយើងក៏ផ្លាស់ប្តូរមកយួរនៅដៃស្តាំមួយរយៈមុននឹងផ្លាស់ទៅដៃឆ្វេងវិញ។
- បង្កើតទម្លាប់អានខ្លីៗនៅពេលល្ងាច
វាជារឿងពិបាកមួយដែលពេលសម្រាកពីការងារ ហើយទៅដល់ផ្ទះត្រូវអានសៀវភៅ តែប្រសិនបើអ្នកជាអ្នកចូលចិត្តអាន អ្នកនឹងដឹងថា ការអានសៀវភៅជាការសម្រាកយ៉ាងមានសេចក្តីសុខសម្រាប់ជីវិត។ ប្រសិនបើអ្នកបានចំណាយពេលតិចតួចសម្រាប់ខ្លួនឯងដើម្បីអានមុននឹងប្រើពេលនោះសម្រាប់គ្រួសារ អ្នកនឹងអាចទទួលសុភមង្គលជាច្រើនសម្រាប់ជីវិត។ ដើម្បីសម្រេចជោគជ័យលើវិធីនេះអ្នកត្រូវតែបង្កើតទម្លាប់នៃការអានជាមុនសិនព្រោះប្រសិនបើអ្នកមិនមានទម្លាប់នៃការអានទេ អ្នកនឹងទៅជាងងុយដេក ហើយធុញលើសដើម។
ដើម្បីបង្កើតទម្លាប់នៃការអានឱ្យជោគជ័យ អ្នកអាចសាកល្បងចាយពេលត្រឹមតែ 15 ទៅ 20 នាទីរៀងរាល់ថ្ងៃ ហើយឱ្យទៀងទាត់ដើម្បីអាននូវអ្វីដែលអ្នកចូលចិត្តបំផុតរាល់ថ្ងៃ។ ពេលនោះអ្នកនឹងមានអារម្មណ៍សប្បាយចិត្តជាមួយនឹងការសម្រាកដែលខ្លួនពេញចិត្ត ហើយបន្តទៅជាអត់អានមិនបាន និងអាចអភិវឌ្ឍទៅជាអ្នកអានសៀវភៅរាប់រយ រាប់ពាន់ក្បាលក្នុងរយៈពេលប៉ុន្មានឆ្នាំក្រោយមក ដោយចាយពេលវេលាតិចតួចតែប៉ុណ្ណោះ។ ការមិនមើលរំលងរឿងតូច ហើយចាប់ផ្តើមធ្វើការសន្សំចំណេះដឹងម្តងបន្តិចៗ និងធ្វើឱ្យអ្នកចំណេញច្រើនរហូតស្មានមិនដល់៕
